କଥାରେ ଅଛି ପ୍ରେମ ଅନ୍ଧ। ପ୍ରେମରେ ପଡ଼ିଥିବା ମଣିଷ ସାଥୀଙ୍କୁ ପାଇବା ପାଇଁ କିଛି ବି କରିପାରେ। ସେଭଳି ଏକ ଅଜବ ପ୍ରେମର ଗଜବ କାହାଣୀ ଦେଖିବାକୁ ମିଳିଛି ବିହାରର ଛପରା ଅଞ୍ଚଳରେ। ଏଠାରେ ଜଣେ ପ୍ରେମିକ ପ୍ରେମିକାଙ୍କୁ ପାଇବା ଜିଦ୍ରେ ତାଙ୍କର ଦୁଇଥର ବିବାହ ଭାଙ୍ଗିଦେଇଛନ୍ତି। ଚକିତ କଲେ ବି କଥାଟି ସତ।
ଛପରାର ପାନାପୁର ଥାନା ଅଞ୍ଚଳର ନୀରଜ ମଶରକ ଥାନା ଅନ୍ତର୍ଗତ ହଂସପୀର ଗାଁର ବବିତାଙ୍କୁ ପ୍ରେମ କରୁଥିଲେ। ହେଲେ ବବିତାଙ୍କ ଇଚ୍ଛା ବ୍ୟତିରେକ ପରିବାରଲୋକେ ତାଙ୍କ ବିବାହ ମଶରକରେ ରହୁଥିବା ଅନ୍ୟ ଏକ ଯୁବକ ସହ କରିଦେଇଥିଲେ। ଏହି ଖବର ନୀରଜ ପାଇବା ପରେ ତାଙ୍କ ଉପରେ ଚଡ଼କ ପଡ଼ିଯାଇଥିଲା। ସେ ସିଧା ଯାଇ ପ୍ରେମିକାଙ୍କ ଶାଶୁଘରେ ପହଞ୍ଚିଯାଇଥିଲେ। ଏହାକୁ ନେଇ ବବିତାଙ୍କ ଦାମ୍ପତ୍ୟ ଜୀବନରେ ଝଡ଼ ସୃଷ୍ଟି ହୋଇଥିଲା। ପରେ ବବିତାଙ୍କୁ ଶାଶୁଘର ଲୋକେ ବାହାର କରିଦେଇଥିଲେ।
ପ୍ରଥମ ବିବାହ ଭାଙ୍ଗିବା ପରେ ବବିତାଙ୍କ ବାପା ତାଙ୍କ ବିବାହ ପ୍ରେମିକଙ୍କ ସହ କରିବାକୁ ରାଜି ହୋଇଯାଇଥିଲେ। ମାତ୍ର ଅଡ଼ୁଆ ହୋଇଥିଲେ ନୀରଜଙ୍କ ବାପା। ସେ ଯୌତୁକରେ ୨ ଲକ୍ଷ ଟଙ୍କା ମାଗିଥିଲେ। ବବିତାଙ୍କ ବାପା ଦେବାକୁ ଅସମର୍ଥ ଥିବାରୁ ବିବାହ ହୋଇପାରି ନ ଥିଲା। ଶେଷରେ ସେ ଝିଅର ଦ୍ୱିତୀୟ ବିବାହ ଗୋପାଳଗଞ୍ଜ ଜିଲାର ବୈକୁଣ୍ଠପୁର ଥାନା ଅଞ୍ଚଳର ଜଗଦୀଶପୁର ଗ୍ରାମର ଜଣେ ଯୁବକଙ୍କ ସହ କରାଇଥିଲେ। ହେଲେ ସେଠାରେ ମଧ୍ୟ ପହଞ୍ଚି ଯାଇଥିଲେ ନୀରଜ। ରାଗରେ ଲାଲ ପଡ଼ି ସେ ବବିତାଙ୍କ ସ୍ବାମୀଙ୍କୁ ଜୀବନରୁ ମାରିଦେବାକୁ ଧମକ ଦେଇଥିଲେ। ଫଳରେ ସେଠାରୁ ମଧ୍ୟ ବବିତାଙ୍କୁ ବାହାର କରିଦିଆଯାଇଥିଲା। ଦୁଇ ଦୁଇଟି ବିବାହ ତାଙ୍କର ପ୍ରେମିକଙ୍କ ଯୋଗୁ ଭାଙ୍ଗି ଯାଇଥିଲା।
ବବିତା ବାପାଙ୍କ ଘରେ ପୁଣି ପହଞ୍ଚିଥିଲେ। ତାଙ୍କୁ ବାପା ଅନ୍ୟୋପାୟ ନ ପାଇ ସାଙ୍ଗରେ ନେଇ ନୀରଜଙ୍କ ଗାଁରେ ପହଞ୍ଚିଥିଲେ। ସେଠାରେ ପଞ୍ଚାୟତ ଡ଼କାଯିବା ପରେ ନୀରଜ ତାଙ୍କୁ ବିବାହ କରିବାକୁ ରାଜି ହୋଇଥିଲେ। ଏହାପରେ ଉଭୟଙ୍କ ବିବାହ କରାଯାଇଛି। ଏକ ମନ୍ଦିରରେ ଗାଁଲୋକଙ୍କ ଉପସ୍ଥିତିରେ ଏହି ପ୍ରେମୀଯୁଗଳ ଏକ ହୋଇଛନ୍ତି। ତେବେ ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
