ଭଞ୍ଜନଗର,୧୧ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଅଞ୍ଚଳରେ ରବିବାର ରାତି ୧୦ଟାରୁ ୧୧ଟା ପର୍ଯ୍ୟନ୍ତ ପ୍ରବଳ ଝଡ଼ତୋଫାନ ସହ ବର୍ଷା ହୋଇଥିଲା। ଏହାର କିଛି ସମୟ ପରେ ପୁଣି ବର୍ଷା ହୋଇଥିଲା। ଝଡ଼ତୋଫାନ ଯୋଗୁ ବ୍ୟାପକ କ୍ଷୟକ୍ଷତି ହୋଇଛି। ଭଞ୍ଜନଗର ଠାକୁରାଣୀ ଯାତ୍ରା ପାଇଁ ବେଲଗୁଣ୍ଠା ରୋଡ୍ ଏବଂ ଗାଈ ଫାର୍ମ ସମ୍ମୁଖରେ ହୋଇଥିବା ଦୁଇଟି ତୋରଣ ଭାଙ୍ଗି ଯାଇଛି। ଏଥିସହ ଅନେକ ରାସ୍ତାରେ ଛୋଟ ବଡ଼ ଗଛ ଭାଙ୍ଗି ରାସ୍ତା ଉପରେ ପଡ଼ିଥିଲା। ଫଳରେ ସହରରେ କିଛି ସମୟ ଯାତାୟତରେ ବ୍ୟାହତ ହୋଇଥିଲା।
ଦମକଳ ବାହିନୀ ଏବଂ ଟାଟା ପାଓ୍ବାର କର୍ମଚାରୀ ଘଟଣାସ୍ଥଳରେ ପହଞ୍ଚି ଗଛଗୁଡ଼ିକୁ କାଟି ବାହାର କରିଥିଲେ। ଏହାପରେ ଗମନାଗମନ ସ୍ବାଭାବିକ ହୋଇଥିଲା।
ବର୍ଷା ପାଇଁ ଅନେକ ସ୍ଥାନରେ ବିଦ୍ୟୁତ ତାର ଛିଣ୍ଡି ଯାଇଛି। ଟାଟା ପାଓ୍ବାର କର୍ମଚାରୀ ବିଦ୍ୟୁତ ସେବାକୁ ସ୍ବାଭାବିକ କରିବା ପାଇଁ ଚେଷ୍ଟା ଚଳାଇଛନ୍ତି। ସକାଳ ପର୍ଯ୍ୟନ୍ତ ବିଦ୍ୟୁତ ସେବା ସ୍ବାଭାବିକ ହୋଇପାରିନାହିଁ। ଝଡ଼ ତୋଫାନ ଯୋଗୁ ଯାତ୍ରାର ବ୍ୟାପକ କ୍ଷୟକ୍ଷତି ହୋଇଛି।
ଅପରପକ୍ଷେ ରବିବାର ରାତିରେ ଦେବୀଙ୍କ ନଗର ଭ୍ରମଣ ସମୟରେ ପ୍ରବଳ ବର୍ଷା ଯୋଗୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ। ଦେବୀଙ୍କୁ ବର୍ଷାରେ ଶୋଭାଯାତ୍ରାରେ ନିଆଯାଇ ଉପଜିଲାପାଳଙ୍କ ବାସଭବନ ପର୍ଯ୍ୟନ୍ତ ନିଆଯାଇଥିଲା। ସେଠାରେ ଦେବୀ ପୂଜା ପାଇଥିଲେ। ଏହାପରେ ବର୍ଷା ଛାଡ଼ିବା ପରେ ଦେବୀ ଅସ୍ଥାୟୀ ମଣ୍ଡପରେ ପହଞ୍ଚି ବିଶ୍ରାମ ନେଇଥିଲେ।
