ଭବାନୀପାଟଣା,୧୬ା୧୧(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଜୁନାଗଡ଼ ବ୍ଲକ ଜାରିଙ୍ଗ ସିଲଭି କଲଚର ହାଇଟେକ ନର୍ସରୀର ଫରେଷ୍ଟର ସଞ୍ଜୟ ନାୟକ(୩୩)ଙ୍କ ଆତ୍ମହତ୍ୟା ଘଟଣା ଇତିମଧ୍ୟରେ ୨ମାସ ପୂରିଛି। ଏହି ଘଟଣାରେ ଛନ୍ଦି ହୋଇଥିବା ରାୟଗଡ଼ା ଡିଏଫ୍ଓ (ରିସର୍ଚ୍ଚ ଉଇଙ୍ଗ) ଦେବେନ୍ଦ୍ର ବେହେରାଙ୍କୁ ହାଇକାର୍ଟରୁ ମିଳିଥିବା ଅନ୍ତରୀଣ ସର୍ତ୍ତମୂଳକ ସୁରକ୍ଷା ଅବଧି ଗତ ୧୧ତାରିଖରେ ଶେଷ ହୋଇଛି।
ଘଟଣାର ତଦନ୍ତ କରୁଥିବା କଳାହାଣ୍ଡି ଜିଲା ଭବାନୀପାଟଣା ଟାଉନ ପୋଲିସ ପକ୍ଷରୁ ହାଇକୋର୍ଟରେ ଏହି ମାମଲାର ସମସ୍ତ କେସ ଡାଇରି ହସ୍ତାନ୍ତର କରାଯାଇଛି। ଏହାର ଟିକନିଖ ଯାଞ୍ଚ ପରେ କୋର୍ଟ ଶୁଣାଣି କରିବେ ବୋଲି ଜଣାଯାଇଛି। ଅନ୍ୟପକ୍ଷରେ ଫରେଷ୍ଟର ସଞ୍ଜୟ ନାୟକଙ୍କ ଆତ୍ମହତ୍ୟା ମାମଲାର ତଦନ୍ତ କରୁଥିବା ଭବାନୀପାଟଣା ସଦର ଏସ୍ଡିପିଓ ସୁନାରାମ ହେମ୍ବ୍ରମ ପଦୋନ୍ନତି ପାଇ ଭୁବନେଶର କମିଶନରେଟ ପୋଲିସକୁ ବଦଳି ହୋଇଛି। ସେହିପରି ତଦନ୍ତ ଅଧିକାରୀ (ଆଇଓ) ସବ୍ଇନ୍ସପେକ୍ଟର ତପନ କାଲୋଙ୍କ ମଧ୍ୟ ଜିଲାସ୍ତରୀୟ ବଦଳିରେ ଜୁନାଗଡ଼ ଥାନାକୁ ବଦଳି ହୋଇଛି। ଫଳରେ ମାମଲାର ତଦନ୍ତ ଭବାନୀପାଟଣା ଟାଉନ ଥାନା ଅଧିକାରୀ ଯଶୋବନ୍ତ ହିଆଲ କରିବେ ବୋଲି ଏସ୍ଡିପିଓ ହେମ୍ବ୍ରମ ପ୍ରକାଶ କରିଛନ୍ତି।
ପ୍ରକାଶ ଯେ, ଗତ ସେପ୍ଟେମ୍ବର ୧୮ରେ ଫରେଷ୍ଟର ସଞ୍ଜୟ ନାୟକଙ୍କ ଝୁଲନ୍ତା ମୃତଦେହ ତାଙ୍କ ଭବାନୀପାଟଣାସ୍ଥିତ ସରକାରୀ କ୍ୱାର୍ଟର୍ସରୁ ପୋଲିସ ଜବତ କରିଥିଲା। ଘଟଣାସ୍ଥଳରୁ ସଞ୍ଜୟଙ୍କ ହାତଲେଖା ସୁଇସାଇଡ ନୋଟ୍ ଜବତ ହୋଇଥିଲା। ଏଥିରେ ବିଭାଗୀୟ ଡିଏଫ୍ଓ ଦେବେନ୍ଦ୍ର ବେହେରାଙ୍କ ବାରମ୍ବାର ଚାପ ଓ ମାନସିକ ନିର୍ଯାତନା ଯୋଗୁ ଆତ୍ମହତ୍ୟା କରିଥିବା ସ୍ପଷ୍ଟ ଉଲ୍ଲେଖ କରିଥିଲେ। ସଞ୍ଜୟଙ୍କ ପରିବାର ଲୋକେ ଏ ସଂକ୍ରାନ୍ତରେ ଭବାନୀପାଟଣା ଟାଉନ ଥାନାରେ ଲିଖିତ ଅଭିଯୋଗ ମଧ୍ୟ କରିଥିଲେ। ଘଟଣା ପରଠାରୁ ଡିଏଫ୍ଓ ଫେରାର ରହିଥିଲେ। ପ୍ରାୟ ୧୭ଦିନ ପରେ ହାଇକୋର୍ଟଙ୍କ ଅନ୍ତରୀଣ ସର୍ତ୍ତମୂଳକ ସୁରକ୍ଷା ନେଇ କୋର୍ଟଙ୍କ ନିର୍ଦ୍ଦେଶରେ ସେ ଗତ ଅକ୍ଟୋବର ୪ରେ ଭବାନୀପାଟଣା ଟାଉନ ଥାନାରେ ହାଜର ହୋଇଥିଲେ। ପୋଲିସ ପକ୍ଷରୁ ଦୁଇଦିନ ଧରି ମାରାଥନ ଜେରା କରାଯାଇଥିଲା। ସେହିପରି ଏହି ଘଟଣାରେ ରାଜ୍ୟ ଜଙ୍ଗଲ, ପରିବେଶ ଓ ଜଳବାୟୁ ବିଭାଗ ପକ୍ଷରୁ ଅକ୍ଟୋବର ୫ ତାରିଖରେ ତାଙ୍କୁ ନିଲମ୍ବିତ କରାଯାଇଥିଲା।
