ଝାରବନ୍ଧ,୨୪।୮(ଦେବେନ୍ଦ୍ର ସାହୁ): ଧାନ ବିକ୍ରି ପାଇଁ ଆଟ କିସମ ଜମି ପଞ୍ଜିକରଣ ହେଉ ନ ଥିବାରୁ ଚାଷୀ ଆନ୍ଦୋଳନକୁ ଓହ୍ଲାଇଛନ୍ତି l ଆଟ କିସମକୁ ପଞ୍ଜିକରଣ କରା ନ ଗଲେ ଆଗାମୀ ଦିନରେ ବଡ଼ ଧରଣର ଆନ୍ଦୋଳନ କରାଯିବ ବୋଲି ଚାଷୀ ସଂଗଠନ ଚେତାବନୀ ଦେଇଛି। ଆସନ୍ତା ୨୪ ଘଣ୍ଟାର ସମୟ ସୀମା ଦିଆଯାଇଛି। ଝାରବନ୍ଧ ବ୍ଲକର ଝାରବନ୍ଧ, ଡଭା ଓ ଲଉ ପ୍ୟାକ୍ସ ଜରିଆରେ ଚାଷୀ ଧାନ ବିକ୍ରୟ ପାଇଁ ପଞ୍ଜିକରଣ କରୁଛି, ଏହା ଅଗଷ୍ଟ ମାସ ଶେଷରେ ସମୟ ସୀମା ପୂରିଯିବ। ବର୍ତ୍ତମାନ ସୁଦ୍ଧା ୩୦ରୁ ୪୦ ପ୍ରତିଶତ ଚାଷୀ ପଞ୍ଜିକରଣ କରିଥିବାବେଳେ ଅଧିକାଂଶ ଚାଷୀ ପଞ୍ଜିକରଣ ଅପେକ୍ଷାରେ ହେଲେ ବର୍ତ୍ତମାନ ଆଟ କିସମ ସମସ୍ୟା ସାମନାକୁ ଆସିଥିବାରୁ ପଞ୍ଜିକରଣ ପାଇଁ ଆଶଙ୍କା ଦେଖାଦେଉଛି l
ଗତ ବର୍ଷ ପୂର୍ବରୁ ଏହି କିସମରେ ଧାନ ବିକ୍ରୟ କରିସାରିଛନ୍ତି। ଚଳିତବର୍ଷ କେଉଁ କାରଣ ଏହାକୁ ନିଆଁ ନ ଯାଉଥିବା ଚାଷୀ ପ୍ରଶ୍ନ କରିଛି, ଏହାସହ ଏହି କିସମରେ ଧାନ ଚାଷ ପାଇଁ ଚାଷୀଙ୍କୁ କୃଷି ଋଣ ଦିଆଯାଉଛ। ଯଦି ଏହି କିସମରେ ଧାନ ଚାଷ ପାଇଁ ଋଣ ଦିଆଯାଉଛି ତାହେଲେ ଧାନ କିଣିବାକୁ ଅମଙ୍ଗ କାହିଁକି ବୋଲି ଚାଷୀ ପ୍ରଶ୍ନ କରୁଛି l ଏହାର ପ୍ରତିବାଦରେ ସ୍ଥାନୀୟ ଚାଷୀ ଶ୍ରୀଯୁକ୍ତ କ୍ଷମାନିଧି ସାହୁ, ସନ୍ତୋଷ ବେହେରା,ଭଜନ ସଗର, ଅବଧୁତ ଜଗତ, ବସନ୍ତ ନନ୍ଦ, ଜୟକୁମାର ନିଗମ,ଡୋଲାମଣୀ ଚୌଧୁରୀ,ନାରାୟଣ ବେହେରା,ଲଳିତ ପଟେଲଙ୍କ ନେତୃତ୍ୱରେ ଶତାଧିକ ଚାଷୀ ଝାରବନ୍ଧ ତହସିଲ କାର୍ଯାଳୟ ସମ୍ମୁଖରେ ପ୍ରତିବାଦ କରିଥିଲେ ଏବଂ ଦାବିପତ୍ର ଦେଇଥିଲେ l ଏହାକୁ ବୋଡାସମ୍ବର କୃଷକ ସଂଗଠନ ର ଚାଷୀନେତା କୈଳାସ ବାରିକ ଆସି ସମର୍ଥନ ଜଣାଇ ଚାଷୀ ବିରୋଧୀ ସରକାରଙ୍କ ଉପରେ ବର୍ଷୀଥିଲେ l
ଆଟ କିସମ ପଞ୍ଜିକରଣ କରାଯାଉ ନ ଥିବା କାରଣ ଜାଣିବା ପାଇଁ ଝାରବନ୍ଧ ପ୍ୟାକ୍ସ ସମ୍ପାଦକ ଶ୍ରୀଯୁକ୍ତ ଉମାକାନ୍ତ ପ୍ରଧାନ ଓ ଡଭl ପ୍ୟାକ୍ସ ସମ୍ପାଦକ ଶ୍ରୀ ଲମ୍ବୋଦର ପଟେଲଙ୍କୁ ପଚରାଯିବାରୁ ଆମର ଉପରିସ୍ଥ ଅଧିକାରୀ ଫୋନ ମାଧ୍ୟମରେ ଆଟ କିସମକୁ ପଞ୍ଜିକରଣ ନ କରିବାକୁ କହିଥିବାରୁ ଆମ୍ଭେ କରିପାରିବୁ ନାହିଁ ବୋଲି ପ୍ରକାଶ କରିଥିଲେ। ଏହା ଶୁଣି ଚାଷୀ ଉତ୍ତ୍ୟକ୍ତ ହୋଇ ବିନା କୌଣସି ଚିଠି ନ କରି ମୌଖିକ ନିର୍ଦେଶ ଦେବା କେତେ ଯୁକ୍ତିଯୁକ୍ତ ବୋଲି ପ୍ରଶ୍ନ କରିଥିଲେ ଏବଂ ଏହାର ସମାଧାନ ପାଇଁ ତହସିଲଦାରଙ୍କୁ ଜଣାଇ ୨୪ଘଣ୍ଟା ଭିତରେ ସମାଧାନ କରିବାକୁ ଚେତାବନୀ ଦେଇଛନ୍ତି। ଏହା ନ ହେଲେ ଆସନ୍ତା କାଲି ତହସିଲଦାର କାର୍ଯାଳୟକୁ ଅଚଳ କରାଯିବ ବୋଲି ଧମକ ଦେଇଛନ୍ତି l ତହସିଲଦାର ଶ୍ରୀଯୁକ୍ତ ଅଲେଖ ଘୁଟା ଦାବିପତ୍ର ଗ୍ରହଣ କରି ସମାଧାନ ପାଇଁ ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି l
Dharitri – Odisha’s No.1 Odia Daily
