ପୁରୁଷୋତ୍ତମପୁର,୬।୧୦(ସବିତା ମିଶ୍ର): ଗଞ୍ଜାମ ଜିଲାର ପ୍ରସିଦ୍ଧ ଇଷ୍ଟଦେବୀ ମା’ ତାରାତାରିଣୀଙ୍କ ମନ୍ଦିର ଦାନହୁଣ୍ଡି ସୋମବାର ଖୋଲାଯାଇଛି । ମନ୍ଦିର ନିର୍ବାହୀ ଅଧିକାରୀ ତଥା ପୁରୁଷୋତ୍ତମପୁର ତହସିଲଦାର ବିନୋଦ କୁମାର ବେହେରାଙ୍କ ତତ୍ତ୍ୱାବଧାନରେ ମନ୍ଦିର ପରିଚାଳନା କମିଟି, ଜିଲା ପ୍ରଶାସନ, ପୋଲିସ ଓ ସେବାୟତଙ୍କ ଉପସ୍ଥିତିରେ ହୁଣ୍ଡି ଖୋଲାଯାଇଥିଲା । ବିଳମ୍ବିତ ରାତି ପର୍ଯ୍ଯନ୍ତ ତହସିଲ କର୍ମଚାରୀମାନେ ଉପସ୍ଥିତ ରହି ଟଙ୍କାର ଗଣତି କରିଥିଲେ।
ଦାନହୁଣ୍ଡିରୁ ସୁନା, ରୁପା ଅଳଙ୍କାର, ବିଦେଶି ମୁଦ୍ରା ସହ ମୋଟ ୨୫ ଲକ୍ଷ ୯୧ ହଜାର ୭୪୩ ଟଙ୍କା ମିଳିଥିବା ଜଣାପଡ଼ିଛି । ମା’ଙ୍କ ଦର୍ଶନ ଓ ଆଶୀର୍ବାଦ ପାଇଁ ଆସୁଥିବା ଭକ୍ତମାନଙ୍କ ଦାନରୁ ଏହି ଅର୍ଥରାଶି ସଂଗୃହୀତ ହୋଇଛି । ହୁଣ୍ଡିକୁ ଖୋଲି ଗଣତିକରିବା ସମୟରେ ମାଜିଷ୍ଟ୍ରେଟ୍ ଦାୟିତ୍ୱରେ ଅତିରିକ୍ତ ତହସିଲଦାର କେ. ଦେବାଶିଷ ମହାପାତ୍ର, ଆଶିଶ କୁମାର ସାହୁ, ପୁରୁଷୋତ୍ତମପୁର ଥାନା ଏସ୍ଆଇ କିରଣ କୁମାର ବକ୍ସି, ସେବାୟତ ବାପୁଜି ରଣାଙ୍କ ସମେତ ପୋଲିସ କର୍ମଚାରୀ ଓ ତହସିଲ କର୍ମଚାରୀମାନେ ଉପସ୍ଥିତ ଥିଲେ।
