ମାଥିଲି,୧୫ା୧୨(ଡି.ଏନ.ଏ.): ମାଥିଲିରେ ସରକାରଙ୍କ ପାନୀୟ ଜଳ ଯୋଗାଣ ଯୋଜନା ଫେଲ୍ ମାରିଛି। ଶୁଦ୍ଧ ପାନୀୟଜଳ ଘରେ ଘରେ ପହଞ୍ଚାଇବା ଲାଗି ରାଜ୍ୟ ଓ କେନ୍ଦ୍ର ସରକାର ବହୁ ଯୋଜନା କାର୍ଯ୍ୟକାରୀ କରୁଛନ୍ତି। ମାତ୍ର ବାସ୍ତବରେ ଏଥିରୁ ଲୋକେ ସୁଫଳ ପାଉନଥିବା ଅଭିଯୋଗ ହେଉଛି। ଏପରି ଦେଖିବାକୁ ମିଳିଛି ମାଲକାନଗିରି ଜିଲା ମାଥିଲି ବ୍ଲକ କର୍ତ୍ତନପାଲି ପଞ୍ଚାୟତର ରାଜସ୍ବ ଗ୍ରାମ ସାନଗୁମ୍ମା, ପଡାସାହି ଫୁଲପିନ୍ଧାନିଗୁଡା, ସିଲିଗୁଡା, ନୂଆଗୁଡା, କଣ୍ଟାବାଉଁଶଗୁଡା, ବନ୍ଧଗୁଡା, ଗୋଟାନଗୁଡା ଓ ହରିଜନ ସାହିରେ। ଉପରୋକ୍ତ ଗ୍ରାମଗୁଡିକରେ ୮୦ରୁ ଉଦ୍ଧର୍ବ ପରିବାରର ୪ଶହ ଲୋକ ବସବାସ କରୁଛନ୍ତି। ଗ୍ରାମରେ ଥିବା ୩ଟି ନଳକୂପରୁ ଗୋଟିଏ ନଳକୂପ ଅଚଳ ହୋଇ ପଡିରହିଛି। ୨ଟିରୁ ପାଣି ଠିକ୍ ରୂପେ ବାହାରୁନାହିଁ। ବର୍ଷ ତମାମ ଲୋକେ ସାବେରୀ ନଦୀ ପାଣି ଉପରେ ନିର୍ଭର କରୁଛନ୍ତି। ବର୍ଷା ଦିନେ ନଦୀର ଗୋଳିଆ ପାଣି ସେମାନଙ୍କ ଭରସା। ଅନ୍ୟ କୌଣସି ବିକଳ୍ପ ନ ଥିବାରୁ ସେହି ପାଣିକୁ ପାନୀୟଜଳ ଭାବେ ପିଇବା ପାଇଁ ବାଧ୍ୟ ହେଉଛନ୍ତି। ସେହି ନଦୀ ପାଣିରେ ଗାଧୋଇବା, ଲୁଗାପଟା ସଫା କରିବାଠାରୁ ଆରମ୍ଭ କରି ଗୃହପାଳିତ ପ୍ରାଣୀ ମଧ୍ୟ ଉକ୍ତ ପାଣିରେ ଶୋଷ ମେଣ୍ଟାଉଛନ୍ତି। ପାହାଡ଼ ଜଙ୍ଗଲ ପାର ହୋଇ ଘାଟି ଓହ୍ଲାଇ ପାଣି ହାଣ୍ଡି ଧରି ଚଢିବା ବେଳେ ଅନେକ ସମୟରେ ମହିଳାମାନେ ପଡିଯାନ୍ତି ବୋଲି କୁହନ୍ତି ଗାଁର ମହିଳାମାନେ। ମୁନ୍ଦିଏ ପାଣି ପାଇଁ ଗର୍ଭବତୀ ମହିଳାମାନେ ମଧ୍ୟ ମୁଣ୍ଡରେ ପାଣିହାଣ୍ଡି ଧରି ଘାଟି ଚଢି ଯାଉଥିବାର ଦୃଶ୍ୟ ଦେଖିବାକୁ ମିଳେ। ଦେଶରେ ଡିଜିଟାଲ ସେବା ଲୋକଙ୍କ ପାଖରେ ପହଞ୍ଚତ୍ପାରୁଛି ଅଥଚ ପାନୀୟ ଜଳ ମୁନ୍ଦେ ଆମ ପାଖରେ ପହଞ୍ଚତ୍ପାରୁନି ବୋଲି କେତେକ ଗ୍ରାମବାସୀ କ୍ଷୋଭର ସହ ପ୍ରକାଶ କରିଛନ୍ତି। ଏହି ଅଞ୍ଚଳରେ ଦୀର୍ଘ ବର୍ଷ ହେଲା ସୀମାନ୍ତ କୋରାପୁଟ ଜିଲାର ତେନ୍ତୁଳିଗୁମ୍ମା ଓ ଉଦୟଗିରି ଗ୍ରାମରେ ଘରୋଇ କମ୍ପାନୀ ମିନାକ୍ଷୀ ଜଳ ବିଦ୍ୟୁତ ପ୍ରକଳ୍ପ ନିର୍ମାଣ କରାଯାଇଛି ସତ ମାତ୍ର ଶୁଦ୍ଧ ପାନୀୟଜଳ ପାଇବାରୁ ସାନଗୁମ୍ମା ସମେତ ୮ଟି ଗ୍ରାମର ଲୋକେ ବଞ୍ଚତ୍ତ ହୋଇଛନ୍ତି। ଏନେଇ ଜିଲା ଓ ବ୍ଳକ ପ୍ରଶାସନ ଦୃଷ୍ଟି ଦେଇ ସମ୍ପୃକ୍ତ ଗ୍ରାମ ଦୁଇଟିର ବାସ୍ତବ ସ୍ଥିତି ଅନୁଧ୍ୟାନ କରି ଗ୍ରାମ ଦୁଇଟିକୁ ପାନୀୟଜଳ ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି।
