ନୂଆଦିଲ୍ଲୀ,୨୭।୬: ଦୌଡ଼ରାଣୀ କୁହାଯାଉଥିବା ପି.ଟି. ଊଷା ତାଙ୍କର ୫୬ତମ ଜନ୍ମଦିବସ ପାଳନ କରିଛନ୍ତି। ଏହି ଅବସରରେ କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କ ସମେତ କ୍ରୀଡ଼ାଜଗତର ତାରକାମାନେ ଅଭିନନ୍ଦନ ଜଣାଇଛନ୍ତି। ଭାରତୀୟ କ୍ରୀଡ଼ାଜଗତକୁ ତାଙ୍କର ଅବଦାନ ଅତୁଳନୀୟ। ଯୁବ ଆଥଲେଟଙ୍କୁ ଟ୍ରେନିଂ ଓ କୋଚିଂ ଦେଉଥିବା ଊଷାଙ୍କ ଜୀବନ ସୁଖମୟ ଓ ଦୀର୍ଘ ହେଉ ବୋଲି ରିଜିଜୁ ଟୁଇଟ୍ କରି ଶୁଭେଚ୍ଛା ଜଣାଇଛନ୍ତି। ସେହିପରି ଭାରତୀୟ କ୍ରିକେଟର ତଥା ପୂର୍ତତନ ଅଲରାଉଣ୍ଡର ଯୁବରାଜ ସିଂ, ଟେବୁଲ ଟେନିସ ତାରକା ଶରଥ କମଲ, ପାରା ଆଥଲେଟ ଦୀପା ମଲିକ, ବ୍ୟାଡମିଣ୍ଟନ ତାରକା ଜ୍ୱାଲା ଗୁଟ୍ଟା, ପାରା ଆଥଲେଟ୍ ପ୍ରମୋଦ ଭଗତ, ଶିବା କେଶବନ ଟୁଇଟ କରି ଅଭିନନ୍ଦନ ଜଣାଇଛନ୍ତି।
ଟ୍ରାକ ଆଣ୍ଡ୍ ଫିଲ୍ଡରେ ଊଷା ଭାରତ ସବୁଠାରୁ ସଫଳତମ ଆଥଲେଟ ବିବେଚିତ ହୁଅନ୍ତି। ଏସିଆନ୍ ଗେମ୍ସରେ ସେ ୧୧ ପଦକ ହାସଲ କରି ଇତିହାସ ସୃଷ୍ଟି କରିଥିଲେ। ୨୦୦୦ରେ ଅବସର ଘୋଷଣା କରିଥିବା ଊଷାଙ୍କୁ ‘ଗୋଲ୍ଡେନ ଗର୍ଲ’ ଓ ‘ଦୌଡ଼ ରାଣୀ’ ରୂପେ ବିବେଚିତ ହୁଅନ୍ତି। ୨୦୦୨ରେ ସେ ଊଷା ସ୍କୁଲ ଅଫ୍ ଆଥଲେଟ୍ସ ସ୍ଥାପନ କରି ଯୁବ ଖେଳାଳିଙ୍କୁ ପ୍ରଶିକ୍ଷଣ ଦେଇ ଆସୁଛନ୍ତି। ୧୯୮୬ ସିଓଲ ଏସିଆନ ଗେମ୍ସ ଭାରତ ୫ଟି ସ୍ବର୍ଣ୍ଣ ପଦକ ହାସଲ କରିଥିଲା। ଏଥିମଧ୍ୟରୁ ଊଷା ଏକା ୪ଟି ସ୍ବର୍ଣ୍ଣ ପଦକ ଜିତିଥିଲେ। ସେ ୨୦୦ମି, ୪୦୦ମି, ୪୦୦ମି ହର୍ଡଲ୍ସ ଓ ୪x୪୦୦ ରିଲେରେ ସ୍ବର୍ଣ୍ଣ ପଦକ ହାସଲ କରିଥିଲେ।
