ଭୁବନେଶ୍ୱର, ୮।୭(ବ୍ୟୁରୋ): ଦୁଇମାସ ପୂର୍ବେ ଦୁର୍ଘଟଣାରେ ପ୍ରାଣ ହରାଇଥିବା ଜଣେ ଯୁବକଙ୍କ ମୃତ୍ୟୁର କାରଣ ଏବେ ସ୍ପଷ୍ଟ ହୋଇଛି। କ୍ୟାପିଟାଲ୍ ଥାନା ପୋଲିସ ସିସିଟିଭି ଫୁଟେଜ ଆଧାରରେ ତଦନ୍ତ କରି ଯୁବକଙ୍କ ମୃତ୍ୟୁ ଘଟଣାରେ ସମ୍ପୃକ୍ତି ଦର୍ଶାଇ ଜଣଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ହେଲେ ଏୟାରପୋର୍ଟ ଥାନା ଅଧୀନ ଗଙ୍ଗନଗର ଅଞ୍ଚଳର ସତ୍ୟଜିତ୍ ପଟ୍ଟନାୟକ(୨୩)। ପୋଲିସ ତାଙ୍କଠାରୁ ଏକ ବାଇକ୍ ଓ ଆକ୍ରମଣରେ ବ୍ୟବହୃତ ଲୁହାରଡ୍ ଜବତ କରିଛି। ପୋଲିସ ଏନେଇ ମାମଲା (ନଂ. ୩୨୪/୨୧) ରୁଜୁ କରି ଅଧିକ ତଦନ୍ତ ଜାରି ରଖିଛି।
ଅନୁଯାୟୀ, ଢେଙ୍କନାଳ ଜିଲା କାମାକ୍ଷାନଗର ଅଞ୍ଚଳର ସୁବାସ ନାୟକ(୪୨) ଭୁବନେଶ୍ୱର ବାପୁଜୀ ନଗରରେ ଥିବା ଏକ ହୋଟେଲରେ କାମ କରୁଥିଲେ। ସୁବାସ ଦୁର୍ଗାମଣ୍ଡପ ବସ୍ତିରେ ରହୁଥିବା ତାଙ୍କ ବନ୍ଧୁ ପ୍ରଶାନ୍ତ ମଙ୍ଗରାଜଙ୍କ ଘରକୁ ଯିବାଆସିବା କରନ୍ତି। ତେବେ କୌଣସି କାରଣକୁ ନେଇ ପ୍ରଶାନ୍ତ ଓ ସୁବାସ ମିଶି ଅଭିଯୁକ୍ତ ସତ୍ୟଜିତ୍ଙ୍କୁ ଆକ୍ରମଣ କରିଥିଲେ। ଫଳରେ ପ୍ରଶାନ୍ତ ଓ ସୁବାସଙ୍କ ଉପରେ ଅଭିଯୁକ୍ତ ସତ୍ୟଜିତ୍ ରାଗ ରଖିଥିଲେ। ମେ ୨୪ରେ ସୁବାସ ସୂର୍ଯ୍ୟନଗର ଅଞ୍ଚଳରେ ଯାଉଥିବା ବେଳେ ସତ୍ୟଜିତ୍ ଓ ତାଙ୍କ ସାଙ୍ଗମାନେ ମିଳିମିଶି ତାଙ୍କୁ ଲୁହାରଡ୍ରେ ଆକ୍ରମଣ କରିଥିଲେ। ସେହି ସମୟରେ ସୁବାସ ଅଭିଯୁକ୍ତଙ୍କ କବଳରୁ ରକ୍ଷା ପାଇବା ପାଇଁ ଦୌଡ଼ି ପଳାଉଥିବାବେଳେ ଏକ ବିଦ୍ୟୁତ ଖୁଣ୍ଟରେ ପିଟି ହୋଇଯାଇଥିଲେ। ଫଳରେ ତାଙ୍କର ମୃତ୍ୟୁ ଘଟିଥିଲା। ପୋଲିସ ମୃତଦେହ ଉଦ୍ଧାର କରିବା ସହ ସିସିଟିଭି ଫୁଟେଜ ଆଧାରରେ ତଦନ୍ତ ଆରମ୍ଭ କରିଥିଲା।
