ରାଓ୍ବଲପିଣ୍ଡି (ପାକିସ୍ତାନ), ୨ା୧୨(ଏପି):ପାକିସ୍ତାନ ବିପକ୍ଷ ପ୍ରଥମ କ୍ରିକେଟ ଟେଷ୍ଟ ମ୍ୟାଚରେ ଭୂତାଣୁ ପ୍ରଭାବିତ ଇଂଲଣ୍ଡ ଆକ୍ରମଣାତ୍ମକ କ୍ରିକେଟ ଖେଳିଛି। ୪ଜଣ ବ୍ୟାଟ୍ସମ୍ୟାନଙ୍କ ଶତକ ସହାୟତାରେ ଦଳ ୫୦୬/୪ ସ୍କୋର କରି ଏକ ବିଶ୍ୱ ରେକର୍ଡ କରିଛି। ଜ୍ୟାକ୍ କ୍ରଲି ୧୨୨ ରନ କରିଥିବା ବେଳେ ବେନ୍ ଡକେଟ୍ ୧୦୭ ରନ କରିଛନ୍ତି। ଉଭୟେ ପ୍ରଥମ ଉଇକେଟ ପାର୍ଟନରଶିପ୍ରେ ଦ୍ରୁତ ୨୩୩ ରନ ସଂଗ୍ରହ କରିଛନ୍ତି। ଅନ୍ତିମ ସେସନରେ ଓଲି ପୋପ୍ ଓ ହ୍ୟାରି ବ୍ରୁକ୍ ସେମାନଙ୍କର ଶତକ ହାସଲ କରିଥିଲେ। ଦୁହେଁ ପାକିସ୍ତାନର ଅନଭିଜ୍ଞ ବୋଲିଂ ଆକ୍ରମଣକୁ ବେଖାତିର କରି ରନ ସଂଗ୍ରହ କରିଥିଲେ। ବ୍ୟାଡ୍ ଲାଇଟ ଯୋଗୁ ଗୁରୁବାର କେବଳ ୭୫ ଓଭର ଖେଳ ସମ୍ଭବ ହୋଇଥିଲା। ଇଂଲଣ୍ଡ ବ୍ୟାଟରମାନେ ୭୩ ଚୌକା ଓ ୩ ଛକା ଲଗାଇଥିଲେ।
କୌଣସି ଟେଷ୍ଟ ମ୍ୟାଚର ପ୍ରଥମ ଦିବସରେ ୫୦୬/୪ ସ୍କୋର ହେଉଛି ସର୍ବାଧିକ। ପୂର୍ବରୁ ୧୯୧୦ରେ ସିଡ୍ନୀଠାରେ ଦକ୍ଷିଣ ଆଫ୍ରିକା ବିପକ୍ଷରେ ୪୯୪/୬ ସ୍କୋର କରି ଅଷ୍ଟ୍ରେଲିଆ ଏହି ରେକର୍ଡର ଅଧିକାରୀ ଥିଲା। ଇଂଲଣ୍ଡ ଆହୁରି ମଧ୍ୟ ଦ୍ରୁତ ୫୦୦ରନ ସ୍କୋର କରିବାରେ ଦ୍ରୁତତ୍ତମ ଦଳ। ଫାଇନାଲ ସେସନରେ ପଦାର୍ପଣକାରୀ ଖେଳାଳି ସାଉଦ୍ ଶକିଲଙ୍କ ବୋଲିଂରେ ବ୍ରୁକ୍ ଗୋଟିଏ ଓଭରରେ ୬ ଚୌକା ଲଗାଇଥିଲେ। ସେ ୧୦୧ରନ କରି ଅପରାଜିତ ରହିଥିଲେ। ଭାଇରସ ସଂକ୍ରମଣରୁ ବେନ୍ ଷ୍ଟୋକ୍ସ ସୁସ୍ଥ ହୋଇ ନ ଥିବାରୁ ପୋପ୍ ଉଇକେଟକିପିଂ ଦାୟିତ୍ୱ ତୁଲାଇବେ। ଠିକଣା ସମୟରେ ଭୂତାଣୁରୁ ଆରୋଗ୍ୟ ଲାଗ କରିଥିବା ଅଧିନାୟକ ବେନ୍ ଷ୍ଟୋକ୍ସ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ। ସେ ୧୫ ବଲ୍ରୁ ୩୪ ରନ କରି ଅପରାଜିତ ରହିଛନ୍ତି। ପାକିସ୍ତାନର ପ୍ରମୁଖ ବୋଲର ଶାହିନ ଆଫ୍ରିଦୀଙ୍କ ଅନୁପସ୍ଥିତିରେ ୩ ପଦାର୍ପଣକାରୀ ବୋଲର ହାରିସ୍ ରାଫ୍ ଓ ମହମ୍ମଦ ଅଲ (ଫାଷ୍ଟ ବୋଲର) ଏବଂ ଲେଗ୍ ସ୍ପିନର ମହମ୍ମଦ ଜାହିଦ ପ୍ରଭାବହୀନ ସାବ୍ୟସ୍ତ ହୋଇଥିଲେ। ସେମାନଙ୍କ ମଧ୍ୟରୁ ଜଣେ କେହି ପିଣ୍ଡି କ୍ରିକେଟ ଷ୍ଟାଡିୟମର ଘାସଶୂନ୍ୟ ପିଚ୍ରୁ କୌଣସି ଫାଇଦା ଉଠାଇ ପାରି ନ ଥିଲେ।
ସଂକ୍ଷିପ୍ତ ସ୍କୋର
ଇଂଲଣ୍ଡ ପ୍ରଥମ ଇନିଂସ: ୫୦୬/୪ (ଜ୍ୟାକ୍ କ୍ରଲି-୧୨୨, ଓଲି ପୋପ୍-୧୦୮, ବେନ୍ ଡକେଟ-୧୦୭, ହ୍ୟାରି ବ୍ରୁକ୍ -୧୦୧*; ଜାହିଦ ମେହେମୁଦ୍-୨/୧୬୦)।
