ଭୁବନେଶ୍ୱର,୮ା୭(ବ୍ୟୁରୋ): କୋଭିଡ୍ ପରେ ରାଜ୍ୟରେ ପର୍ଯ୍ୟଟନ କ୍ଷେତ୍ର ଏକପ୍ରକାର ବିପର୍ଯ୍ୟସ୍ତ ହୋଇଛି। ଦେଶ ଭିତରର କିଛି ପର୍ଯ୍ୟଟକ ରାଜ୍ୟର କେତେକ ଅଞ୍ଚଳ ବୁଲାବୁଲି କରୁଥିବା ବେଳେ ବିଦେଶୀ ପର୍ଯ୍ୟଟକ ଓଡ଼ିଶା ବିମୁଖ ଥିବା ଦେଖିବାକୁ ମିଳିଛି। କୋଭିଡ୍ ମହାମାରୀକୁ ୨ ବର୍ଷ ପୂରିଯାଇଥିଲେ ମଧ୍ୟ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ବହୁମାତ୍ରାରେ କମିଛି।
କୃଷି ପରେ ପର୍ଯ୍ୟଟନ କ୍ଷେତ୍ର ରାଜ୍ୟ ରାଜକୋଷ ଆୟର ଅନ୍ୟ ଏକ ପ୍ରମୁଖ ଉତ୍ସ। ବିଶ୍ୱ ପରିଭ୍ରମଣ ଓ ପର୍ଯ୍ୟଟନ ପରିଷଦ (ଓ୍ବାଲର୍ଡ ଟ୍ରାଭେଲ ଆଣ୍ଡ ଟୁରିଜମ୍ କାଉନସିଲ) ଦ୍ୱାରା କରାଯାଇଥିବା ଆକଳନ ଅନୁସାରେ ପର୍ଯ୍ୟଟନ କ୍ଷେତ୍ର ସାମଗ୍ରିକ ଘରୋଇ ଉତ୍ପାଦ(ଜିଡିପି)ର ୪% ଅଂଶ ରହୁଥିବା ବେଳେ ୨ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରିପାରିବ।
ତେବେ ଏଥିପ୍ରତି ସେତେଟା ଧ୍ୟାନ ଦିଆଯାଉଥିବା ଭଳି ମନେହେଉ ନାହିଁ। ପର୍ଯ୍ୟଟନ ବିଭାଗ କେବଳ କେତେକ ସ୍ଥାନରେ ପୋଷ୍ଟର ଲଗାଇବା ଓ ରୋଡ୍ ଶୋ’ କରି କର୍ତ୍ତବ୍ୟ ସାରିଦେଉଛି। ନୂତନ ପର୍ଯ୍ୟଟନ ସ୍ଥଳ ଚିହ୍ନଟ ଓ ଉନ୍ନତୀକରଣ ହେଉ ନ ଥିବାରୁ ଓଡ଼ିଶା ପ୍ରତି ପର୍ଯ୍ୟଟକଙ୍କ ଆଗମନ ହ୍ରାସ ପାଇବାରେ ଲାଗିଛି। ପର୍ଯ୍ୟଟକ ଆଗମନ କମୁଥିବାରୁ ହୋଟେଲ ଶିଳ୍ପ ମଧ୍ୟ ପ୍ରଭାବିତ ହେଉଛି। ଏହା ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ଉପରେ ଗଭୀର ପ୍ରଭାବ ପକାଇଛି।
