ମୁମ୍ବାଇ,୬।୬ : ଗତ ୧୨ରୁ ୧୫ ମାସ ହେଲା ଜାତୀୟ ଦଳରେ ସ୍ଥାନ ପାଉ ନାହାନ୍ତି ସ୍ପିନର କୁଲଦୀପ ଯାଦବ। ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱରେ ଦିନେ ଟିମ୍ ଇଣ୍ଡିଆ ପାଇଁ ନିୟମିତ ପ୍ରଦର୍ଶନ କରୁଥିବା ଚାଇନା ମ୍ୟାନ ଏବେ ସମ୍ପୂର୍ଣ୍ଣ ନିରାଶ ହୋଇପଡ଼ିଛନ୍ତି। ୨୦୨୦ ଆଇପିଏଲଠାରୁ ଆରମ୍ଭ ହୋଇଥିବା ୨୬ ବର୍ଷୀୟ କୁଲଦୀପଙ୍କ ପତନ ଏବେ ମଧ୍ୟ ଜାରି ରହିଛି। ସେହିବର୍ଷ କେକେଆର ପାଇଁ ଆଇପିଏଲରେ ୫ଟି ମ୍ୟାଚ୍ ଖେଳି ହାତେଇଥିଲେ ମାତ୍ର ଗୋଟିଏ ଉଇକେଟ।
ପରେ ତାଙ୍କୁ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜ ଲାଗି ଘୋଷିତ ଦଳରେ ସାମିଲ କରାଯାଇଥିଲା। କିନ୍ତୁ ମିଳି ନ ଥିଲା ସୁଯୋଗ। ଭାରତରେ ଖେଳାଯାଇଥିବା ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ଗୋଟିଏ ମ୍ୟାଚ୍ରେ ସୁଯୋଗ ପାଇଥିବା କୁଲଦୀପ ଅର୍ଜନ କରିଥିଲେ ମାତ୍ର ୨ ଉଇକେଟ। ଆଉ ଚଳିତ ବର୍ଷ କୋଭିଡ୍ କାରଣରୁ ଆଇପିଏଲ ସ୍ଥଗିତ ହେବା ପର୍ଯ୍ୟନ୍ତ ଗୋଟିଏ ହେଲେ ମ୍ୟାଚ୍ରେ ତାଙ୍କୁ ସୁଯୋଗ ମିଳି ନ ଥିଲା। ଏହାପରେ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଓ ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପାଇଁ ଘୋଷିତ ଦଳରେ ସ୍ଥାନ ନ ମିଳିବାରୁ ଦୁଃଖିତ ଅଛନ୍ତି ସ୍ପିନର କୁଲଦୀପ ଯାଦବ। କିନ୍ତୁ ଶ୍ରୀଲଙ୍କା ଗସ୍ତ ପାଇଁ ଘୋଷିତ ହେବାକୁ ଥିବା ଦଳରେ ସ୍ଥାନ ପାଇବାକୁ ଆଶା ରଖିଛନ୍ତି।
ଭାରତୀୟ ଦଳର ଅଂଶ ନ ଥିବାରୁ ମୁଁ ଦଃଖିତ। କାରଣ ଦଳର ବିଜୟରେ ମୁଁ ସହଯୋଗ କରିବାକୁ ଚାହେଁ। ଜୀବନରେ ଏଭଳି ଘଟେ। କିନ୍ତୁ ଆଗାମୀ ସୁଯୋଗରେ ପ୍ରଦର୍ଶନ କରିବାକୁ ମୁଁ ପ୍ରସ୍ତୁତ ଅଛି। ଆଶା କରୁଛି, ଶ୍ରୀଲଙ୍କା ଗସ୍ତରେ ମୋତେ ଖେଳିବାକୁ ସୁଯୋଗ ମିଳିବ। ପ୍ରତ୍ୟେକ ଖେଳାଳି ଦଳରେ ରହିବାକୁ ଚାହାନ୍ତି। କିନ୍ତୁ ବେଳେବେଳେ ପରିସ୍ଥିତି ଏଭଳି ହୁଏ, ଦଳରେ ସ୍ଥାନ ମିଳେ ନାହିଁ ବୋଲି ଚାଇନା ମ୍ୟାନ ସ୍ପିନର ଏକ ସାକ୍ଷାତ୍କାରରେ କହିଛନ୍ତି। କ୍ୟାରିୟରରେ ମାତ୍ର ୭ଟି ଟେଷ୍ଟ ଖେଳିଥିବା କୁଲଦୀପ ୬୩ ଦିନିକିଆରେ ୧୦୫ ଉଇକେଟ ନେଇଛନ୍ତି।
