କେସିଙ୍ଗା,୧୨।୧(ତୁମେଶ୍ୱର ସାହୁ):କଳାହାଣ୍ଡି ଜିଲା କେସିଙ୍ଗା ପଞ୍ଚାୟତ ସମିତି ପକ୍ଷରୁ ୨୭ତମ
କଳାହାଣ୍ଡି ଉତ୍ସବ ଘୁମୁରା ୨୦୨୫ ଉଦଯାପିତ ହୋଇ ଯାଇଛି। ଏହି ଉପଲକ୍ଷେ ସ୍ଥାନୀୟ ବୁଢାଡଙ୍ଗର ମନ୍ଦିରରେ
ପୂଜାର୍ଚ୍ଚନା ପରେ ବ୍ଳକ ଅଧ୍ୟକ୍ଷ ଚନ୍ଦନ ସେନାପତି ଏକ ମଶାଲ ଧରି ସହର ପରିକ୍ରମା କରି ସରକାରୀ ଉଚ୍ଚ ବିଦ୍ୟାଳୟ ସ୍ଥିତ ଖେଳପଡ଼ିଆରେ ନିର୍ମିତ ବୁଢ଼ାରାଜା ମଞ୍ଚରେ ମଶାଲ ସ୍ଥାପନ କରିଥିଲେ।
ଏହି ଶୋଭାଯାତ୍ରାରେ ଗୋଷ୍ଠୀ ଉନ୍ନୟନ ଅଧିକାରୀ ସିଦ୍ଧେଶ୍ବର ମେହେର, ସିଡିପିଓ ସୁଷମା ମିଶ୍ରଙ୍କ ସମେତ ବ୍ଲକ କର୍ମଚାରୀ ଓ ସମିତି ସଭ୍ୟ/ସଭ୍ୟା, ସରପଞ୍ଚ, ବହୁ ମହିଳା ସ୍ବୟଂ ଗୋଷ୍ଠୀ, ଏମ.ବି.କେ.ପ୍ରମୁଖ ଯୋଗଦାନ କରିଥିଲେ। ଏହି ବୁଢ଼ାରାଜା ମଞ୍ଚରେ ଆନନ୍ଦ ଉଲ୍ଲାସରେ ବ୍ଲକ ଜେଇ, ହିସାବ ରକ୍ଷକ ଅଧୂକାରୀ ପ୍ରମୁଖ ସମ୍ବଲପୁରୀ ଗୀତ ଓ ବାଦ୍ୟର ତାଳେ ତାଳେ ନାଚି ଉଠିଥିଲେ। ଏହି ଉପଲକ୍ଷେ ବିଭିନ୍ନ ଲୋକ ନୃତ୍ୟ, ଲୋକଗୀତ ଇତ୍ୟାଦି ଅନୁଷ୍ଠିତ ହୋଇଥିଲା।
ଉତ୍ସବର ପ୍ରଥମ ଅଧିବେଶନରେ ଭବାନୀପାଟଣା ବିଧାୟକ ସାଗର ଚରଣ ଦାସ, ଜିଲା ପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର ସିଂ ଦେଓ, ବ୍ଲକ ଶିକ୍ଷା ଅଧିକାରୀ ଆନନ୍ଦ କୁମାର ବେହେରା, ସିଡ଼ିପିଓ ଶ୍ରୀମତୀ ମିଶ୍ର ପ୍ରମୁଖ ମଞ୍ଚାସୀନ ଥିଲେ। ଏହି ଅବସରରେ ସ୍ଥାନୀୟ ସ୍କୁଲର ଛାତ୍ରୀଛାତ୍ରୀଙ୍କ ଦ୍ବାରା ନାଚ, ଗୀତ ସହ ବିଭିନ୍ନ ପ୍ରତିଯୋଗୀତା ଅନୁଷ୍ଠିତ ହୋଇଥିଲା। ସନ୍ଧ୍ୟା ଅଧୂବେଶନରେ ପ୍ରଥମେ ଯାଦୁକର ପୋଲିସ ଏଏସଆଇ ବିନୟ କୁମାର ଶତପଥୀଙ୍କ ବିଭିନ୍ନ ଯାଦୁ ପ୍ରଦର୍ଶନରେ ଉପସ୍ଥିତ ଅତିଥି ଓ ଦର୍ଶକମାନେ ବିମୋହିତ ହୋଇ କରତାଳିରେ ଉତ୍ସବ ସୁଳକୁ ମୁଖରିତ ହୋଇଯାଇଥିଲା। ଏହାର ପରେ ପରେ ଉତ୍ସବର ସଭାପତି ତଥା ବ୍ଲକ ଅଧ୍ୟକ୍ଷ ଚନ୍ଦନ ସେନାପତିଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ବିଶିଷ୍ଟ ଅତିଥ ଭାବେ ଭୂପିନ୍ଦର, ସମ୍ମାନିତ ଅତିଥି ରୂପେ ଧର୍ମଗଡ ବିଧାୟକ ସୁଧୀର ରଞ୍ଜନ ପାଟ୍ଟଯୋଶୀ, ଜିଲା ପରିଷଦ ମୁଖ୍ୟ ନିର୍ବାହୀ ଅଧିକାରୀ ଦୟାମୟ ପାଢ଼ୀ, ଅବସରପ୍ରାପ୍ତ ବିଡ଼ିଓ ପଦ୍ମନାଭ ପୁରୋହିତ, ଏ.ଏ.ସି ଅଧ୍ୟକ୍ଷ ନୃପରାଜ ଯାଦବ, ଉତ୍ସବର ସମ୍ପାଦକ ତଥା ବିଡ଼ିଓ ସିଦ୍ଧେଶ୍ବର ମେହେର ପ୍ରମୁଖ ମଞ୍ଚାସୀନ ଥିଲେ।
ନିମନ୍ତ୍ରିତ ଅତିଥିମାନେ ଇଷ୍ଟଦେବୀଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ ଓ ଧୂପଦୀପ ପ୍ରଜ୍ବଳନ ପରେ ସରସ୍ବତୀ ବିଦ୍ୟାଳୟ ମନ୍ଦିରର ଛାତ୍ରୀମାନେ ସ୍ବାଗତ ଗାନ ପରିବେଷଣ କରିଥିବା ବେଳେ ବିଡ଼ିଓ ଶ୍ରୀ ମେହେର ସ୍ବାଗତ ଭାଷଣ ଦେଇଥିଲେ। ନିମନ୍ତ୍ରିତ ଅତିଥିମାନେ କଳାହାଣ୍ଡି ଉତ୍ସବ ଘୁମୁରା ଲୋକକଳାର ମହତ୍ତ୍ବ ବିଷୟରେ ପ୍ରତିପାଦିତ କରିଥିଲେ। ସଭା ଶେଷ ପର୍ଯ୍ୟାୟରେ ନିମନ୍ତ୍ରିତ ଅତିଥିମାନେ କୃତୀ ପ୍ରତିଯୋଗୀ ମାନଙ୍କୁ ପୁରସ୍କାର ବିତରଣ କରିଥିଲେ। ଶେଷରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମମାନ ପରିବେଷଣ କରାଯାଇଥିଲା। ଏହି କାର୍ଯ୍ୟକ୍ରମ ପରିଚାଳନାରେ ବ୍ଲକର ସମସ୍ତ କର୍ମଚାରୀମାନେ ସହଯୋଗ କରିଥିଲେ। ଜ୍ଞାନେନ୍ଦ୍ର ଭୋଇ ମଞ୍ଚ ପରିଚାଳନା କରିଥିଲେ ।
