ଭୁବନେଶ୍ୱର, ୧୭।୯(କ୍ରୀଡ଼ା ପ୍ରତିନିଧି)- ହାଇ ପ୍ରୋଫାଇଲ ଇଂଲିଶ୍ କ୍ଲବ ନ୍ୟୁକାଷ୍ଟଲ ୟୁନାଇଟେଡର ପୂର୍ବତନ ତାରକା ଖେଳାଳି ଷ୍ଟିଭେନ ଟେଲର ଇଣ୍ଡିଆନ ସୁପର ଲିଗ୍(ଆଇଏସଏଲ)ର ଆଗାମୀ ସିଜନରେ ଓଡ଼ିଶା ଏଫସି ପକ୍ଷରୁ ଖେଳିବେ। ଭୁବନେଶ୍ୱର ଭିତ୍ତିକ ଫ୍ରାଞ୍ଚାଇଜ୍ ଟେଲରଙ୍କ ସହିତ ଏକ ବର୍ଷିଆ ଚୁକ୍ତି କରିଛି। ଆଉ ଏକ ବର୍ଷ ଚୁକ୍ତି ବୃଦ୍ଧି କରିବାର ମଧ୍ୟ ବିକଳ୍ପ ରହିଛି। ନ୍ୟୁକାଷ୍ଟଲ ୟୁନାଇଟେଡ ପକ୍ଷରୁ ୨୦୦୩-୦୪ ସିଜନରେ ସିନିୟର କ୍ଲବ କ୍ୟାରିୟର ଆରମ୍ଭ କରିଥିଲେ ୩୪ ବର୍ଷୀୟ ଟେଲର। ଏହି ସେଣ୍ଟର ବ୍ୟାକ୍ ଏକଦଶନ୍ଧୀରୁ ଊର୍ଦ୍ଧ୍ୱ ପ୍ରିମିୟର ଲିଗ୍ରେ ଖେଳିଥିଲେ। ପରେ ସେ ଆମେରିକାନ ପ୍ରଫେଶନାଲ କ୍ଲବ ପୋର୍ଟଲ୍ୟାଣ୍ଡ ଟିମ୍ବର୍ସକୁ ୨୦୧୬ରେ ଯାଇଥିଲେ। ଲଣ୍ଡନ ଜନ୍ମିତ ଏହି ଫୁଟବଲର ଇଂଲଣ୍ଡ ‘ବି’ ଏବଂ ଅନ୍ୟ ଇଂଲିଶ୍ କ୍ଲବ ଓ୍ବେକମ୍ବ ଓ୍ବାଣ୍ଡରର୍ସ ଏଫସି, ଇପ୍ସ୍ବିଚ୍ ଟାଉନ୍ ଏଫସି ଏବଂ ପିଟରବର୍ଗ ୟୁନାଇଟେଡ ଏଫସି ପକ୍ଷରୁ ପ୍ରତିନିଧିତ୍ୱ କରିଥିଲେ। ଇଂଲଣ୍ଡ ପକ୍ଷରୁ ସେ ୧୬, ୧୭, ୨୦ ଓ ୨୧ ବର୍ଷରୁ କମ୍ ଦଳରେ ବିଭିନ୍ନ ବୟସବର୍ଗ ଟୁର୍ନାମେଣ୍ଟରେ ଖେଳିଥିଲେ। ଓଡ଼ିଶା ଏଫସିରେ ଯୋଗଦେବା ପୂର୍ବରୁ ଟେଲର ନ୍ୟୁଜିଲାଣ୍ଡର ଓ୍ବେଲିଂଟନ ଫୋନିକ୍ସ ଏଫସିର ଅଧିନାୟକ ଥିଲେ। ଏହି ଦଳ ଅଷ୍ଟ୍ରେଲିଆନ ‘ଏ’ ଲିଗ୍ରେ ପ୍ରତିଦ୍ୱନ୍ଦ୍ୱିତା କରିଥିଲା। ତାଙ୍କ ଦୃଢ଼ ରକ୍ଷଣଭାଗ ଯୋଗୁ ଓ୍ବେଲିଂଟନ ଏଫସି ଗତ ସିଜନ ପ୍ରତିଯୋଗିତାରେ ତୃତୀୟ ସ୍ଥାନ ଅଧିକାର କରିଥିଲା। ଅଷ୍ଟ୍ରେଲିଆନ ‘ଏ’ ଲିଗ୍ରେ ସେ ଗତ ୨ ସିଜନରେ ୪୯ ଗେମ୍ ଖେଳିଥିଲେ।
ଟେଲରଙ୍କ ସଫଳତା ତାଙ୍କ ସମ୍ପର୍କରେ ଅନେକ କିଛିକୁ ସୂଚାଉଛି ବୋଲି ଓଡ଼ିଶା ଏଫସି ମୁଖ୍ୟ କୋଚ୍ ଷ୍ଟୁଆର୍ଟ ବକ୍ସଟର ପ୍ରକାଶ କରିଛନ୍ତି। ତାଙ୍କ ନେତୃତ୍ୱ ନେବାର ଦକ୍ଷତା ଆମ ଯୁବ ଦଳ ପାଇଁ ବେଶ୍ ଉପାଦେୟ ହେବ। ସେ ଜଣେ ବିଚକ୍ଷଣ ଡିଫେଣ୍ଡର। ତାଙ୍କ ଉପସ୍ଥିତିରେ ଦଳର ଶକ୍ତି ବୃଦ୍ଧି ପାଇଛି“ ବୋଲି ବକ୍ସଟର କହିଛନ୍ତି। ଅନ୍ୟପକ୍ଷରେ ନୂଆ ଚୁକ୍ତିରେ ଖୁସି ଜାହିର କରିବା ସହ ତାଙ୍କ ଅଭିଜ୍ଞତା ଓ ନେତୃତ୍ୱ ନେବାର ଦକ୍ଷତା ଦଳପାଇଁ ଉପାଦେୟ ହେବ ବୋଲି ଆଶା ପ୍ରକାଶ କରିଛନ୍ତି ଟେଲର। ଯୁବ ଭାରତୀୟ ଖେଳାଳିଙ୍କ ସହିତ ମିଶିବା ପାଇଁ ସେ ବ୍ୟଗ୍ର ଏବଂ ବକ୍ସଟରଙ୍କ ଅଧିନରେ କାମ କରିବାକୁ ଯାଉଥିବାରୁ ଖୁସି ବୋଲି କହିଛନ୍ତି। ଓଡ଼ିଶା ଏଫସି ପାଇଁ ଆଗାମୀ ଟୁର୍ନାମେଣ୍ଟକୁ ସ୍ମରଣୀୟ କରିବା ତାଙ୍କ ଇଚ୍ଛା ବୋଲି ଟେଲର ପ୍ରsକାଶ କରିଛନ୍ତି।
