ନୂଆପଡ଼ା,୨୦ା୫ (ମକାରୁ ବେମାଲ):ଭାଜପାର ବରିଷ୍ଠ କାର୍ଯ୍ୟକର୍ତ୍ତା ତଥା ଧରମବନ୍ଧା ପଞ୍ଚାୟତର ପୂର୍ବତନ ସରପଞ୍ଚ ଓମ୍ ପ୍ରକାଶ କଲାରଙ୍କ ମଙ୍ଗଳବାର ଅକାଳ ବିୟୋଗ ଘଟିଛି। ତାଙ୍କୁ ୫୨ବର୍ଷ ହୋଇଥିଲା। ସୋମବାର ସକାଳେ ଗାଧୁଆ ଘରେ ପଡ଼ିଯିବାରୁ ତାଙ୍କ ମସ୍ତିଷ୍କରେ ଆଘାତ ଲାଗିଥିଲା। ଗୁରୁତର ଅବସ୍ଥାରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରୁ ବୁର୍ଲା ଓ ପରେ ରାୟପୁରର ଏକ ଘରୋଇ ଚିକତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କର ମୃତ୍ୟୁ ଘଟିଥିଲା। ମୃତଦେହ ଫେରିବା ରାସ୍ତାରେ ଜିଲା ଭାଜପା କାର୍ଯ୍ୟାଳୟରେ କିଛି ସମୟ ରଖାଯାଇଥିଲା। ଏହି ସମୟରେ ଦଳୀୟ କାର୍ଯ୍ୟକର୍ତ୍ତା ଶେଷଦର୍ଶନ ସହିତ ଅଶ୍ରୁଳ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ବରିଷ୍ଠ ନେତୃମଣ୍ଡଳୀ ଭାଜପା ଝଣ୍ଡା ଅର୍ପଣ କରି ଶେଷ ସମ୍ମାନ ଜଣାଇଥିଲେ। ଦିବଙ୍ଗତ ଆତ୍ମାର ସଦ୍ଗତି ନିମନ୍ତେ ଏକ ମିନିଟ ନୀରବ ପ୍ରାର୍ଥନା କରାଯାଇଥିଲା। ସେଠାରୁ ତାଙ୍କ ମରଶରୀର ବାସସ୍ଥାନ ଧରମବନ୍ଧା ଗାଁ ଅଭିମୁଖେ ନିଆଯାଇଥିଲା। ଗାଁରେ ମର ଶରୀର ପହଞ୍ଚତ୍ବା ପରିବାର, ଆତ୍ମୀୟ ସ୍ବଜନ ଶେଷ ଦର୍ଶନ କରିଥିଲେ। ଯୋଙ୍କ ନଦୀ କୂଳରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯାଇଥିଲା।
ଓମ୍ ପ୍ରକାଶ ଭାଜପାର ନୂଆପଡା ବ୍ଲକ ଅଧ୍ୟକ୍ଷ, କିଷାନ ମୋର୍ଚ୍ଚା ଜିଲା ସଭାପତି, ଭାଜପା ଜିଲା ସମ୍ପାଦକ ଭଳି ଦାୟିତ୍ୱ ନିର୍ବାହ କରିଥିଲେ। ଧରମବନ୍ଧା ପଞ୍ଚାୟତର ସରପଞ୍ଚ ଭାବେ ନିର୍ବାଚିତ ହୋଇ ସେ ଅନେକ ବିକାଶମୂଳକ କାମ କରିଛନ୍ତି। ପାର୍ଟି କାର୍ଯ୍ୟାଳୟ ଓ ଅନ୍ତ୍ୟେଷ୍ଟି କ୍ରିୟାରେ ହୋମ ସିଂହ ମାଝୀ, ଯଦୁମଣି ପାଣିଗ୍ରାହୀ, ପ୍ରସନ୍ନ ପାଢ଼ୀ, ମନିଜର ଆର୍ଯ୍ୟ, ଭୈରବ ସାହୁଙ୍କ ସମେତ ବହୁ କାର୍ଯ୍ୟକର୍ତ୍ତା ସାମିଲ ହୋଇଥିଲେ।
Dharitri – Odisha’s No.1 Odia Daily
