ପୁରୀ ଅଫିସ,୧।୮: କୋଭିଡ୍ କଟକଣା ନେଇ ଶନିବାର ରାଜ୍ୟ ସରକାରଙ୍କ ନୂଆ ଗାଇଡ୍ ଲାଇନ୍ ଆସିବା ପରେ ଶ୍ରୀମନ୍ଦିର ଖୋଲିବା ଓ ବେଳାଭୂମି ପୁଣି ଚଳଚଞ୍ଚଳ ହେବା ଆଶା ଉଜ୍ଜିବୀତ ହୋଇଛି। ୧ ତାରିଖରୁ ନୂଆ ଗାଇଡ୍ଲାଇନ ଆଧାରରେ କଟକଣା କୋହଳ ହୋଇଛି। ଶ୍ରଦ୍ଧାଳୁଙ୍କ ନିମନ୍ତେ ଶ୍ରୀମନ୍ଦିର ଖୋଲାଯିବା ନିଷ୍ପତ୍ତି ପ୍ରଶାସନ ଉପରେ ଛାଡ଼ିଦିଆଯାଇଛି। ସେହିପରି ବେଳାଭୂମିକୁ ପର୍ଯ୍ୟଟକ ଆସିପାରିବେ ବୋଲି ସବୁଜ ସଙ୍କେତ ମିଳିଛି। ତେଣୁ ପୁରୀର ଉଠାଦୋକାନୀ, ବ୍ୟବସାୟୀ, ରେଷ୍ଟୁରାଣ୍ଟ ଓ ହୋଟେଲ ମାଲିକଙ୍କ ସମେତ ବେଳାଭୂମି ଉପରେ ନିର୍ଭରଶୀଳ ପରିବାର ଖୁସି ପ୍ରକଟ କରିଛନ୍ତି।
କୋଭିଡ୍ କଟକଣା ଯୋଗୁ ବେଳାଭୂମି ଖାଁ ଖାଁ ହୋଇପଡ଼ିଥିଲା। ମାତ୍ର ସରକାରଙ୍କ ନୂଆ ଘୋଷଣା ପରେ ପୁଣି ପର୍ଯ୍ୟଟକଙ୍କ ଆଗମନ ସାଙ୍ଗକୁ ପୁରୀ ଚଳଚଞ୍ଚଳ ହୋଇଉଠିବାର ଆଶା ସୃଷ୍ଟି ହୋଇଛି। ବେଳାଭୂମି ପାଖରେ ଉଠାଦୋକାନ କରିଥିବା ଶହ ଶହ ଲୋକ ହାତ ବାନ୍ଧି ଘରେ ବସିଥିଲେ। ଏବେ ସେମାନଙ୍କ ମୁହଁରେ ପୁଣି ହସ ଉକୁଟିବ। ସେମାନେ ନିଜ ପସରା ଧରି ବେଳାଭୂମିକୁ ଧାଇଁ ଆସିବେ। ବେଳାଭୂମି ନିକଟରେ ସିଫୁଡ୍ସ ବିକ୍ରି କରୁଥିବା ସତ୍ୟବ୍ରତ ପରିଡ଼ା କହିଛନ୍ତି, ଶେଷ ଥର କେବେ ଦୋକାନ ଖୋଲିଥିଲି ତାହା ମନେ ପଡୁନାହିଁ। କରୋନା କାହାକୁ କେତେ କଷଣ ଦେଇଛି ତାହା ତ ଜଣା ନାହିଁ ହେଲେ ମୋତେ ଉପାସ ରହିବା ଭଳି ସ୍ଥିତିରେ ଆଣି ଠିଆ କରାଇଛି। ଦ୍ୱିତୀୟ ଲହରର ପ୍ରଭାବ କମିବା ଓ ସରକାରଙ୍କ କଟକଣା କୋହଳ ହେବା ପରେ ପୁଣି ଭଳ ଭାବେ ପରିବାର ପ୍ରତିପୋଷଣ ଆଶା ବାନ୍ଧିଛି। ପୁରୀକୁ ପର୍ଯ୍ୟଟକ ଆସିବେ ଓ ବେପାର ଜମିବ ଭାବି ଖୁସି