ଅମରପାଲି,୮ା୭(ପୀତାମ୍ବର ସାହୁ):ଲଘୁଚାପଜନିତ ଲଗାଣ ବର୍ଷା ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକର କପାଚାଷୀଙ୍କ ପାଇଁ ବଡ଼ ବିପର୍ଯ୍ୟୟ ଆଣିଛି। ଜୁନରେ ବର୍ଷା ନ ଥିବା ବେଳେ ଜୁଲାଇ ଆରମ୍ଭରେ ବର୍ଷା ହେବା ପରେ ଚାଷୀମାନେ ତରବରିଆ ଭାବେ ଜମି ପ୍ରସ୍ତୁତ କରି କପା ମଞ୍ଜି ଲଗାଇଥିଲେ। ମାତ୍ର ୭ ଦିନ ଧରି ପ୍ରବଳ ବର୍ଷା ହେବାରୁ ଚାଷଜମି ଜଳମଗ୍ନ ହୋଇପଡ଼ିଛି। ଫଳରେ ଲଗାଯାଇଥିବା ମଞ୍ଜି ଅଙ୍କୁରିତ ହୋଇପାରିନାହିଁ ଏବଂ ଅନେକ ଚାଷୀ ପୁଣିଥରେ ବିହନ ବୁଣିବାକୁ ବାଧ୍ୟ ହୋଇଛନ୍ତି। ବୀରମହାରାଜପୁର ବ୍ଲକର ଜଟେସିଂହା, ପିତାମହୁଲ, ମୁର୍ଷୁଣ୍ଢୀ, ଦୁର୍ଜନତୈଲା, ସଂଗ୍ରାମପୁର, କେନଝିରିଆପାଲି, ବହଳପଦର, ଖଣ୍ଡହତା, ବାଗବର, ସୁବଳୟା, କମିରା ପ୍ରମୁଖ ପଞ୍ଚାୟତରେ ବ୍ୟାପକ ପରିମାଣରେ କପା ଚାଷ କରାଯାଏ। ଏହି ଅଞ୍ଚଳର ମାଟି କପାଚାଷ ପାଇଁ ଉପଯୁକ୍ତ ହୋଇଥିବାରୁ ପ୍ରତିବର୍ଷ ହଜାର ହେକ୍ଟର ଜମିରେ କପା ଅମଳ ହୁଏ। ଧାନ ପରେ ବୀରମହାରାଜପୁର କୃଷି ଜିଲାରେ କପା ଦ୍ୱିତୀୟ ସର୍ବାଧିକ ଚାଷ ହେଉଥିବା ଫସଲ। ଏଠାର କପାର ଗୁଣବତ୍ତା ଓ ଚାହିଦା ଅଧିକ ଥିବାରୁ ପଡ଼ୋଶୀ ଆନ୍ଧ୍ରପ୍ରଦେଶର କେତେଜଣ ଚାଷୀ ମଧ୍ୟ ଏଠାରେ କପା ଚାଷ କରିବାକୁ ଆସୁଥିବା ସ୍ଥାନୀୟ ଲୋକେ କହିଛନ୍ତି। ସାଧାରଣତଃ ଜୁନ ୧୦ ପରେ କପାଚାଷ ପାଇଁ ଜମି ପ୍ରସ୍ତୁତ କରାଯାଇ ଜୁନ ୨୦ ସୁଦ୍ଧା ଧାଡ଼ି କରି ମଞ୍ଜି ଲଗାଯାଏ। କିନ୍ତୁ ଚଳିତବର୍ଷ ଜୁନରେ ବର୍ଷା ନ ହେବାରୁ ଅନେକ ଚାଷୀ ଜମିରେ ହଳ ମଧ୍ୟ କରି ପାରି ନ ଥିଲେ। ପରେ ବର୍ଷା ହେବାରୁ ଯେଉଁମାନେ ତରବରିଆ ଭାବେ ବିହନ ବୁଣିଥିଲେ, ସେମାନଙ୍କ ଚାଷ ଲଗାଣ ବର୍ଷାରେ ସର୍ବାଧିକ କ୍ଷତିଗ୍ରସ୍ତ ହୋଇଛି। ଅନ୍ୟପକ୍ଷରେ ଅନେକ ଚାଷୀ ଏପର୍ଯ୍ୟନ୍ତ କପା ମଞ୍ଜି ଲଗାଇ ପାରିନାହାନ୍ତି। ବର୍ତ୍ତମାନ ଜମିରେ ପାଣି ଜମି ରହିଥିବାରୁ ଆଗାମୀ କିଛିଦିନ ଚାଷ କାର୍ଯ୍ୟ ସମ୍ଭବ ନୁହେଁ ବୋଲି ଚାଷୀମାନେ କହୁଛନ୍ତି। ଏହାସହ ଚାଷୀମାନଙ୍କ କହିବା ଅନୁଯାୟୀ, ଚଳିତବର୍ଷ କପାଚାଷ କ୍ଷେତ୍ରରେ ପ୍ରଥମେ ବର୍ଷାର ଅଭାବ ଏବଂ ପରେ ଲଗାତାର ବର୍ଷା ଯୋଗୁ ଚାଷ ବ୍ୟାପକ ଭାବେ ପ୍ରଭାବିତ ହୋଇଛି। ତେଣୁ ପ୍ରଶାସନ ତୁରନ୍ତ କ୍ଷୟକ୍ଷତିର ଆକଳନ କରି କ୍ଷତିଗ୍ରସ୍ତ କପାଚାଷୀଙ୍କୁ ଯଥୋଚିତ କ୍ଷତିପୂରଣ ପ୍ରଦାନ କରିବାକୁ ଦାବି ଯୋର ଧରିଛି।
Dharitri – Odisha’s No.1 Odia Daily
