ଗଜପତି,୧୨ା୬(ଗିରିଧାରୀ ପରିଚ୍ଛା): ଗଜପତି ଜିଲା ଗୁମ୍ମା ବ୍ଲକ ଅନ୍ତର୍ଗତ ପରିଡ଼ା ଗ୍ରାମରେ ଆୟୋଜିତ ଜନ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ପାରଳା ବିଧାୟକ ରୂପେଶ ପାଣିଗ୍ରାହୀ ଯୋଗଦେଇ ଗ୍ରାମବାସୀଙ୍କ ବିଭିନ୍ନ ସମସ୍ୟା ଶୁଣିଥିଲେ। ପ୍ରାୟ ୨୦ରୁ ୨୫ ଜଣ ଗ୍ରାମବାସୀ ନିଜ ନିଜ ଅଭିଯୋଗ ବିଧାୟକଙ୍କ ସମ୍ମୁଖରେ ଉପସ୍ଥାପନ କରିଥିଲେ।
ଶୁଣାଣି ସମୟରେ ବୃଦ୍ଧ ଓ ବୃଦ୍ଧାମାନେ ତିନି ମାସ ଧରି ଭତ୍ତା ଟଙ୍କା ନପାଇ ହଇରାଣ ହେଉଥିବା ଅଭିଯୋଗ କରିଥିଲେ। ଭତ୍ତା ଟଙ୍କାରେ ଔଷଧ କିଣିବା ସହ ଦୈନନ୍ଦିନ ଖର୍ଚ୍ଚ ଚାଲୁଥିବା ବେଳେ ଦୀର୍ଘ ଦିନ ଧରି ଟଙ୍କା ନମିଳିବାରୁ ସେମାନେ ଆର୍ଥିକ ସଙ୍କଟରେ ପଡ଼ିଥିବା କହିଥିଲେ। ବିଧାୟକ ଗ୍ରାମର ଚର୍ଚ୍ଚ ନିକଟରେ ବସି ବୃଦ୍ଧାବୃଦ୍ଧଙ୍କ ସମସ୍ୟା ଧୈର୍ଯ୍ୟର ସହ ଶୁଣିଥିଲେ।
ଏହି ଅବସରରେ ୮୦ ବର୍ଷୀୟା ସାରଳା ସିଂ ନିଜକୁ ନିର୍ଦ୍ଧାରିତ ୩୫୦୦ ଟଙ୍କା ଭତ୍ତା ମିଳୁ ନ ଥିବା ବିଷୟରେ ବିଧାୟକଙ୍କୁ ଜଣାଇଥିଲେ। ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ବିଧାୟକ ସେହି ସ୍ଥାନରୁ ପରିଡ଼ା ପଞ୍ଚାୟତର ଗ୍ରାମସେବକ ଚନ୍ଦ୍ର ରାଓଙ୍କ ସହ ଫୋନ୍ରେ ଯୋଗାଯୋଗ କରି ଭତ୍ତା ବିଳମ୍ବର କାରଣ ପଚାରିଥିଲେ। ଗ୍ରାମସେବକ ରାଜ୍ୟ ସରକାରଙ୍କ ପକ୍ଷରୁ ଗତ ତିନି ମାସ ଧରି ଭତ୍ତା ଅର୍ଥ ପଞ୍ଚାୟତକୁ ଆସିନଥିବା ସୂଚନା ଦେଇଥିଲେ। ବିଧାୟକ ରୂପେଶ ପାଣିଗ୍ରାହୀ ବୃଦ୍ଧାବୃଦ୍ଧଙ୍କୁ ଆଶ୍ୱାସନା ଦେଇ କହିଥିଲେ ଯେ, ଏହି ପ୍ରସଙ୍ଗରେ ସେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଶୀଘ୍ର ଭତ୍ତା ପ୍ରଦାନ ପାଇଁ ଦାବି କରିବେ। ଏହା ସହ କିଛି ଦିନ ଧୈର୍ଯ୍ୟ ଧରିବାକୁ ସେ ଗ୍ରାମବାସୀଙ୍କୁ ଅନୁରୋଧ କରିଥିଲେ।
ଅନ୍ୟପଟେ ଗ୍ରାମର ଯୁବକମାନେ ଏକ ଖେଳ ପଡ଼ିଆ ନିର୍ମାଣ ପାଇଁ ବିଧାୟକଙ୍କ ନିକଟରେ ଦାବି ଉଠାଇଥିଲେ। ଏହାର ଉତ୍ତରରେ ବିଧାୟକ କହିଥିଲେ ଯେ, ସରକାରୀ ଜମି ଚିହ୍ନଟ ହେଲେ ଜିଲାପାଳ ଓ ତହସିଲଦାରଙ୍କ ସହ ଆଲୋଚନା କରି ଖେଳ ପଡ଼ିଆ ନିର୍ମାଣ ପାଇଁ ଆବଶ୍ୟକ ପଦକ୍ଷେପ ନିଆଯିବ। ଏହି ଜନ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ଦାମୋଦର ନାୟକ, ବାଲାରାଜୁ ମିଶାଲ, ଉତ୍ତମ, ଉଜ୍ଜ୍ୱଳଙ୍କ ସମେତ ଗ୍ରାମର ଅନେକ ଯୁବକ ଓ ସ୍ଥାନୀୟ ବାସିନ୍ଦା ଉପସ୍ଥିତ ଥିଲେ।
