କେସିଙ୍ଗା, ୨୩.୬ (ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବିଜ୍ଞାପିତ ଅଞ୍ଚଳ ପରିଷଦ (ଏନ୍ଏସି) ୧୯୬୫ ମସିହାରେ ଗଠିତ ହୋଇଥିଲା। କେସିଙ୍ଗା ଏନ୍ଏସି ଅନ୍ତର୍ଗତ ବଗାଡ଼ ଅଞ୍ଚଳର ୧ ଓ ୨ ନମ୍ବର ୱାର୍ଡରେ ରାସ୍ତା ଉଭୟ ପାର୍ଶ୍ୱରେ ଜବରଦଖଲ ଯୋଗୁ ସଙ୍କୁଚିତ ହୋଇଯାଇଥିବାରୁ ଯାନବାହନ ଚଳାଚଳରେ ଘୋର ସମସ୍ୟା ଦେଖାଦେଉଥିଲା। ଏହାକୁ ଦୂର କରିବା ପାଇଁ ମଙ୍ଗଳବାରଠାରୁ ହେଭି ବୁଲଡୋଜର ସହାୟତାରେ ଜବରଦଖଲ ଉଚ୍ଛେଦ ଅଭିଯାନ ଆରମ୍ଭ ହୋଇଛି।
ଏହି ଅଭିଯାନର ବିଶେଷତ୍ୱ ହେଉଛି, ମାନବିକତା ଏବଂ ଆଇନ ପ୍ରତି ସମ୍ମାନ ପ୍ରଦର୍ଶନ କରି କେସିଙ୍ଗା ଏନ୍ଏସିର ନଗରପାଳ ନୃପରାଜ ଯାଦବ ପ୍ରଥମେ ନିଜ ଘରର ଜବରଦଖଲ ଅଂଶ ଭାଙ୍ଗି ଉଦାହରଣ ସୃଷ୍ଟି କରିଥିଲେ। ତାଙ୍କ ସହ ପ୍ରେମ ବନଛୋର ମଧ୍ୟ ସ୍ୱଇଚ୍ଛାରେ ନିଜ ଘରର ଜବରଦଖଲ ଅଂଶ ଉଚ୍ଛେଦ କରିଥିଲେ।
ଏନ୍ଏସି ପକ୍ଷରୁ ପ୍ରାୟ ୮୦ ଜଣଙ୍କୁ ନୋଟିସ ଜାରି କରାଯାଇଥିଲା। ନଗରପାଳ ନୃପରାଜ ଯାଦବଙ୍କ ପ୍ରତ୍ୟକ୍ଷ ଉଦ୍ୟମରେ ଏବଂ ତହସିଲଦାରଙ୍କ ନିର୍ଦ୍ଦେଶକ୍ରମେ ବର୍ଷକେ ପୂର୍ବରୁ ଡିମାର୍କେସନ ଓ ରାସ୍ତା ଚିହ୍ନଟ ପ୍ରକ୍ରିୟା ସମ୍ପନ୍ନ ହୋଇଥିଲା। ଦୀର୍ଘ ଦିନ ଧରି ୮୦ଟି ପରିବାର ମଧ୍ୟରୁ କେହି ମଧ୍ୟ ଘର ଭାଙ୍ଗିବାକୁ ଆଗେଇ ଆସି ନ ଥିଲେ। କିନ୍ତୁ ନଗରପାଳଙ୍କ ଉଦାହରଣ ପରେ ନୋଟିସ ପାଇଥିବା ଅନେକ ପରିବାର ସ୍ୱଇଚ୍ଛାରେ ଜବରଦଖଲ ଉଚ୍ଛେଦ କରିଥିଲେ।
ମଙ୍ଗଳବାର ଆରମ୍ଭ ହୋଇଥିବା ଏହି ଅଭିଯାନରେ ନଗରପାଳ ନୃପରାଜ ଯାଦବ, ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଚିନ୍ମୟ ଆଚାର୍ଯ୍ୟ, ନିର୍ବାହୀ ଯନ୍ତ୍ରୀ ନାରାୟଣ ମହାରଣାଙ୍କ ସମେତ ସମସ୍ତ କର୍ମଚାରୀ ଉପସ୍ଥିତ ରହି ସହଯୋଗ କରିଥିଲେ। ଉପଜିଲାପାଳଙ୍କ ନିର୍ଦ୍ଦେଶକ୍ରମେ କେସିଙ୍ଗା ଅତିରିକ୍ତ ତହସିଲଦାର ବିବେକାନନ୍ଦ ସାମଲ ମାଜିଷ୍ଟ୍ରେଟ୍ ଭାବେ ଉପସ୍ଥିତ ଥିବାବେଳେ ଶାନ୍ତିଶୃଙ୍ଖଳା ରକ୍ଷା ପାଇଁ ପୋଲିସ ମୁତୟନ କରାଯାଇଥିଲା।
ଜବରଦଖଲ ଉଚ୍ଛେଦ ପରେ ୱାର୍ଡବାସୀ ନଗରପାଳଙ୍କ ପଦକ୍ଷେପକୁ ପ୍ରଶଂସା କରିଥିବାବେଳେ ରାସ୍ତା ମଝିରେ ଥିବା ବିଦ୍ୟୁତ ଖୁଣ୍ଟ ସ୍ଥାନାନ୍ତର, ପକ୍କା ରାସ୍ତା ନିର୍ମାଣ ଏବଂ ଡ୍ରେନେଜ୍ ବ୍ୟବସ୍ଥା ସୁଧାରିବା ପାଇଁ ଏନ୍ଏସି ନିକଟରେ ଦାବି ଉଠାଇଥିଲେ।
ଏ ସମ୍ପର୍କରେ ନଗରପାଳ ନୃପରାଜ ଯାଦବ କହିଛନ୍ତି, “ଆଇନକୁ ସମ୍ମାନ ଜଣାଇ ମୁଁ ପ୍ରଥମେ ନିଜ ଘରର ଜବରଦଖଲ ଅଂଶ ଭାଙ୍ଗିଛି। ୱାର୍ଡ ୧ ଓ ୨ରେ ଡ୍ରେନ, ବିଦ୍ୟୁତ ଖୁଣ୍ଟ ସ୍ଥାନାନ୍ତର ଏବଂ ରାସ୍ତା ନିର୍ମାଣ ଭଳି ସମସ୍ୟାର ଶୀଘ୍ର ସମାଧାନ କରାଯିବ।”