ଲାଗୁଛି। ଅନ୍ୟପକ୍ଷରେ ସରକାରଙ୍କ କଟକଣା କୋହଳ ନେଇ ଘୋଷଣା ହେବାର ମାତ୍ର କିଛି ଘଣ୍ଟା ପରେ ବେଳାଭୂମିରେ ଗହଳି ଦେଖିବାକୁ ମିଳିଛି। ସହରର ଅନେକ ଲୋକ ବେଳାଭୂମିକୁ ଯାଇ ଦୃଶ୍ୟ ଉପଭୋଗ କରିବା ସହ ସେଲଫି ଉଠାଉଥିବା ଦେଖିବାକୁ ମିଳିଥିଲା।
ବେଳାଭୂମିରେ ଶନିବାର ସନ୍ଧ୍ୟାରେ ସମୟ ଅତିବାହିତ କରୁଥିବା ସନ୍ଧ୍ୟାରାଣୀ ସ୍ବାଇଁ କହିଛନ୍ତି, ସହର ଭିତରେ ରହି ଅନେକ ଦିନ ହେବ ଏକପ୍ରକାର ଅଣନିଃଶ୍ୱାସୀ ଅନୁଭବ କରୁଥିଲି। ଏବେ ବେଳାଭୂମି ପାଖକୁ ଆସି ଖୁବ୍ ଖୁସି। ତେବେ ସମସ୍ତେ କୋଭିଡ୍ କଟକଣା ମାନିବା ଉଚିତ। ଅନ୍ୟପକ୍ଷରେ ଶ୍ରୀମନ୍ଦିର ପ୍ରଶାସନ ନିଷ୍ପତ୍ତିକୁ ଏବେ ସମସ୍ତଙ୍କ ଅପେକ୍ଷା ରହିଛି। ଶ୍ରୀମନ୍ଦିରରେ ଦର୍ଶନ ଅନୁମତି କେବେ ମିଳିବ ତାହାକୁ ଶ୍ରଦ୍ଧାଳୁ ଚାହିଁ ବସିଛନ୍ତି। ଆସନ୍ତା ୪ ତାରିଖରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ବୈଠକ ବସିବ। ବୈଠକରେ ମନ୍ଦିର ଖୋଲାଯିବ କି ନାହିଁ ତାହା ନିଷ୍ପତ୍ତି ହେବ ବୋଲି କୁହାଯାଉଛି। ପୁରୀ ସହରବାସୀ ଓ ଜିଲାବାସୀଙ୍କୁ ଦର୍ଶନ ଅନୁମତି ମିଳିବା ଦରକାର ବୋଲି ସହରବାସୀ ଦାବି କରିଛନ୍ତି। କୋଭିଡ୍ କଟକଣା ମଧ୍ୟରେ ପ୍ରଶାସନ ଦର୍ଶନ ଅନୁମତି ଦେଉ ବୋଲି ଭାଜପା ଯୁବମୋର୍ଚ୍ଚା ସଭାପତି ଜୟନ୍ତ କୁମାର ଦାଶ କହିଛନ୍ତି। ଅନ୍ୟପକ୍ଷରେ ପୁରୀ ସହରକୁ ପର୍ଯ୍ୟଟକଙ୍କ ଆଗମନ ବଢ଼ିବା ସମ୍ଭାବନା ଥିବାରୁ କୋଭିଡ୍ କଟକଣା ପାଳନ କରାଇବା ଜିଲା ପ୍ରଶାସନ ପାଇଁ ଏକ ବଡ଼ ଚ୍ୟାଲେଞ୍ଜ ହୋଇପାରେ। ତେବେ ପ୍ରଶାସନ କୋଭିଡ୍ କଟକଣା ମଧ୍ୟରେ ପର୍ଯ୍ୟଟକଙ୍କୁ ସ୍ବାଗତ କରିବ ବୋଲି ଉପଜିଲାପାଳ ଭବତାରଣ ସାହୁ କହିଛନ୍ତି।
