ନୂଆଦିଲ୍ଲୀ, ୧୧।୭- ଭାରତୀୟ କ୍ରିକେଟ୍ରେ ଲିଟିଲ୍ ମାଷ୍ଟର ଭାବେ ପରିଚିତ ପୂର୍ବତନ ଅଧିନାୟକ ସୁନୀଲ ଗାଭାସ୍କର ନିକଟରେ ତାଙ୍କ ୭୧ତମ ଜନ୍ମଦିବସ ପାଳନ କରିଛନ୍ତି। ମାତ୍ର ୨୨ ବର୍ଷ ବୟସରେ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିବା ଗାଭାସ୍କର ବିଶ୍ୱର ପ୍ରଥମ ବ୍ୟାଟ୍ସମ୍ୟାନ ଭାବେ ଟେଷ୍ଟ କ୍ରିକେଟ୍ରେ ୧୦ ହଜାର ରନ୍ ସଂଗ୍ରହ କରିବାର ସୌଭାଗ୍ୟ ଲାଭ କରିଥିଲେ। ନିଜର ପଦାର୍ପଣ ଟେଷ୍ଟ ମ୍ୟାଚ୍ରେ ଗାଭାସ୍କର ଓ୍ବେଷ୍ଟଇଣ୍ଡିଜ ବିପକ୍ଷରେ ଯଥାକ୍ରମେ ୬୫ ଓ ୬୭* ରନ୍ ସଂଗ୍ରହ କରିଥିଲେ। ବର୍ତ୍ତମାନ କ୍ରିକେଟ୍ ଭାଷ୍ୟକାର ଭାବେ ବେଶ୍ ଖ୍ୟାତି ଅର୍ଜନ କରିସାରିଥିବା ଗାଭାସ୍କରଙ୍କ କ୍ୟାରିୟରକୁ ନେଇ ଏକ ମଜାଳିଆ କାହାଣୀ ରହିଛି। ଯାହାକୁ ହୁଏତ ଅନେକ ଜାଣି ନ ଥିବେ। ଏକଦା ମ୍ୟାଚ୍ ସମୟରେ ଗାଭାସ୍କର ଅମ୍ପାୟରଙ୍କ ସହାୟତାରେ ନିଜ ଚୁଟି କାଟିଥିଲେ। ୧୯୭୪ରେ ଭାରତ ଓ ଘରୋଇ ଇଂଲଣ୍ଡ ମଧ୍ୟରେ ଓଲ୍ଡ ଟ୍ରାଫୋର୍ଡରେ ଖେଳାଯାଇଥିବା ଟେଷ୍ଟ ମ୍ୟାଚ୍ରେ ଏହି ଘଟଣା ଘଟିଥିଲା। ଯେତେବେଳେ ଗାଭାସ୍କର ବ୍ୟାଟିଂ କରୁଥିଲେ ତାଙ୍କ ଚୁଟି ବାରମ୍ବାର ଆଖି ଉପରେ ଆସି ପଡ଼ୁଥିଲା। ଫଳରେ ବାଧ୍ୟ ହୋଇ ଅମ୍ପାୟରଙ୍କୁ ଚୁଟି କାଟିବା ପାଇଁ ଗାଭାସ୍କର ଅନୁରୋଧ କରିଥିଲେ। ଏହାପରେ ଫିଲ୍ଡ ଅମ୍ପାୟର ଡିକି ବାର୍ଡ ପଡ଼ିଆ ମଧ୍ୟରେ କଇଁଚି ସହାୟତାରେ ଗାଭାସ୍କାରଙ୍କ ସାମ୍ନା ପଟର କିଛି ଚୁଟି କାଟିଥିଲେ। ସାଧାରଣତଃ ବଲରୁ ବାହାରୁ ଥିବା ସୂତାକୁ କାଟିବା ପାଇଁ ଅମ୍ପାୟରମାନେ ମ୍ୟାଚ୍ ସମୟରେ ନିଜ ପାଖରେ କଇଁଚି ରଖିଥାନ୍ତି। ଏହି ମ୍ୟାଚ୍ର ଉଭୟ ଇନିଂସରେ ଗାଭାସ୍କର ଦମ୍ଦାର ବ୍ୟାଟିଂ କରି ଯଥାକ୍ରମେ ୧୦୧ ଓ ୫୮ ରନ ସଂଗ୍ରହ କରିଥିଲେ। ଭାରତ କିନ୍ତୁ ଏହି ମ୍ୟାଚରେ ପରାଜୟବରଣ କରିଥିଲା।
