କଣିହାଁ,୧୧।୧୨(ଡି.ଏନ.ଏ.): କଣିହାଁ ବ୍ଲକ ବଡ଼ତ୍ରିବିଡ଼ା ଗ୍ରାମରେ କଣିହାଁ ତହସିଲ ତରଫରୁ ଶନିବାର ଜବରଦଖଲ ଉଚ୍ଛେଦ କରାଯାଇଛି। ପୋଲିସ ଫୋର୍ସ ସହିତ କଣିହାଁ ତହସିଲଦାର ପତିତପାବନ ଦେବତା, ମାଜିଷ୍ଟ୍ରେଟ ଦାୟିତ୍ୱରେ ଥିବା ସହକାରୀ ଜିଲାପାଲ ପ୍ରଭାତ ବିଶ୍ୱାଳ, ବିଦ୍ୟୁତ୍ ବିଭାଗ ସମେତ ଅନ୍ୟାନ୍ୟ ବିଭାଗ ଅଧିକାରୀଙ୍କ ଉପସ୍ଥିତିରେ ଜବରଦଖଲ ହଟାଯାଇଥିଲା। ସକାଳେ ଡାକବାଜି ଯନ୍ତ୍ର ଯୋଗେ ବେଆଇନ ଘର ଭିତରେ ଥିବା ଅନ୍ୟାନ୍ୟ ସାମଗ୍ରୀ ନେଇ ଯିବାକୁ ଘୋଷଣା କରାଯାଇଥିଲା। ଅପରାହ୍ନରେ ଜେସିବି ମେଶିନ୍ ଦ୍ୱାରା ପଞ୍ଚାୟତ କାର୍ଯ୍ୟାଳୟ ନିକଟସ୍ଥ ସରକାରୀ ଜାଗାରେ ଥିବା କୋଠା ଓ ଦୋକାନ ଗୃହ ଭଙ୍ଗାଯାଇଥିଲା। ଏ ନେଇ ତହସିଲଦାର ଦେବତା କହିଛନ୍ତି, ସରକାରୀ ଜାଗାରେ ବିଭିନ୍ନ କାର୍ଯ୍ୟାଳୟ ନିର୍ମାଣ ପାଇଁ ଏହି ଜବରଦଖଲ ଉଚ୍ଛେଦ କରାଯାଇଛି। ଖୁବ୍ଶୀଘ୍ର ବଡତ୍ରିବିଡା ପଞ୍ଚାୟତର ରାଜସ୍ବ ନିରୀକ୍ଷକ କାର୍ଯ୍ୟାଳୟ ନିର୍ମାଣ ହେବ। ସେହି ଅଫିସ କଣିହାଁରେ ଚାଲିଥିବା କାରଣରୁ ଲୋକମାନେ ବହୁ ହଇରାଣ ହେଉଛନ୍ତି। ଏଠାରେ ଅନ୍ୟ ସରକାରୀ ଅନୁଷ୍ଠାନ ଗଢି ଉଠିବ। ଏହାକୁ ଦୃଷ୍ଟିରେ ରଖି ପୂର୍ବରୁ ଜାଗା ଚିହ୍ନଟ କରିଥିଲୁ। ଉକ୍ତ ସ୍ଥାନକୁ ଜବରଦଖଲ କରାଯାଇଥିବା ସମ୍ପର୍କରେ ଗ୍ରାମର କେତେଜଣ ଲୋକ ଅଭିଯୋଗ କରିଥିଲେ। ସମ୍ପୃକ୍ତ ଜବରଦଖଲ କାରୀଙ୍କୁ ପୂର୍ବରୁ ନୋଟିସ ହୋଇଥିଲା। କିନ୍ତୁ ପ୍ରଶାସନ ବିରୋଧରେ ସେମାନେ ନ୍ୟାୟାଳୟର ଆଶ୍ରୟ ନେଇଥିଲେ। କୋର୍ଟଙ୍କ ଆଦେଶ ମିଳିବା ପରେ ସରକାରୀ ଜାଗାରେ ଥିବା ଘରକୁ ଭଙ୍ଗାଯାଇଛି।
