ନୂଆଦିଲ୍ଲୀ,୨।୩ : ହିଣ୍ଡେନବର୍ଗ ରିପୋର୍ଟ ପ୍ରସଙ୍ଗରେ ସୁପ୍ରିମକୋର୍ଟ ଏକ ବିଶେଷଜ୍ଞ କମିଟି ଗଠନ କରିଛନ୍ତି। ଅବସରପ୍ରାପ୍ତ ବିଚାରପତି ଜଷ୍ଟିସ ଏଏମ ସାପ୍ରେ ଏହି କମିଟିର ଅଧ୍ୟକ୍ଷ ହେବେ। ନିବେଶକଙ୍କ ସୁରକ୍ଷା ପାଇଁ ନିୟାମକ ପ୍ରଣାଳୀ ଉପରେ ଏକ କମିଟି ଗଠନ ଉପରେ ହିଣ୍ଡନବର୍ଗ ରିପୋର୍ଟ ସହ ଜଡିତ ଆବେଦନ ଉପରେ ସୁପ୍ରିମକୋର୍ଟ ଶୁଣାଣି ସମୟରେ ଏହା କହିଛନ୍ତି।
ସୁପ୍ରିମକୋର୍ଟ କହିଛନ୍ତି ଯେ କମିଟି ପରିସ୍ଥିତିର ସାମଗ୍ରିକ ମୂଲ୍ୟାଙ୍କନ କରିବ ଏବଂ ନିବେଶକମାନଙ୍କୁ ସଚେତନ କରାଇବା ପାଇଁ ପଦକ୍ଷେପ ଗ୍ରହଣ କରିବ। ବିଶେଷଜ୍ଞ କମିଟିରେ ଅବସରପ୍ରାପ୍ତ ଜଷ୍ଟିସ ଏମ ସାପ୍ରେ, ଓପି ଭଟ୍ଟ, କେ.ଭି କାମାଥ, ନନ୍ଦନ ନୀଲକାନି, ଜଷ୍ଟିସ ଦେଓଧର ଏବଂ ସୋମାଶେକର ସୁନ୍ଦରେଶନ ରହିଛନ୍ତି। ସେବି(ଏସଇବିଆଇ) ଏବଂ ଅନୁସନ୍ଧାନକାରୀ ସଂସ୍ଥା ବିଶେଷଜ୍ଞ ପ୍ୟାନେଲକୁ ସହାୟତା କରିବେ । ନିକଟରେ ହୋଇଥିବା ଷ୍ଟକ ମାର୍କେଟ ବିପର୍ଯ୍ୟୟର ତଦନ୍ତ ପାଇଁ ଏକ କମିଟି ଗଠନ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। କମିଟି ଶେୟାର ବଜାରରେ ପତନ ହେବାର କାରଣ ଅନୁସନ୍ଧାନ କରିବ ଏବଂ ଭବିଷ୍ୟତ ପାଇଁ ପରାମର୍ଶ ଦେବ।
ଫେବୃଆରୀ ୧୭ ରେ ସୁପ୍ରିମକୋର୍ଟ ଏହାର ଆଦେଶ ସଂରକ୍ଷିତ ରଖିଥିବାବେଳେ ଆଦାନୀ-ହିଣ୍ଡନବର୍ଗ ମାମଲାରେ କେନ୍ଦ୍ର ଦ୍ୱାରା ସିଲ ବନ୍ଦ ହୋଇଥିବା ପ୍ରସ୍ତାବ ଗ୍ରହଣ କରିବାକୁ ମନା କରିଦେଇଥିଲେ। ପ୍ରଧାନ ବିଚାରପତି ଡିଓ୍ବାଇ.ଚନ୍ଦ୍ରଚୂଡ଼ ଶୁଣାଣି ସମୟରେ ଏଭଳି କହିଥିଲେ।
ସୂଚନାଯୋଗ୍ୟ, ଗତ ମାସରେ ଆଦାନୀ ଗ୍ରୁପ କମ୍ପାନୀଗୁଡିକର ଶେୟାର ମୂଲ୍ୟରେ ବହୁତ ହ୍ରାସ ଘଟିଥିଲା। ଜାନୁଆରୀ ୨୪ ର ହିଣ୍ଡନବର୍ଗ ରିପୋର୍ଟରେ ଗ୍ରୁପ ଦ୍ୱାରା ଷ୍ଟକ ଅଦଳବଦଳ ଏବଂ ଠକେଇ ଅଭିଯୋଗ ହୋଇଥିଲା। ପ୍ରକାଶ ଥାଉକି, ଜାନୁଆରୀ ୨୯ ରେ ୪୧୩ ପୃଷ୍ଠାର ଲମ୍ବା ରିପୋର୍ଟରେ ଆଦାନୀ ଗ୍ରୁପ କହିଛି ଯେ, ନିକଟରେ ହିଣ୍ଡନବର୍ଗ ରିସର୍ଚ୍ଚ ରିପୋର୍ଟ ଏକ ର୍ନିଦ୍ଦିଷ୍ଟ କମ୍ପାନୀ ଉପରେ ଆକ୍ରମଣ ନୁହେଁ, ବରଂ ଭାରତର ବିକାଶ କାହାଣୀ ଉପରେ ଆକ୍ରମଣ ।
