ନୂଆଦିଲ୍ଲୀ,୬।୧୦: ଦିଲ୍ଲୀ ସରକାର ACP ବିବେକ ଭଗତଙ୍କୁ ଆଡିସନାଲ DCPର ଚାର୍ଜ ଦେବା ନେଇ ଜାରି ହୋଇଥିବା ଆଦେଶ ଉପରେ ରୋକ ଲଗାଇଛନ୍ତି । ବିବେକ ଭଗତଙ୍କ ଉପରେ ଅକ୍ଟୋବର ୩ ତାରିଖରେ ଜନ୍ତର ମନ୍ତରରେ ଆନ୍ଦୋଳନ ସମୟରେ ଜଣେ ମହିଳା ଖବରଦାତାଙ୍କୁ ଯୌନ ଉତ୍ପୀଡ଼ନର ଅଭିଯୋଗ ରହିଛି। ଏହି ମାମଲାରେ FIR ଦାବି କରି ଗତ ୩ ଦିନ ଧରି ପାର୍ଲାମେଣ୍ଟ ଷ୍ଟ୍ରିଟ୍ ଥାନା ବାହାରେ ପ୍ରତିବାଦ ଚାଲିଛି ।
ଦିଲ୍ଲୀ ସରକାରଙ୍କ କହିବା ଅନୁସାରେ, କେନ୍ଦ୍ରଶାସିତ ଅଞ୍ଚଳର ୧୨ ଜଣ ଅଧିକାରୀଙ୍କୁ ଆଡିସନାଲ DCPର କରେଣ୍ଟ ଡ୍ୟୁଟି ଚାର୍ଜ (CDC) ଦେବା ପ୍ରକ୍ରିୟା ଅଗଷ୍ଟ ୨୫ରୁ ଆରମ୍ଭ ହୋଇଥିଲା। ସରକାର ଦାବି କରିଛନ୍ତି ଯେ ବର୍ତ୍ତମାନର ବିବାଦ ଆରମ୍ଭ ହେବା ପୂର୍ବରୁ ହିଁ ଏହି ପ୍ରକ୍ରିୟା ଚାଲିଥିଲା। ଅକ୍ଟୋବର ୫ରେ ଅନୁମୋଦନ ମିଳିବା ପରେ ଅଧିକାରୀମାନଙ୍କୁ ଚାର୍ଜ ଦେବା ନେଇ ଆଦେଶ ଜାରି ହୋଇଥିଲା।
ତେବେ ବିବାଦ ସାମ୍ନାକୁ ଆସିବା ପରେ ନିଜେ ବିବେକ ଭଗତ କହିଥିଲେ ଯେ ମହିଳା ଖବରଦାତାଙ୍କ ସହ ଜଡ଼ିତ ଉତ୍ପୀଡ଼ନ ଅଭିଯୋଗର ସମ୍ପୂର୍ଣ୍ଣ ତଦନ୍ତ ନହେବା ପର୍ଯ୍ୟନ୍ତ ସେ ଆଡିସନାଲ DCPର ଚାର୍ଜ ନେବାକୁ ଚାହୁଁନାହାନ୍ତି । ଏହାପରେ ସରକାର ପୂର୍ବ ଆଦେଶରେ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛନ୍ତି । ସରକାରଙ୍କ ସୂଚନା ଅନୁସାରେ, ବିବେକ ଭଗତଙ୍କ ମାମଲାରେ ଆଦେଶରେ ପରିବର୍ତ୍ତନ କରାଯିବ। ଅନ୍ୟ ୧୧ ଜଣ ଅଧିକାରୀଙ୍କୁ ଆଡିସନାଲ DCPର CDC ଚାର୍ଜ ଦେବା ନେଇ ଆଦେଶ ପୁଣିଥରେ ଜାରି କରାଯିବ।
ଅଧିକାରୀମାନଙ୍କୁ ଚାର୍ଜ ଦେବା ପ୍ରକ୍ରିୟା ପୂର୍ବରୁ ଚାଲିଆସୁଥିଲା। ତେଣୁ ଏହାକୁ ବର୍ତ୍ତମାନର ବିବାଦ ସହ ଯୋଡ଼ି ଦେଖିବା ଉଚିତ ନୁହେଁ ବୋଲି ସରକାର କହିଛନ୍ତି । ଏହି ବିବାଦ ମଧ୍ୟରେ ଦିଲ୍ଲୀ ପୋଲିସ ଜଣେ ବ୍ୟକ୍ତିଙ୍କୁ ଗିରଫ କରିଛି। AI ସହାୟତାରେ ACP ବିବେକ ଭଗତଙ୍କ ଏକ ଆପତ୍ତିଜନକ ପୋଷ୍ଟର ତିଆରି କରି ତାହାକୁ ସୋସିଆଲ ମିଡିଆରେ ଭାଇରାଲ କରିଥିବା ଅଭିଯୋଗରେ ତାଙ୍କୁ ଗିରଫ କରାଯାଇଛି। ପୋଲିସ ଅନୁସାରେ, AIରେ ତିଆରି ଏହି ପୋଷ୍ଟରରେ ବିବେକ ଭଗତଙ୍କୁ ଜଣେ ମହିଳା ଖବରଦାତାଙ୍କ ସହ ଦୁର୍ବ୍ୟବହାର କରୁଥିବା ଭଳି ଦେଖାଯାଇଥିଲା। ଏହି ପୋଷ୍ଟର ଏକ ଷଡ଼ଯନ୍ତ୍ରର ଅଂଶ ଏବଂ ପରିବେଶ ଖରାପ କରିବା ଉଦ୍ଦେଶ୍ୟରେ ଏହାକୁ ସୋସିଆଲ ମିଡିଆରେ ପ୍ରସାର କରାଯାଇଥିବା ପୋଲିସ ଅଭିଯୋଗ କରିଛି।
ଗିରଫ ଅଭିଯୁକ୍ତଙ୍କୁ କୋର୍ଟରେ ହାଜର କରାଯିବା ପରେ ପୋଲିସ ତାଙ୍କୁ ରିମାଣ୍ଡରେ ନେଇଛି। ପୋଷ୍ଟର ତିଆରି ଓ ଏହାକୁ ସୋସିଆଲ ମିଡିଆରେ ପ୍ରସାର କରିବା ପଛରେ ଆଉ କେଉଁମାନେ ସାମିଲ ଅଛନ୍ତି, ସେନେଇ ପୋଲିସ ତଦନ୍ତ ଜାରି ରଖିଛି।
