ସମ୍ବଲପୁର,୬ା୭(ପ୍ରମୋଦ ବହିଦାର): ସମ୍ବଲପୁରରେ ଗତ ୪ ଦିନ ଧରି ପ୍ରବଳରୁ ଅତି ପ୍ରବଳ ବର୍ଷା ଜାରି ରହିଥିବା ବେଳେ ଗତ ରାତ୍ରି ତମାମ ଅବିଶ୍ରାନ୍ତ ବର୍ଷା ଫଳରେ ସହରର ବିଭିନ୍ନ ତଳିଆ ଅଞ୍ଚଳ ଜଳମଗ୍ନ ହୋଇପଡିଛି। ସ୍ଥିତିର ସମୀକ୍ଷା ପାଇଁ ସମ୍ବଲପୁର ଜିଲାପାଳ ସିଦ୍ଧେଶ୍ୱର ବଲିରାମ ବୋନ୍ଦର ଏବଂ ସମ୍ବଲପୁର ମହାନଗର ନିଗମ(ଏସଏମସି) ଆୟୁକ୍ତ ରେହାନ ଖତ୍ରି ବ୍ୟକ୍ତିଗତ ଭାବେ ବିଭିନ୍ନ ପ୍ରଭାବିତ ଅଞ୍ଚଳ ପରିଦର୍ଶନ କରି ସ୍ଥିତିର ସମୀକ୍ଷା କରିଥିଲେ। ଏହାସହ ପ୍ରଭାବିତ ଲୋକଙ୍କ ସହ ଆଲୋଚନା କରି ସମସ୍ୟା ବୁଝିବା ସହ ଜଳନିଷ୍କାସନ ଓ ରିଲିଫ କାର୍ଯ୍ୟକୁ ତ୍ୱରାନ୍ବିତ କରିବା ପାଇଁ ପ୍ରଶାସନିକ ଅଧିକାରୀମାନଙ୍କୁ ଆବଶ୍ୟକ ନିର୍ଦ୍ଦେଶ ଦେଇଛନ୍ତି। ଏହି ପ୍ରଳୟଙ୍କରୀ ବର୍ଷାକୁ ଦୃଷ୍ଟିରେ ରଖି ସମ୍ବଲପୁର ମହାନଗର ନିଗମ ଅଞ୍ଚଳ ଏବଂ ଧନକଉଡା ବ୍ଲକର ସମସ୍ତ ବିଦ୍ୟାଳୟକୁ ସୋମବାର ପାଇଁ ଛୁଟି ଘୋଷଣା କରାଯାଇଛି।
ଅନ୍ୟପଟେ ସେଣ୍ଟଜୋନ୍ସ ସ୍କୁଲ ସଙ୍କର୍ମା ରାସ୍ତା ବାଗଡ଼ିଆପଡ଼ା ନିକଟରେ ଗତକାଲି ରାତି ସାରା ଦୁଇ ଜଣ ବ୍ୟକ୍ତି ପାଣି ଘେରରେ ବନ୍ଦୀ ହୋଇ ରହିଥିଲେ। ଖବର ପାଇ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ତେବେ ସେମାନଙ୍କ ମଧ୍ୟରୁ ଜଣକୁ ସଫଳତାର ସହ ଉଦ୍ଧାର କରାଯାଇଥିବା ବେଳେ ଅନ୍ୟ ଜଣେ ବ୍ୟକ୍ତି ଏପର୍ଯ୍ୟନ୍ତ ନିଖୋଜ ଅଛନ୍ତି ଓ ଏବେ ସୁଦ୍ଧା ଖୋଜି ବାହାର କରାଯାଇପାରି ନାହିଁ। ତାଙ୍କୁ ଖୋଜାଖୋଜି ଜାରି ରହିଛି ବୋଲି ଅଗ୍ନିଶମ ଅଧିକାରୀ ସୁଦାମ କିସ୍କୁ ସୂଚନା ଦେଇଛନ୍ତି।
ସେହିପରି ସରକାରୀ ରିପୋର୍ଟ ଅନୁସାରେ, ଜିଲାରେ ବର୍ଷାର ପରିମାଣ ବେଶ ଚିନ୍ତାଜନକ ରହିଛି। ସମ୍ବଲପୁର ଏସଏମସି ଅଞ୍ଚଳରେ ସର୍ବାଧିକ ୨୨୦ ମିଲିମିଟର ଏବଂ ଧନକଉଡାରେ ୧୮୮ ମିଲିମିଟର ବର୍ଷା ରେକର୍ଡ କରାଯାଇଛି। ଏହା ସହିତ ରେଙ୍ଗାଲିରେ ୧୬୦ ମିମି, ଠେମେରାରେ ୧୨୬ ମିମି, ମାନେଶ୍ୱରରେ ୧୨୩ ମିମି, ଯୁଯୋମୁରାରେ ୭୦ ମିମି, ଜାମନକିରାରେ ୬୯ ମିମି, ରେଢ଼ାଖୋଲରେ ୬୭ ମିମି, ନାକ୍ଟିଦେଉଳରେ ୫୦ ମିମି, କୁଚିଣ୍ଡାରେ ୪୮ ମିମି ଏବଂ ବାମରାରେ ୪୧ ମିମି ବର୍ଷା ହୋଇଥିବା ଜଣାପଡିଛି। ପ୍ରଶାସନ ପକ୍ଷରୁ ସମସ୍ତଙ୍କୁ ସତର୍କ ଓ ସୁରକ୍ଷିତ ରହିବାକୁ ପରାମର୍ଶ ଦିଆଯିବା ସହ ଜରୁରୀକାଳିନ ସ୍ଥିତି ପାଇଁ ସ୍ଥାନୀୟ ପ୍ରଶାସନ ସହ ଯୋଗାଯୋଗ କରିବାକୁ କୁହାଯାଇଛି। ହୀରାକୁଦ ଜଳଭଣ୍ଡାରରେ ସକାଳ ସାଢ଼େ ୯ର ସ୍ଥିତି ଅନୁଯାୟି ଜଳସ୍ତର ୬୦୩.୩୯ ଫୁଟ ରହିଛି। ଜଳଭଣ୍ଡାରକୁ ପ୍ରତି ସେକେଣ୍ଡରେ ୩୪,୫୯୩ ଘନଫୁଟ ଜଳ ପ୍ରବେଶ କରୁଥିବା ବେଳେ ଜଳଭଣ୍ଡାରରୁ ମୋଟ ୧୭,୦୮୮ ଘନଫୁଟ ଜଳ ନିଷ୍କାସିତ ହେଉ ଥିବା ସୂଚନା ମିଳିଛି।
