ଭଦ୍ରକ ଅଫିସ, ୨୨।୪ ବର୍ତ୍ତମାନର ବ୍ୟସ୍ତବହୁଳ ଦୁନିଆରେ ସମସ୍ତେ ନିଜ କାମରେ ବ୍ୟସ୍ତ ଥିବାବେଳେ ଦୁଃଖୀ ଦରିଦ୍ରଙ୍କ କଥା ବୁଝିବାକୁ କାହା ପାଖରେ ସମୟ ନାହିଁ। ଏଭଳି ସ୍ଥିତିରେ ଅସହାୟ, ଗରିବ ଦିବ୍ୟାଙ୍ଗମାନଙ୍କ ପାଇଁ ସାହାରା ପାଲଟିଛନ୍ତି ଭଦ୍ରକ ସହର କୁଅଁାସ ଅଞ୍ଚଳର ଗଙ୍ଗାଧର ରାଉଳଙ୍କ ପୁଅ ମୋହିତ୍(୨୫)। ଦିବ୍ୟାଙ୍ଗମାନଙ୍କୁ ମାଗଣାରେ ଜଳଖିଆ ଖାଇବାକୁ ଦେଉଛନ୍ତି। ପିଲାଟି ଦିନରୁ ଦୁଃଖୀ ଦରିଦ୍ରଙ୍କ ସେବା କରିବା ପାଇଁ ଇଚ୍ଛା ରଖିଥିବା ମୋହିତ୍ ପାଠପଢ଼ା ପରେ ତାହା କାମରେ କରି ଦେଖାଇଛନ୍ତି।
ବାଣିଜ୍ୟରେ ଯୁକ୍ତ ୩ ପାଠପଢ଼ା ଶେଷ କରିବା ପରେ ସେ ନିଜେ କିଛି ଟଙ୍କା ଯୋଗାଡ଼ କରି କୁଅଁାସ ବଜାରରେ ଠେଲାଗାଡ଼ିରେ ଏକ ଜଳଖିଆ ଦୋକାନ ଆରମ୍ଭ କରିଥିଲେ। ବରା, ଘୁଗୁନି, ପୁରି, ଇଡ୍ଲି ଆଦି ବିଭିନ୍ନ ପ୍ରକାର ଜଳଖିଆ ପ୍ରସ୍ତୁତ କରି ବିକ୍ରି କରିଥାନ୍ତି। କିନ୍ତୁ ଏଠାରେ ଦିବ୍ୟାଙ୍ଗମାନଙ୍କ ପାଇଁ ଜଳଖିଆ ସମ୍ପୂର୍ଣ୍ଣ ମାଗଣା ରହିଛି। ପ୍ରତ୍ୟେକ ଦିନ ସକାଳେ ସହରର ବିଭିନ୍ନ ବସ୍ତିରେ ବସବାସ କରୁଥିବା ଅସହାୟ ଦିବ୍ୟାଙ୍ଗମାନେ ଜଳଖିଆ ଖାଇବା ପାଇଁ ଏଠାକୁ ଆସିଥାନ୍ତି। ସେମାନଙ୍କ ପାଖରେ ଟଙ୍କାଟିଏ ନ ଥିବାବେଳେ ମାଗଣାରେ ଜଳଖିଆ ଖାଇ ଆତ୍ମତୃପ୍ତି ଲାଭ କରିବା ସହ ମୋହିତ୍ଙ୍କ ମଙ୍ଗଳ କାମନା କରି ଫେରିଥାନ୍ତି। ୬ ମାସ ହେବ ସେ ଏଭଳି କାମ କରୁଥିବା ବେଳେ ଜୀବନ ଥିବା ଯାଏ ଜାରି ରଖିବେ। ଏଥିରୁ ଆତ୍ମସନ୍ତୋଷ ମିଳିଥାଏ ବୋଲି ସେ କହନ୍ତି। ଏହାବ୍ୟତୀତ ପ୍ରାଣୀପକ୍ଷୀମାନଙ୍କୁ ଭଲପାଇବା, ଆହତ ବୁଲା ଷଣ୍ଢମାନଙ୍କର ଚିକିତ୍ସା କରାଇବା ଆଦି କାର୍ଯ୍ୟରେ ନିଜକୁ ନିୟୋଜିତ କରିଥାନ୍ତି। ଏପରିକି ଅସହାୟମାନଙ୍କୁ ସହଯୋଗର ହାତ ବଢ଼ାଇବା ପାଇଁ ‘ନୀଳ ସରସ୍ବତୀ’ ନାମରେ ଏକ ହେଲ୍ପଲାଇନ ଗଠନ କରିଛନ୍ତି। ଏହି ମହାନ୍ କାର୍ଯ୍ୟ ପାଇଁ ତାଙ୍କୁ ସ୍ଥାନୀୟ ଅଞ୍ଚଳରେ ପ୍ରଶଂସା କରାଯାଇଛି।
