ଭବାନୀପାଟଣା,୨୪।୮(ଉତ୍ତମ କୁମାର ଦାଶ): ଆଗକୁ ଆସୁଥିବା ପର୍ବପର୍ବାଣୀକୁ ଦୃଷ୍ଟିରେ ରଖି ଭବାନୀପାଟଣା ସହରର ବିଭିନ୍ନ ସ୍ଥାନରେ ସୋମବାର ଖାଦ୍ୟ ନିରାପତ୍ତା ବିଭାଗ ପକ୍ଷରୁ ପୋଲିସ ସହଯୋଗରେ ଚଢ଼ାଉ କରାଯାଇଛି।
ଏହି ସମୟରେ ମୋଟ ୨୧ଟି ଖାଦ୍ୟ ସାମଗ୍ରୀ ଦୋକାନଗୁଡିକୁ ଯାଞ୍ଚ କରାଯାଇଥିଲା। ଯାଞ୍ଚ ସମୟରେ ପ୍ରାୟ ୩୨ କିଲୋଗ୍ରାମ ବାସି ଖାଦ୍ୟ ଓ କୃତ୍ରିମ ଖାଦ୍ୟ ରଙ୍ଗ ବ୍ୟବହୃତ ଖାଦ୍ୟ ସାମଗ୍ରୀ ଚିହ୍ନଟ କରାଯାଇ ଘଟଣା ସ୍ଥଳରେ ନଷ୍ଟ କରାଯାଇଥିଲା। ଖାଦ୍ୟ ବ୍ୟବସାୟୀମାନଙ୍କୁ ଖାଦ୍ୟ ପ୍ୟାକେଜିଂ, ସ୍ବଚ୍ଛତା ଓ ନିରାପଦ ଖାଦ୍ୟ ପରିଚାଳନା ସମ୍ପର୍କରେ ସଚେତନ କରାଯାଇଥିବାବେଳେ ଖାଦ୍ୟ ଗୁଡ଼ାଇବା ପାଇଁ କାଗଜ କିମ୍ବା ଖବରକାଗଜ ବ୍ୟବହାର ନ କରିବାକୁ ନିର୍ଦ୍ଦେଶ ଦିଆଯାଇଥିଲା।
ସେହିପରି ଚଢ଼ାଉ ସମୟରେ ଖୋଲା ଓ ପ୍ୟାକେଜ ହୋଇଥିବା ପନିରର ୧୮ଟି ନମୁନା ଉପରେ ଆୟୋଡିନ ଦ୍ରବଣ ବ୍ୟବହାର କରି ଷ୍ଟାର୍ଚ୍ଚ ଚିହ୍ନଟ ପାଇଁ ଦ୍ରୁତ ପରୀକ୍ଷା କରାଯାଇଥିଲା। ପରୀକ୍ଷାରେ କୌଣସି ନମୁନାରେ ଷ୍ଟାର୍ଚ୍ଚ ଉପସ୍ଥିତିର ସକାରାତ୍ମକ ପ୍ରତିକ୍ରିୟା ମିଳି ନ ଥିଲା। ଆଗକୁ ଆସୁଥିବା ପର୍ବପର୍ବାଣୀ ସମୟରେ ଦୁଗ୍ଧଜାତୀୟ ଉତ୍ପାଦ, ପନିର ଓ ବିଭିନ୍ନ ପ୍ରକାରର ମିଠା ଉପରେ ଅଧିକ ଗୁରୁତ୍ୱ ଦେଇ ଏହିପରି ଯାଞ୍ଚ ଓ ଦ୍ରୁତ ପରୀକ୍ଷା ଅଭିଯାନ ଜାରି ରହିବ ବୋଲି ଖାଦ୍ୟ ନିରାପତ୍ତା ବିଭାଗ ପକ୍ଷରୁ କୁହାଯାଇଛି। ଏହି ଚଢ଼ାଉରେ କଳାହାଣ୍ଡି ଖାଦ୍ୟ ନିରାପତ୍ତା ଅଧିକାରୀ ସନ୍ତୋଷ କୁମାର ମହାପାତ୍ର, ବିଶ୍ୱଜିତ ନାଏକ, ଟାଉନ ଥାନା ଏଏସଆଇ ସନ୍ତୋଷ କୁମାର ନାୟକ ସମେତ ଅନ୍ୟାନ୍ୟ ପୋଲିସ କର୍ମଚାରୀ ଓ ଖାଦ୍ୟ ନିରାପତ୍ତା ବିଭାଗର କର୍ମଚାରୀମାନେ ସାମିଲ ଥିଲେ।
Dharitri – Odisha’s No.1 Odia Daily
