ବରଗଡ଼,୧୪।୨(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଚାଷୀ ସମସ୍ୟା ବଢି ଚାଲିଛି। ଧାନବିକ୍ରି ଅବ୍ୟବସ୍ଥା ଏଥର ଅନ୍ୟବର୍ଷ ଅପେକ୍ଷା ଚାଷୀଙ୍କ ଦୁଃଖ ବଢାଇ ଦେଇଛି। ଏହାକୁ ନେଇ ଚାଷୀ ଅସନ୍ତୋଷ ବଢିବାରେ ଲାଗିଛି। ଏହି କ୍ରମରେ ଶୁକ୍ରବାର ଭଟଲି ବ୍ଲକ ସୁଲୁସୁଲିଆ କୋଲିଆରି ଡ୍ୟାମ୍ଠାରେ ଚାଷୀ ସଙ୍ଗଠନ ଜୟ କିଷାନ ଆନ୍ଦୋଳନ ଭଟଲି ବ୍ଲକ ଶାଖା ପକ୍ଷରୁ ଏକ କର୍ମୀ ସମ୍ମିଳନୀ ଅନୁଷ୍ଠିତ ହୋଇଥିଲା। ଜୟ କିଷାନ ଆନ୍ଦୋଳନର ବ୍ଲକ ସଭାପତି ଅକ୍ଷୟ ପ୍ରଧାନ ଏଥିରେ ସଭାପତିତ୍ୱ କରିଥିଲେ। ଭଟଲି ବ୍ଲକରେ ଜିଲାର ସର୍ବାଧିକ ଗଭୀର ନଳକୂପ ଥିବାବେଳେ ଏଠାକାର ଚାଷୀମାନେ ବିଦ୍ୟୁତ୍ ବିଲ୍ ଅସୁଲିକୁ ନେଇ ଅସନ୍ତୋଷ ପ୍ରକାଶ କରିଥିଲେ। ଧାନ ବିକ୍ରି ସମସ୍ୟା ସେମାନଙ୍କ ମାନସିକ, ଆର୍ଥିକ ସ୍ଥିତିକୁ ଦୋହଲାଇ ଦେଇଥିବା ଚାଷୀମାନେ କହିଥିଲେ। ଏହି ବ୍ଲକର ସମସ୍ତ ମଣ୍ଡିରେ କଟ୍ନିଛଟ୍ନି ଜୋରସୋରରେ ଚାଲିଥିବା ଅଭିଯୋଗ ହୋଇଥିଲା। ଯେଉଁ ଚାଷୀ ଉପଯୁକ୍ତ ମୂଲ୍ୟ ପାଇବା ଆଶାରେ ମଣ୍ଡିକୁ ଧାନ ନେଉଛନ୍ତି, ତାଙ୍କୁ ଗ୍ରେନ ଆନାଲାଇଜର ଭୟ ଦେଖାଇ ସେହି ଧାନକୁ ନନ୍ ଏଫଏକ୍ୟୁ ଦର୍ଶାଯାଉଛି । ଫଳରେ ଚାଷୀମାନେ ବାଧ୍ୟ ହୋଇ କଟନିଛଟନିରେ ଧାନ ବିକ୍ରି କରୁଛନ୍ତି ବୋଲି ଅଭିଯୋଗ କରିଥିଲେ। ସେହିପରି ଧାନ ବିକ୍ରି ନ ସରୁଣୁ ଚାଷୀଙ୍କଠାରୁ ବିଦ୍ୟୁତ୍ ବିଲ୍ ଅସୁଲି କରିଯାଉଥିବା ଅଭିଯୋଗ କରି ଏହା ସରକାରଙ୍କ ଚାଷୀ ବିରୋଧୀ ନୀତି ବୋଲି ପଶ୍ଚିମ ଓଡ଼ିଶା କୃଷକ ସଙ୍ଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ ତାକୁ ଦୃଢ଼ ନିନ୍ଦା କରିଥିଲେ। କେନ୍ଦ୍ର କେରଳ ସରକାରକୁ ଦେଇଥିବା ଚିଠିକୁ ଉଲ୍ଲେଖ କରି ଲିଙ୍ଗରାଜ କହିଥିଲେ, ସରକାରଙ୍କ ଚାଷୀ ବିରୋଧୀ ନୀତି ବିଷୟରେ ଚାଷୀମାନଙ୍କୁ ସଜାଗ ହୋଇ ଉଚିତ ଜବାବ ଦେବାକୁ ପଡ଼ିବ ସେ ଆହ୍ବାନ କରିଥିଲେ। ଏହି ସଭାରେ ପଶ୍ଚିମ ଓଡ଼ିଶା କୃଷକ ସଙ୍ଗଠନ ସମନ୍ବୟ ସମିତିର ଆବାହକ ଲିଙ୍ଗରାଜଙ୍କ ସମେତ ବରିଷ୍ଠ ଚାଷୀ ନେତା ଶିବ ପ୍ରସାଦ ପ୍ରଧାନ, ଜୟ କିଷାନ ଆନ୍ଦୋଳନର ଜିଲା ସଭାପତି ସୁଶୀଲ କୁମାର ସାହୁ, ବିଜୟ ପ୍ରଧାନ, ମିନିଷ୍ଟର ବାରିକ, ଘନଶ୍ୟାମ ସା, ମନବୋଧ ସାହୁ, ମୋତିରାମ ସାହୁ ସଦାନନ୍ଦ ନାଏକ, ନେହେରୁ ଭୁଏ, ସୋହେଲା ବ୍ଲକ ସଭାପତି ସୁରେନ୍ଦ୍ର ମେହେର ପ୍ରମୁଖ ଯୋଗ ଦେଇଥିଲେ। ସେହିଭଳି ଅବ୍ୟବସ୍ଥା ବିରୋଧରେ ଆସନ୍ତା ୨୮ ତାରିଖରେ ଭଟଲି ବ୍ଲକ ଅଫିସରେ ବିକ୍ଷୋଭ ପ୍ରଦର୍ଶନ ସହିତ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ ପାଇଁ ନିଷ୍ପତ୍ତି ନିଆଯାଇଥିଲା।
Dharitri – Odisha’s No.1 Odia Daily