ପର୍ଯ୍ୟଟନ ବିଭାଗରୁ ମିଳିଥିବା ସୂଚନା ଅନୁଯାୟୀ ୨୦୧୯ରେ ରାଜ୍ୟକୁ ୧ ଲକ୍ଷ ୧୫ ହଜାର ୧୨୮ ବିଦେଶୀ ପର୍ଯ୍ୟଟକ ଆସିଥିବା ବେଳେ ୨୦୨୦ରେ ଏହା ୧୦,୨୦୬କୁ ଖସିଯାଇଛି। ସେହିପରି ୨୦୨୧ରେ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ୨,୨୬୯କୁ ହ୍ରାସପାଇଛି। କେବଳ ବିଦେଶୀ ନୁହନ୍ତି ଘରୋଇ ପର୍ଯ୍ୟଟକଙ୍କ ସଂଖ୍ୟା ମଧ୍ୟ କମିବାରେ ଲାଗିଛି। ୨୦୧୯ରେ ଓଡ଼ିଶାକୁ ୧,୫୩,୦୭,୬୩୭ ଘରୋଇ ପର୍ଯ୍ୟଟକ ଆସିଥିବା ବେଳେ ୨୦୨୦ରେ ୪୬,୨୨,୨୭୩ ଏବଂ ୨୦୨୧ରେ ୩୭,୪୨,୨୨୩ ପର୍ଯ୍ୟଟକ ଆସିଥିଲେ। ଏପରି କି ପର୍ଯ୍ୟଟନ ଋତୁରେ ମଧ୍ୟ ପର୍ଯ୍ୟଟକ ଆସୁନାହାନ୍ତି। ଏହି ୩ ବର୍ଷରେ ରାଜ୍ୟ ସରକାର ବିଭିନ୍ନ ପର୍ଯ୍ୟଟନ ଉତ୍ସବ, ରୋଡ୍ ଶୋ ଆୟୋଜନ କରି ପ୍ରାୟ ୩୦୦ କୋଟି ଟଙ୍କା ଖର୍ଚ୍ଚ କରିସାରିଲେଣି। ହେଲେ ପର୍ଯ୍ୟଟନ କ୍ଷେତ୍ରରେ ସେପରି ଆଖିଦୃଶିଆ ଉନ୍ନତି ହେଉନାହିଁ। ପର୍ଯ୍ୟଟକଙ୍କ ପାଇଁ ରହଣି ସ୍ଥଳ, ସୁରକ୍ଷା ଏବଂ ନୂଆ ପର୍ଯ୍ୟଟନ ସ୍ଥଳର ବିକାଶ ହେଉ ନ ଥିବାରୁ ରାଜ୍ୟକୁ ପର୍ଯ୍ୟଟକଙ୍କ ଆଗମନ ହ୍ରାସପାଉଛି। ରାଜ୍ୟରେ ପ୍ରାକୃତିକ ସୌନ୍ଦର୍ଯ୍ୟ ଭରି ରହିଛି। ଏହାର ଉପଯୋଗ ହେଉ ନ ଥିବାରୁ ପର୍ଯ୍ୟଟନ ଶିଳ୍ପର ବିକାଶ ହୋଇପାରୁ ନାହିଁ। ପର୍ଯ୍ୟଟନକୁ ନିର୍ଭର କରି ସୃଷ୍ଟି ହେବାକୁ ଥିବା ନିଯୁକ୍ତି ମଧ୍ୟ ବୃଦ୍ଧିପାଉନି। ଏପରି କି ବିଧାନସଭାରେ ବିରୋଧୀ ସଦସ୍ୟମାନେ ପର୍ଯ୍ୟଟନର ବିକାଶକୁ ନେଇ ବାରମ୍ବାର ସରକାରଙ୍କ ଦୃଷ୍ଟି ଆକର୍ଷଣ କରି ଆସୁଛନ୍ତି। ପର୍ଯ୍ୟଟନ ମନ୍ତ୍ରୀ ଅଶ୍ୱିନୀ ପାତ୍ର କହିଛନ୍ତି ଯେ କୋଭିଡ୍ ମହାମାରୀ ପର୍ଯ୍ୟଟନ ଶିଳ୍ପ ଉପରେ ଗଭୀର ପ୍ରଭାବ ପକାଇଛି। ପର୍ଯ୍ୟଟନ କ୍ଷେତ୍ରର ବିକାଶ ପାଇଁ ରାଜ୍ୟ ସରକାର ଇଡ୍କୋ ଜରିଆରେ ହୋଟେଲ ନିର୍ମାଣ ଲାଗି ଘରୋଇ ସଂସ୍ଥାକୁ ଜମି ଯୋଗାଇ ଦେଉଛନ୍ତି।
