କପ୍ତିପଦା,୮ା୭(ଡି.ଏନ.ଏ)- ମୟୂରଭଞ୍ଜ ଜିଲା କପ୍ତିପଦା ବ୍ଲକ୍ ଶରତ ପଞ୍ଚାୟତ ଅନ୍ତର୍ଗତ ରଙ୍ଗାମାଟିଆ ଗ୍ରାମ ୮ ନମ୍ବର ୱାର୍ଡର ଜଣେ ଅସହାୟ ବିଧବା ବୃଦ୍ଧାଙ୍କୁ ପ୍ରଶାସନ ଉଦ୍ଧାର କରିଛି। ଜିଲାପାଳଙ୍କ ନିର୍ଦ୍ଦେଶରେ ପ୍ରଶାସନିକ ଅଧିକାରୀମାନେ ତାଙ୍କୁ ଉଦ୍ଧାର କରିବା ସହିତ ବାରିପଦାସ୍ଥିତ ବୃଦ୍ଧାଶ୍ରମରେ ଛାଡ଼ିଥିବା ସୂଚନା ମିଳିଛି। ବୃଦ୍ଧା ଜଣକ ହେଲେ ସୁଲୋଚନା ମହାକୁଡ(୭୦)। ପୁଅ ବୋହୁ ନ ପଚାରିବା ଓ ମୁଣ୍ଡ ଗୁଞ୍ଜିବାକୁ ଘର ଖଣ୍ଡେ ନ ଥିବାରୁ ଦୀର୍ଘ ୮ ବର୍ଷ ହେଲା ସେ ଏକ ପଡ଼ିଆ ମଝିରେ ଗାତ ଖୋଳି ସେହି ଗାତ ମଧ୍ୟରେ ରହି ଆସୁଥିବା ଗ୍ରାମବାସୀ କହିଛନ୍ତି। ଖରାବର୍ଷା ଶୀତ କାକରରୁ ରକ୍ଷା ପାଇବା ପାଇଁ ସେହି ଗାତ ଉପରେ ଏକ ପଲିଥିନ ପକାଇ ଜୀବନ ବିତାଇ ଆସୁଥିଲେ। କାମ କରି ରୋଜଗାର କରିବା ପାଇଁ ତାଙ୍କ ଅଣ୍ଟାରେ ବଳ ମଧ୍ୟ ନାହିଁ ା କେବଳ ଅନ୍ନପୂର୍ଣ୍ଣା ଯୋଜନାରେ ମିଳୁଥିବା ମାସକୁ ୧୦ କେ.ଜି ଚାଉଳ ତାଙ୍କର ଜୀବନ ବଞ୍ଚାଇଛି ା ତାଙ୍କ ଦୁର୍ଦ୍ଦଶା ସମ୍ପର୍କରେ ଖବରପାଇ ଓଡ଼ିଶା କୃଷି ଶିଳ୍ପ ନିଗମର ଅଧ୍ୟକ୍ଷ ଦେବାଶିଷ ମହାନ୍ତି ଓ କରଞ୍ଜିଆ ବିଧାୟିକା ବାସନ୍ତି ହେମ୍ରମ୍ବ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ। ଜିଲାପାଳଙ୍କ ନିର୍ଦ୍ଦେଶରେ ଡିଏସଏସଓ ନରେଶ ଚନ୍ଦ୍ର ବିନ୍ଧାଣୀ, ଆରଡିଏସି ସଂପାଦକ ବିଜୟ କୁମାର ବେହେରା ଓ ଦିଲ୍ଲୀପ ରାଉତ ପ୍ରମୁଖ ଘଟଣାସ୍ଥଳରେ ପହଞ୍ଚି ଅସହାୟ ବୃଦ୍ଧାଙ୍କୁ ଉଦ୍ଧାର କରିଥିଲେ।
