ଜମ୍ମୁ,୧୪।୪: ଜମ୍ମୁ-କଶ୍ମୀରରେ ଶୁକ୍ରବାର ଏକ ବଡ ଅଘଟଣ ଘଟିଛି। ଉଧମପୁରର ଚେନାନି ବ୍ଲକର ବେନ ଗାଁର ବେନି ସଙ୍ଗମରେ ବୈଶାଖି ଉତ୍ସବ ସମୟରେ ଫୁଟ ଓଭରବ୍ରିଜ ଭାଙ୍ଗି ଯାଇଛି। ଏହି ଘଟଣାରେ ଅନେକ ଶ୍ରଦ୍ଧାଳୁ ଆହତ ହୋଇଥିବା ସୂଚନା ମିଳିଛି। ରେସକ୍ୟୁ ଅପରେଶନ ଜାରି ରହିଛି। ପୋଲିସ ଓ ଅନ୍ୟ ଟିମ ଘଟଣାସ୍ଥଳରେ ପହଞ୍ଚି ସାରିଛନ୍ତି। ଉଧମପୁରର ଏସଏସପି ଡା.ବିନୋଦ କହିଛନ୍ତି, ଘଟଣାସ୍ଥଳରେ ଉଦ୍ଧାରକାରୀ ଦଳ ପହଞ୍ଚି ସାରିଛନ୍ତି ଓ ଉଦ୍ଧାର କାର୍ଯ୍ୟ ଜାରିରହିଛି।
ଉଧମପୁରର ବେନି ସଙ୍ଗମରେ ବୈଶାଖି ମେଳା ସମୟରେ ଦେବିକା ଉପରେ ନିର୍ମାଣ କରାଯାଇଥିବା ବ୍ରିଜ ଭାଙ୍ଗି ଯାଇଛି। ବ୍ରିଜ ଭାଙ୍ଗିଯିବା ପରେ ଲୋକେ ଏଣେତେଣେ ଦୌଡିଥିଲେ। ବୈଶାଖି ଉତ୍ସବ ପାଇଁ ଏଠାରେ ଶ୍ରଦ୍ଧାଳୁଙ୍କ ଭିଡ ହୋଇଥିଲା। ଏହି ସମୟରେ ଏହି ଦୁର୍ଘଟଣା ହୋଇଛି। ବ୍ରିଜ ଭାଙ୍ଗିଯିବା ଫଳରେ ୨୦-୨୫ ଜଣ ଆହତ ହୋଇଥିବା ସୂଚନା ମିଳିଛି। ହେଲେ କେହି ଗୁରୁତର ନ ଥିବା ଜଣାପଡିଛି।
