ଲୋଇସିଂହା,୨୫।୮(ସୁଶାନ୍ତ ବାରିକ): ଖରିଫ ୨୦୨୬-୨୭ ଧାନ ବିକ୍ରି ପାଇଁ ପାକ୍ସଗୁଡ଼ିକରେ ଚାଷୀ ପଞ୍ଜୀକରଣ ପ୍ରକ୍ରିୟା ଚାଲିଥିବାବେଳେ ଆଗଲପୁର ବ୍ଲକ ମୁରୁଶୁଣ୍ଡି ପାକ୍ସରେ ଧାନ କିଣାବିକାକୁ ନେଇ ଏକ ଭିନ୍ନ ବିବାଦ ଦେଖାଦେଇଛି। ବ୍ଲକ ଅନ୍ତର୍ଗତ ଡୁଙ୍ଗୁରିପାଲି ଓ ତେନ୍ତୁଳି ଗ୍ରାମର କିଛି ଚାଷୀ ପାକ୍ସ ସମ୍ପାଦକଙ୍କ ବିରୋଧରେ ଅଭିଯୋଗ କରି ଜିଲାପାଳଙ୍କ ନିକଟରେ ଫେରାଦ ହୋଇଛନ୍ତି। ଅଭିଯୋଗର ତଦନ୍ତ କରି ଦୋଷୀଙ୍କ ବିରୋଧରେ ଆବଶ୍ୟକ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି। ଏଡିଏମ ବିଜୟାନନ୍ଦ ସେଠୀ ଅଭିଯୋଗ ଗ୍ରହଣ କରି ଡ଼ିଆରସିଏସଙ୍କୁ ତଦନ୍ତ ନିର୍ଦେଶ ଦେଇଥିବା ଅଭିଯୋଗକରୀ ଚାଷୀଙ୍କଠାରୁ ପ୍ରକାଶ।
ଚାଷୀଙ୍କ ଅଭିଯୋଗ ଅନୁସାରେ, ରାଜ୍ୟ ସରକାର ଚାଷୀଙ୍କଠାରୁ ପାକ୍ସ ସମେତ ବିଭିନ୍ନ ସ୍ଥାନରେ ଏସଏଚ୍ଜି ମାଧ୍ୟମରେ ଖରିଫ ଓ ରବି ସମୟରେ ଧାନ କ୍ରୟ କରୁଛନ୍ତି। କିନ୍ତୁ ଚଳିତ ଖରିଫ ଋତୁରୁ ଏସଏଚ୍ଜି ଧାନ କ୍ରୟ କରିବେ ନାହିଁ ବୋଲି ସରକାରୀ ଭାବେ ନିଷ୍ପତ୍ତି ହୋଇଥିବା ଚାଷୀମାନେ ଜାଣିବାକୁ ପାଇଛନ୍ତି। ପୂର୍ବରୁ ଧାନ ବିକ୍ରି କରୁଥିବା ପାକ୍ସରେ ପୁଣି ଚାଷୀ ପଞ୍ଜୀକରଣ କରି ଧାନ ବିକ୍ରି କରିପାରିବେ ବୋଲି ଜଣାପଡ଼ିଛି।
ଏହି ପରିପ୍ରେକ୍ଷୀରେ ଡୁଙ୍ଗୁରିପାଲି ଓ ତେନ୍ତୁଳି ଗ୍ରାମର ଚାଷୀମାନେ ୨୦୨୬-୨୭ ଖରିଫ ଧାନ ବିକ୍ରି ପାଇଁ ମୁରୁଶୁଣ୍ଡି ପାକ୍ସକୁ ଯାଉଛନ୍ତି। ଅଭିଯୋଗ ଅନୁସାରେ, ପାକ୍ସ ସମ୍ପାଦକ ପଞ୍ଜୀକରଣ ପାଇଁ ଯାଉଥିବା ଚାଷୀଙ୍କୁ ହଇରାଣ କରିବା ସହ ବିଭ୍ରାନ୍ତିକର ମନ୍ତବ୍ୟ ଦେଉଛନ୍ତି।
ଏହା ସହ ଗତବର୍ଷ ଧାନ କିଣା କରିଥିବା ଏସଏଚ୍ଜି ବିରୋଧରେ ଚାଷୀଙ୍କଠାରୁ ଦରଖାସ୍ତ ଲେଖାଇ ନେବା ଏବଂ ପାକ୍ସ ସମ୍ପାଦକ ନିଜ କ୍ଷମତାର ଦୁରୁପଯୋଗ କରୁଥିବା ନେଇ ମଧ୍ୟ ଅଭିଯୋଗ ହୋଇଛି। ଏସଏଚ୍ଜିକୁ ଧାନ କିଣାରୁ ବାଦ ଦେବା ପ୍ରକ୍ରିୟା ସରକାରୀ ନିଷ୍ପତ୍ତି ଅନୁଯାୟୀ ଚାଲିଛି ବୋଲି ସ୍ଥାନୀୟ ଚାଷୀ ସମ୍ମାନ ଜଣାଇଛନ୍ତି। ପାକ୍ସ ସମ୍ପାଦକଙ୍କ ଏଭଳି ଆଚରଣ ଚାଷୀଙ୍କୁ ଭୟଭୀତ କରିଥିବା ଅଭିଯୋଗ ହୋଇଛି।
ଚାଷୀମାନେ ବିନା ଦ୍ବିଧା ଏବଂ ବିଳମ୍ବରେ ସେମାନଙ୍କ ପଞ୍ଜୀକରଣ କରି ଧାନ ବିକ୍ରିର ସୁଯୋଗ ଦେବାକୁ ଦାବି ଜଣାଇଛନ୍ତି। ଏହାସହ ଚାଷୀମାନେ ୨୦୨୫-୨୬ ଆର୍ଥିକ ବର୍ଷରେ ମା’ ପାଟଣେଶ୍ୱରୀ ଏସଏଚ୍ଜିରେ ଧାନ ବିକ୍ରି କରିଥିବା ଚାଷୀଙ୍କ ତାଲିକା ଓ ଧାନ କିଣା ସମ୍ପର୍କିତ ସମସ୍ତ ତଥ୍ୟ ଯାଞ୍ଚ କରିବାକୁ ଆହ୍ବାନ ଜଣାଇଛନ୍ତି। ଅଭିଯୋଗ ସମ୍ପର୍କରେ ପାକ୍ସ ସମ୍ପାଦକ ପର୍ଶୁ ସେଠ୍ଙ୍କୁ ପଚାରିବାରୁ ସେ ବୋର୍ଡର ନିଷ୍ପତ୍ତି କ୍ରମେ ଚାଷୀଙ୍କଠାରୁ ଏପରି ଦରଖାସ୍ତ ଲେଖାଇ ନେଉଥିବା କହିଛନ୍ତି।
Dharitri – Odisha’s No.1 Odia Daily
