ଅମରପାଲି, ୨୦।୫ (ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ତହସିଲ ଅନ୍ତର୍ଗତ ମୁର୍ଷୁଣ୍ଢୀ ପଞ୍ଚାୟତର କର୍ଡାପାଲ ଗ୍ରାମରେ ସରକାରୀ ଗୋଚର ଓ ଚାରଣ ଜମି ଜବରଦଖଲ ହୋଇଥିବା ଅଭିଯୋଗ ଉଠିଛି। ଏନେଇ ଗ୍ରାମବାସୀମାନେ ସୁବର୍ଣ୍ଣପୁର ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ଗ୍ରାମରେ ପଶୁ ଚାରଣ ଓ ବିକାଶମୂଳକ କାର୍ଯ୍ୟ ପାଇଁ ସରକାରୀ ଖାତା ନଂ ୧୬୭, ୧୬୮ ଓ ୧୬୯ରେ ବିସ୍ତୃତ ଗୋଚର ଓ ଚାରଣ ଜମି ରହିଛି। କିନ୍ତୁ ଗ୍ରାମର କେତେକ ପ୍ରଭାବଶାଳୀ ଓ ଧନୀ ବ୍ୟକ୍ତି ଏହି ଜମିକୁ ବେଆଇନ ଭାବେ ଦଖଲ କରି ବ୍ୟକ୍ତିଗତ ଭାବେ ଚାଷ କରୁଥିବା ଅଭିଯୋଗ କରାଯାଇଛି।
ଏହି ଜବରଦଖଲ ଯୋଗୁଁ ଗ୍ରାମର ଗାଈ, ବାଛୁରୀ ଓ ଅନ୍ୟ ଗୃହପାଳିତ ପଶୁମାନଙ୍କ ପାଇଁ ଚାରଣ ଭୂମିର ଅଭାବ ଦେଖାଦେଇଛି। ଏଥିସହିତ ଗ୍ରାମର ବିକାଶମୂଳକ କାର୍ଯ୍ୟ ପାଇଁ ସରକାରୀ ଜମି ଆବଶ୍ୟକ ହେଉଥିଲେ ମଧ୍ୟ ଜବରଦଖଲ କାରଣରୁ ବିଭିନ୍ନ ପ୍ରକଳ୍ପ କାର୍ଯ୍ୟକାରିତାରେ ବାଧା ସୃଷ୍ଟି ହେଉଥିବା ଗ୍ରାମବାସୀମାନେ କହିଛନ୍ତି।
ଏନେଇ ପୂର୍ବରୁ ତହସିଲଦାର ଓ ଅନ୍ୟ ପ୍ରଶାସନିକ ଅଧିକାରୀଙ୍କୁ ଅଭିଯୋଗ କରାଯାଇଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ ହୋଇନଥିବାରୁ ଜବରଦଖଲ ଦିନକୁ ଦିନ ବଢ଼ୁଥିବା ଅଭିଯୋଗ ହୋଇଛି।
ତେଣୁ ତୁରନ୍ତ ସରକାରୀ ଜମିକୁ ଜବରଦଖଲମୁକ୍ତ କରିବା ସହ ଦଖଲକାରୀଙ୍କ ବିରୋଧରେ କଠୋର ଆଇନଗତ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି। ଯଦି ଶୀଘ୍ର ପଦକ୍ଷେପ ଗ୍ରହଣ ନହୁଏ, ତେବେ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବାକୁ ସେମାନେ ଚେତାବନୀ ଦେଇଛନ୍ତି।
ଏହି ଦାବିପତ୍ରରେ ରମାକାନ୍ତ ହୋତା, ଚତୁର୍ଭୁଜ ଦେହୁରୀ, ପରମାନନ୍ଦ ସାହୁ, ପ୍ରଶାନ୍ତ ଘିବିଲା, ଟିଲୁ ପୋଢ଼ ଓ ଶିଶିର ପ୍ରଧାନଙ୍କ ସମେତ ଶତାଧିକ ଗ୍ରାମବାସୀଙ୍କ ସ୍ୱାକ୍ଷର ରହିଛି।
ଦାବିପତ୍ର ପାଇବା ପରେ ସୁବର୍ଣ୍ଣପୁର ଜିଲାପାଳ ଡ଼ଃ ନୃପରାଜ ସାହୁ ବୀରମହାରାଜପୁର ତହସିଲଦାର ସୁଚିସ୍ମିତା ପାଣିଗ୍ରାହୀଙ୍କୁ ଘଟଣାର ତଦନ୍ତ କରି ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି।
