ଅହମଦାବାଦ,୨୫ା୫: ଇଣ୍ଡିଆନ ପ୍ରିମିୟର୍ ଲିଗ୍(ଆଇପିଏଲ)ର କ୍ୱାଲିଫାୟର-୨ରେ ପରସ୍ପରକୁ ଭେଟିବେ ଡିଫେଣ୍ଡିଂ ଚାମ୍ପିୟନ ଗୁଜରାଟ ଟାଇଟନ୍ସ ଓ ୫ ଥର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ। ଲକ୍ଷ୍ନୌକୁ ୮୧ ରନ୍ରେ ପରାସ୍ତ କରି କ୍ୱାଲିଫାୟର-୨ରେ ପହଞ୍ଚିଛି ମୁମ୍ବାଇ।
ଶୁକ୍ରବାର ବିଶ୍ୱର ସର୍ବବୃହତ୍ ନରେନ୍ଦ୍ର ମୋଦି କ୍ରିକେଟ ଷ୍ଟାଡିୟମରେ ଉଭୟ ଦଳ ପରସ୍ପର ସମ୍ମୁଖୀନ ହେବେ। ମହେନ୍ଦ୍ର ସିଂ ଧୋନୀଙ୍କ ଚେନ୍ନାଇ ସୁପର କିଙ୍ଗ୍ସ ନିକଟରୁ ପରାଜିତ ହୋଇ ଗୁଜରାଟ କ୍ୱାଲିଫାୟର-୨ ଖେଳୁଥିଲେ ହେଁ ଦଳକୁ ହେୟଜ୍ଞାନ କରିହେବ ନାହିଁ। ଓପନର ଶୁବମନ ଗିଲ୍ ଦଳର ମୁଖ୍ୟ ଶକ୍ତି ରହିଛନ୍ତି। ଚେନ୍ନାଇ ବିପକ୍ଷରେ ସେ ଫେଲ୍ ମାରିଥିଲେ ମଧ୍ୟ ମୁମ୍ବାଇ ପାଇଁ ସେ ଘାତକ ସାବ୍ୟସ୍ତ ହୋଇପାରନ୍ତି। ୧୫ ମ୍ୟାଚ୍ରୁ ୫୫.୫୩ ଆଭରେଜ ସହ ସେ ୭୨୨ ରନ୍ କରିଛନ୍ତି। ଗୁଜରାଟର ଅନ୍ୟତମ ଶ୍ରେଷ୍ଠ ବ୍ୟାଟର ବିଜୟ ଶଙ୍କରଙ୍କଠାରୁ ସେ ୪୨୧ ରନ୍ ଆଗରେ ରହିଛନ୍ତି। ବିଗତ ୪ ମ୍ୟାଚ୍ରେ ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ବ୍ୟାଟ ଚାଲି ନ ଥିବା ବେଳେ ଦଳ ତାଙ୍କଠାରୁ ବଡ ଇନିଂସ ଆଶା କରିବ। ଚଳିତ ସିଜନରେ ଉଭୟ ଦଳ ପରସ୍ପରକୁ ଥରେ ଲେଖାଏ ହରାଇଛନ୍ତି। ପ୍ରଥମ ମ୍ୟାଚ୍ରେ ଗୁଜରାଟ ୫୫ ରନରେ ବିଜୟୀ ହୋଇଥିବା ବେଳେ ଦ୍ୱିତୀୟ ମ୍ୟାଚକୁ ମୁମ୍ବାଇ ୨୭ ରନ୍ରେ ଜିତିଥିଲା। ବୋଲିଂ ବିଭାଗରେ ଗୁଜରାଟ ସାମାନ୍ୟ ଶକ୍ତିଶାଳୀ ମନେହେଉଛି। ପର୍ପଲ କ୍ୟାପ୍ ହୋଲ୍ଡର ମହମ୍ମଦ ଶାମିଙ୍କ ସହିତ ରଶିଦ୍ ଖାନ୍ ଓ ନୁର ଅହମଦଙ୍କ ଭଳି ବୋଲର ଦଳ ନିକଟରେ ରହିଛନ୍ତି।
