ନୂଆଦିଲ୍ଲୀ, ୩୦ା୯: ପରିବେଶ ପ୍ରଦୂଷଣ ସମସ୍ୟାକୁ ବହୁଗୁଣିତ କରି ଅକାଳ ମୃତ୍ୟୁକୁ ଡାକି ଆଣିବ କୋଇଲା ପ୍ଲାଣ୍ଟ ସମ୍ପ୍ରସାରଣ। ଭାରତୀୟ ମେଟ୍ରୋଗୁଡ଼ିକ ଏହା ଦ୍ୱାରା ସର୍ବାଧିକ ପ୍ରଭାବିତ ହେବା ଯୋଗୁ ସମୟ ପୂର୍ବରୁ ମୃତ୍ୟୁ ସଂଖ୍ୟା ୬୦ ପ୍ରତିଶତ ବୃଦ୍ଧି ପାଇବ। କୋଇଲାଜନିତ ପ୍ରଦୂଷଣ ଯୋଗୁ ବିଶ୍ୱର ଅନ୍ୟ ପ୍ରମୁଖ ସହର ଅପେକ୍ଷା ଦିଲ୍ଲୀ, ମୁମ୍ବାଇ, କୋଲକାତା, ବେଙ୍ଗାଲୁରୁ ଏବଂ ଚେନ୍ନାଇବାସୀ ଗମ୍ଭୀର ସ୍ବାସ୍ଥ୍ୟ ଏବଂ ଅର୍ଥନୈତିକ ସଙ୍କଟର ସମ୍ମୁଖୀନ ହେବେ ବୋଲି ବୁଧବାର ଏକ ଗବେଷଣା ରିପୋର୍ଟରେ ପ୍ରକାଶ ପାଇଛି।
ମୁକ୍ତ ସହର: ସ୍ବଚ୍ଛ ଶକ୍ତି ବିପ୍ଳବ ପାଇଁ ସ୍ବାସ୍ଥ୍ୟ ଏବଂ ଅର୍ଥନୈତିକ ପ୍ରସଙ୍ଗ’ ରିପୋର୍ଟ ପାଇଁ ଭାରତରେ ଥିବା କୋଇଲା ପାଓ୍ବାର ପ୍ଲାଣ୍ଟ ଏବଂ ଆଗାମୀ ବର୍ଷରେ ପ୍ରସ୍ତାବିତ ସମ୍ପ୍ରସାରଣ ଯୋଜନାଗୁଡିକ ଉପରେ ଅନୁଧ୍ୟାନ କରାଯାଇଥିଲା। ସି୪୦ ସିଟିଜ୍ ଦ୍ୱାରା ପ୍ରକାଶିତ ଏହି ରିପୋର୍ଟ ଅନୁସାରେ, କୋଇଲା ପ୍ଲାଣ୍ଟ ସମ୍ପ୍ରସାରଣ ଯୋଗୁ ଆସନ୍ତା ୧୦ ବର୍ଷ ମଧ୍ୟରେ ଉକ୍ତ ୫ ସହରରେ ୫୨,୭୦୦ ଲୋକଙ୍କ ଅକାଳ ମୃତ୍ୟୁ ଘଟିବ। ୩୧,୩୦୦ ଶିଶୁ ସମୟ ପୂବର୍ର୍ରୁ ଜନ୍ମ ନେବେ। ଆଜ୍ମା ଯୋଗୁ ୪୬,୮୦୦ ଜଣଙ୍କୁ ଜରୁରିକାଳୀନ ସ୍ଥିତିରେ ହସ୍ପିଟାଲ ଯିବାକୁ ପଡ଼ିବ। ଅସୁସ୍ଥତା କାରଣରୁ ୨ କୋଟି ୫୮ ଲକ୍ଷ ଛୁଟି ଦିବସ ମିଳିବ। ୪୮,୯୦୦ ଜଣ ବିକଳାଙ୍ଗ ହୋଇଯିବେ। କୋଇଲା ପ୍ଲାଣ୍ଟରୁ ବାହାରୁଥିବା ଧୂଆଁ ୫୦୦ କିଲୋମିଟର ପର୍ଯ୍ୟନ୍ତ ବ୍ୟାପିପାରିବ। ଏହା ଦ୍ୱାରା ସହରବାସୀ ଅଣନିଃଶ୍ୱାସୀ ହୋଇପଡ଼ିବେ। ଫଳରେ ବୟସ୍କ, ଗର୍ଭବତୀ, ଯୁବବର୍ଗଙ୍କଠାରେ ଗମ୍ଭୀର ସ୍ବାସ୍ଥ୍ୟ ସମସ୍ୟା ଉପୁଜିବ। ପୁରାତନ ତଥା ପ୍ରଦୂଷିତ ୟୁନିଟ୍କୁ ହଟାଇ ରାଜ୍ୟ ତଥା କେନ୍ଦ୍ର ସରକାରଙ୍କ ବାୟୁ ଗୁଣବତ୍ତା ଯୋଜନାରେ କୋଇଲାକୁ ଶୀଘ୍ର ବାଦ୍ ଦିଆଯିବା ଜରୁରୀ ବୋଲି ରିପୋର୍ଟରେ କୁହାଯାଇଛି। ନୂଆ କୋଇଲା ପ୍ଲାଣ୍ଟ କରିବା ପରିବର୍ତ୍ତେ ସରକାର ସ୍ବଚ୍ଛ ତଥା ପ୍ରଦୂଷଣ ମୁକ୍ତ ଶକ୍ତିରେ ନିବେଶ କରିବା ଉଚିତ ବୋଲି ଏଥିରେ ପରାମର୍ଶ ଦିଆଯାଇଛି। ଜାତୀୟସ୍ତରରେ ନିର୍ଦ୍ଦିଷ୍ଟ ଯୋଗଦାନ(ଏନ୍ଡିସି) ଯୋଜନାରେ ଭାରତ କୋଇଲା ପାଓ୍ବାର ପ୍ଲାଣ୍ଟ ହ୍ରାସ କରି ୪୫୦ ଗିଗାଓ୍ବାଟ୍ର ଅକ୍ଷୟ ଶକ୍ତି ଉତ୍ପାଦନ ପାଇଁ ସ୍ଥିର କରିଛି। ଦିଲ୍ଲୀ, ମୁମ୍ବାଇ, କୋଲକାତା, ବେଙ୍ଗାଲୁରୁ ଏବଂ ଚେନ୍ନାଇରେ କୋଇଲା ପ୍ଲାଣ୍ଟର ୨୦ ପ୍ରତିଶତ ବନ୍ଦ ରଖି ନୂଆ କୋଲ୍ ପାଓ୍ବାର ପ୍ଲାଣ୍ଟ ନିର୍ମାଣ ଉପରେ ରୋକ ଲଗାଗଲେ ୨୦୨୦-୩୦ ମଧ୍ୟରେ ବହୁ ଲାଭ ମିଳିବ।
