ଛତ୍ରପୁର,୧୯।୭(ଦିଲ୍ଲୀପ ସାମଲ) : ପରିବାରର କେହି ଜଣେ ଆତ୍ମୀୟଙ୍କ ମୃତ୍ୟୁ ଘଟିଲେ ଶୋକାକୁଳ ପରିବେଶ ଖେଳିଯାଏ । ଦୂର ସହରରେ ରହୁଥିବା ଝିଅ କିମ୍ବା ପୁଅର ଅପେକ୍ଷା ରହିଥାଏ ଯେ ସେମାନେ ଆସିଲେ ଶେଷ ଦର୍ଶନ କରିପାରିବେ। ତେବେ ଆବଶ୍ୟକ ହୁଏ ଗୋଟିଏ ମର୍ଚୁରୀ ବକ୍ସ ବା ଶବ ଫ୍ରିଜର ବାକ୍ସ। କିନ୍ତୁ ଏହି ବ୍ୟବସ୍ଥାରୁ ବଞ୍ଚିତ ହେଉଛନ୍ତି ସ୍ଥାନୀୟ ଉପଖଣ୍ଡ ଚିକିତ୍ସାଳୟକୁ ଆସିଥିବା ସାଧାରଣ ଗରୀବ ଶ୍ରେଣୀର ଲୋକ। କାରଣ ଏଠାରେ ସେହି ଉପକରଣ ଥିଲେ ହେଁ ଥରୁଟିଏ ବ୍ୟବହାର ହୋଇନାହିଁ ବୋଲି ଚିକିତ୍ସାଳୟକୁ ଆସୁଥିବା ଲୋକ ଅଭିଯୋଗ କରିଛନ୍ତି।
ଉଚ୍ଚ ଆୟ ଶ୍ରେଣୀର ଲୋକମାନେ ଘରୋଇ ସଂସ୍ଥା ଦ୍ଵାରା ଯୋଗାଇ ଦେଉଥିବା ମର୍ଚୁରୀ ବକ୍ସକୁ ଭଡ଼ାରେ ନେଇପାରୁଛନ୍ତି। କିନ୍ତୁ ଏହି ସୁବିଧା ପାଇବାକୁ ହେଲେ ମଧ୍ୟବିତ୍ତ କିମ୍ବା ଗରୀବ ଶ୍ରେଣୀର ଲୋକଙ୍କ ପାଖରେ ଆର୍ଥିକ ସାମର୍ଥ୍ୟ ନଥାଏ। ସରକାରୀ ଉପଖଣ୍ଡ ଚିକିତ୍ସାଳୟ ଭଳି ସ୍ଥାନରେ ଥାଇ ବି ପ୍ରକୃତ ଉପଯୋଗକାରୀ ଏହାର ସୁଯୋଗ ନେଇ ପାରୁନାହାଁନ୍ତି ବୋଲି ସେମାନେ ଦୁଃଖ ପ୍ରକାଶ କରିଛନ୍ତି। କୋଭିଡ୍ ସମୟରେ ଉପଖଣ୍ଡ ଚିକିତ୍ସାଳୟକୁ ଲକ୍ଷ ଲକ୍ଷ ଟଙ୍କା ବ୍ୟୟରେ ଅଣାଯାଇଥିବା ଦୁଇଟି ବକ୍ସ ସେମିତି ବିନା ବ୍ୟବହାର ହୋଇ ବାହାରେ ପଡ଼ିରହିଥିବା ଦେଖିବାକୁ ମିଳିଛି । ଫଳରେ ପ୍ରବଳ ଖରା, ବର୍ଷା ଭଳି ପ୍ରତିକୂଳ ପାଣିପାଗରେ ଏହା ସବୁ ନଷ୍ଟ ହୋଇଯାଇଛି ଏବଂ ଆଉ କାର୍ଯ୍ୟକାରି ଅବସ୍ଥାରେ ନାହିଁ ବୋଲି ଜଣା ପଡ଼ିଛି।
ସରକାରୀ ଟଙ୍କା ଖର୍ଚ୍ଚ ହୋଇ କାହା ସ୍ୱାର୍ଥରେ ବ୍ୟବହାର ହେଉନାହିଁ ବୋଲି ଜନସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ମହଙ୍ଗା ଉପକରଣ କିଣି ତାକୁ ଖୋଲା ଆକାଶ ତଳେ ଛାଡ଼ିଦେଇ ତାହା ଉପରେ ଦୃଷ୍ଟ ନଦେବା ଚିକିତ୍ସାଳୟର ପରିଚାଳନା ଉପରେ ମଧ୍ୟ ବୁଦ୍ଧିଜୀବୀ ପ୍ରଶ୍ନ ଉଠାଇଛନ୍ତି। ‘ସରକାର କା ମାଲ୍ ଦରିଆ ମେ ଡାଲ୍’ ବୋଲି କହି ଲୋକେ ପରିହାସ କରୁଥିବା ପରିଲକ୍ଷିତ ହୋଇଛି। ଏହିପରି ବହୁମୂଲ୍ୟ ଉପକରଣ ଉପରେ ବିଶେଷ ଗୁରୁତ୍ଵ ଏବଂ ଧ୍ୟାନ ଦେବା ସହ କର୍ତ୍ତୃପକ୍ଷଙ୍କ ଅବହେଳା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସର୍ବସାଧାରଣ ଦାବି କରିଛନ୍ତି।
