ଘୋର,୨୦ା୫:ଆଫ୍ଗାନିସ୍ତାନରେ ଲୋକମାନଙ୍କ ଅର୍ଥନୈତିକ ସ୍ଥିତି ବିଗିଡ଼ିଗଲାଣି। କାମ ଧନ୍ଦା ମିଳୁ ନ ଥିବାରୁ ଲୋକମାନେ ଖାଇବାକୁ ପାଉନାହାନ୍ତି। ଅଧିକାଂଶଙ୍କ ଜୀବନ ଦୁର୍ବିଷହ ହୋଇପଡ଼ିଲାଣି। ସକାଳ ହେବା ମାତ୍ରେ, ଆଫଗାନିସ୍ତାନର ଘୋର ପ୍ରଦେଶର ରାଜଧାନୀ ଚାଘଚାରାନରେ ଲୋକମାନେ କାମ ପାଇଁ ପଡ଼ିଆରେ ଭିଡ଼ ଲଗାଉଛନ୍ତି। ଯାହାକୁ କାମ ମିଳିଲା, ସେ ପରିବାର ପାଇଁ ଖାଦ୍ୟ ଯୋଗାଡ଼ କରିବାରେ ସକ୍ଷମ ହେଉଥିବାବେଳେ ଅନ୍ୟମାନେ ଭୋକ ଉପାସରେ କାଳାତିପାତ କରୁଛନ୍ତି। ଏପରି କି କେହି କେହି ଖାଦ୍ୟ ପାଇଁ ସେମାନଙ୍କ ଛୋଟ ପିଲାଙ୍କୁ ମଧ୍ୟ ବିକ୍ରି କରିବାକୁ ପଛାଉନାହାନ୍ତି। ଅବଦୁଲ ରସିଦ ଆଜ୍ମି ନାମକ ଜଣେ ବ୍ୟକ୍ତି କହିଛନ୍ତି, ନିଜର ଅନ୍ୟ ପିଲାମାନଙ୍କ ପେଟ ପୂରାଇବା ପାଇଁ ସେ ତାଙ୍କର ଗୋଟେ ଝିଅକୁ ବିକ୍ରି କରିବାକୁ ପ୍ରସ୍ତୁତ ଅଛନ୍ତି।
ଘୋର ପ୍ରଦେଶରେ ଲୋକମାନଙ୍କୁ ଠିକ୍ରେ କାମ ମିଳୁ ନ ଥିବାରୁ ସ୍ଥିତି ବିଗିଡ଼ିବାରେ ଲାଗିଛି। ୪୫ ବର୍ଷୀୟ ଜୁମା ଖାନ୍ଙ୍କ କହିବା ହେଲା, ଗତ ଛଅ ସପ୍ତାହ ମଧ୍ୟରେ ସେ ମାତ୍ର ତିନି ଦିନର କାମ ପାଇଛନ୍ତି, ଯେଉଁଥିରୁ ତାଙ୍କୁ ଦୈନିକ ୧୫୦ ରୁ ୨୦୦ ଆଫଗାନି (୨.୩୫ – ୩.୧୩ ଡଲାର) ମିଳିଥିଲା। ତାଙ୍କ ସ୍ତ୍ରୀ ଓ ପିଲାମାନେ ୩ଦିନ ଦେଲା ଓପାସରେ ଅଛନ୍ତି। ରାତିରେ ଖାଲି ପେଟରେ ଶୋଉଛନ୍ତି। ଅଟା କିଣିବାକୁ ପଡ଼ୋଶୀଙ୍କୁ ଭିକ ମାଗିବାକୁ ପଡ଼ୁଛି। ପିଲାମାନେ କାଳେ ଭୋକ ଓପାସରେ ମରିଯିବେ, ସେ ଭୟ ମନରେ ଚିନ୍ତା ଘାରିଛି ବୋଲି ଜୁମା କହିଛନ୍ତି।
ଜାତିସଂଘର ରିପୋର୍ଟ ଅନୁଯାୟୀ, ଏବେ ଆଫଗାନିସ୍ତାନରେ ପ୍ରତି ଚାରି ଜଣରେ ତିନି ଜଣ ଲୋକ ନିଜର ମୌଳିକ ଆବଶ୍ୟକତା ପୂରଣ କରିବାକୁ ସକ୍ଷମ ନୁହନ୍ତି। ବେକାରି ସମସ୍ୟା ଚରମ ସୀମାରେ ପହଞ୍ଚତ୍ଛି, ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡ଼ିଛି। ଏପରି କି ଏକଦା ଲକ୍ଷ ଲକ୍ଷ ଲୋକଙ୍କୁ ମୌଳିକ ସୁବିଧା ଯୋଗାଉଥିବା ସାହାଯ୍ୟ ଏବେ ମାତ୍ର କିଛି ପ୍ରତିଶତକୁ ଖସି ଆସିଛି। ଦେଶ ଏବେ କ୍ଷୁଧାର ସର୍ବକାଳୀନ ରେକର୍ଡ ସ୍ତରର ସମ୍ମୁଖୀନ ହେଉଛି। ଆଫଗାନିସ୍ତାନର ମୋଟ ଜନ ସଂଖ୍ୟାର ୧୦ ଭାଗରୁ ଅଧିକ ଅର୍ଥାତ୍ ପ୍ରାୟ ୪୭ ଲକ୍ଷ ଲୋକ ଦୁର୍ଭିକ୍ଷର ଅତି ନିକଟତର ବୋଲି ଆକଳନ କରାଯାଇଛି।
ଘୋର ହେଉଛି ସବୁଠାରୁ ଗୁରୁତର ଭାବେ ପ୍ରଭାବିତ ପ୍ରଦେଶଗୁଡ଼ିକ ମଧ୍ୟରୁ ଅନ୍ୟତମ। ଏଠାକାର ପୁରୁଷମାନେ କାମ ଧନ୍ଦା ନ ପାଇଁ କଷ୍ଟରେ ଜୀବନଯାପନ କରୁଛନ୍ତି। ଏପରି କି ପରିବାରର ଅସହାୟ ସ୍ଥିତିକୁ ସହ୍ୟ କରି ନ ପାରି ଅନେକେ ଆତ୍ମହତ୍ୟା ଭଳି ଚରମ ପଦକ୍ଷେପ ନେବାକୁ ପଛାଉନାହାନ୍ତି।
ଏଠାରେ ପୁଅମାନଙ୍କ ଅପେକ୍ଷା ଝିଅମାନଙ୍କୁ ବିକ୍ରି କରିବାକୁ ଅଧିକ ଲୋକ ନିଷ୍ପତ୍ତି ନେଉଛନ୍ତି। ଏହି ନିଷ୍ପତ୍ତି ପଛରେ ସାଂସ୍କୃତିକ କାରଣ ରହିଛି, କାରଣ ଏଠାରେ ପୁଅମାନଙ୍କୁ ଭବିଷ୍ୟତର ରୋଜଗାରିଆ ବୋଲି ମନେକରାଯାଏ। ଆଫଗାନିସ୍ତାନରେ ମହିଳା ଓ ଝିଅମାନଙ୍କ ଶିକ୍ଷା ଏବଂ କାର୍ଯ୍ୟ ଉପରେ ତାଲିବାନ୍ର କଟକଣା ଯୋଗୁ ଏହି ସ୍ଥିତି ଆହୁରି ଗମ୍ଭୀର ହୋଇପଡ଼ିଛି।
Dharitri – Odisha’s No.1 Odia Daily
