ଭଦ୍ରକ ଅଫିସ,୨୪।୭: କୁରାଢ଼ିରେ ଅତି ନୃଶଂସ ଭାବେ ସ୍ତ୍ରୀଙ୍କ ମୁଣ୍ଡକୁ ଛେଚି ସ୍ବାମୀ ହତ୍ୟା କରିଥିବା ଅଭିଯୋଗ ହୋଇଛି। ଶନିବାର ଏଭଳି ଏକ ଅଭାବନୀୟ ଘଟଣା ଘଟିଛି ଭଦ୍ରକ ଗ୍ରାମାଞ୍ଚଳ ଥାନା ଅଧୀନ କାଉପୁର ପଞ୍ଚାୟତ ଏଡ଼ାଦେଇ ଗ୍ରାମରେ। ମୃତା ମହିଳା ହେଲେ ଛବିରାଣୀ ସାହୁ(୪୫)। ପରକୀୟା ପ୍ରୀତି ସନ୍ଦେହରେ ତାଙ୍କ ସ୍ବାମୀ ଏଭଳି କାଣ୍ଡ ଘଟାଇଥିବା ପୋଲିସ ସନ୍ଦେହ କରୁଛି। ଏ ନେଇ ମୃତା ଛବିରାଣୀଙ୍କ ଭାଇ ଆଗରପଡ଼ା ଥାନା ଅଧୀନ ମଙ୍ଗଳପୁର ଗାଁର ପୂର୍ଣ୍ଣଚନ୍ଦ୍ର ଭୋଳଙ୍କ ଅଭିଯୋଗ କ୍ରମେ ଥାନାରେ ହତ୍ୟା ମାମଲା(ନଂ.୩୦୮/୨୧) ରୁଜୁ କରାଯାଇଛି। ସାଇଣ୍ଟିଫିକ ଟିମ୍ ଓ ସନ୍ଧାନୀ କୁକୁର ସାହାଯ୍ୟରେ ଥାନା ଅଧିକାରୀ ଆଲୋକ କୁମାର ଜେନା ଘଟଣାର ତଦନ୍ତ ଆରମ୍ଭ କରିଛନ୍ତି।
ସୂଚନା ଅନୁଯାୟୀ, ଶନିବାର ଭୋରରେ ପଡ଼ୋଶୀଙ୍କଠାରୁ ଖବର ପାଇ ପୋଲିସ ପହଞ୍ଚି ଘର ଚଟାଣରୁ ଛବିରାଣୀଙ୍କ ମୃତଦେହ ଜବତ କରିଥିଲା। ମୃତଦେହ ନିକଟରେ ଏକ କୁରାଢ଼ି ପଡ଼ିଥିବା ବେଳେ ଘର ବାରଣ୍ଡାରେ ତାଙ୍କ ସ୍ବାମୀ ଗୋବିନ୍ଦ ବସି ରହିଥିବା ଦେଖିବାକୁ ମିଳିଥିଲା। ପାରିପାର୍ଶ୍ୱିକ ସ୍ଥିତିରୁ ଛବିରାଣୀଙ୍କ ମୁଣ୍ଡରେ କୁରାଢ଼ିରେ ଶକ୍ତ ଆଘାତ କରାଯାଇଥିବା ଜଣାପଡ଼ିଛି। ପୋଲିସ କୁରାଢ଼ି ଜବତ କରିଥିବା ବେଳେ ଗୋବିନ୍ଦଙ୍କ ସହ ଗାଁର ୨ ଯୁବକଙ୍କୁ ସନ୍ଦେହରେ ଥାନାରେ ଅଟକ ରଖି ପଚରାଉଚୁରା କରୁଛି। ମୃତା ଛବିରାଣୀ ଓ ତାଙ୍କ ସ୍ବାମୀ ଗୋବିନ୍ଦ ଗୋଟିଏ ଘରେ ରହିଆସୁଥିଲେ। ଗୋବିନ୍ଦ ଜଣେ ଦିବ୍ୟାଙ୍ଗ (ମୂକ ଓ ବଧିର)। ସେ ଛବିରାଣୀଙ୍କୁ ସନ୍ଦେହ ଦୃଷ୍ଟିରେ ଦେଖିଆସୁଥିଲେ ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି। ତଦନ୍ତ ପରେ ପ୍ରକୃତ କାରଣ ସ୍ପଷ୍ଟ ହେବ ବୋଲି ଥାନା ଅଧିକାରୀ ଜେନା କହିଛନ୍ତି।
