ଦାରିଙ୍ଗବାଡ଼ି,୨୮ା୩(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଜାଗୃତି କାର୍ଯ୍ୟାଳୟ ପରିସର ମଧ୍ୟରେ ଜନଜାତି ସମ୍ମିଳନୀ-୨୦୨୫ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ପ୍ରଦୀପ ମଲିକ ମଞ୍ଚ ପରିଚାଳନା କରିଥିବାବେଳେ ବସନ୍ତ ମହାନ୍ତି, ଜାଗୃତି ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଟ, ପୂର୍ବତନ ବ୍ଲକ ଅଧ୍ୟକ୍ଷ ତଥା କୁଇ କବି ବକଲା ପ୍ରଧାନ, ତାଲିମଦାତା ସୁଶାନ୍ତ ଦଳେଇ, ଗମା ପ୍ରଧାନ, ସରସ୍ବତୀ ପ୍ରଧାନ, ପୂର୍ବତନ ସରପଞ୍ଚ ସୁଜାତା ପଡ୍ରା ପ୍ରମୁଖ ମଞ୍ଚାସୀନ ଥିଲେ। ଏହାର ଉଦ୍ଘାଟନୀ ବେଳେ ଦୀପ ପ୍ରଜ୍ଜ୍ୱଳନ ବଦଳରେ ପାରମ୍ପରିକ ବାଦ୍ୟ ବଜାଇ ଉଦ୍ଘାଟନ କରାଯାଇଥିଲା। ଏହି ଅବସରରେ ଉପସ୍ଥିତ ମଞ୍ଚାସୀନ ଅତିଥିମାନେ କୁଇ ଭାଷା ଓ ଜନଜାତିଙ୍କ ହଜିଯାଉଥିବା ପାରମ୍ପରିକ ପୂଜା, ପାର୍ବଣ, ପାରମ୍ପରିକ ଖାଦ୍ୟ ଓ ବାଦ୍ୟ ଯନ୍ତ୍ର, ସେମାନଙ୍କ ଚଳଣି ଧିରେ ଧିରେ ହଜିଯାଉଛି। ଏହାର କାରଣ ଓ ନିରାକାରଣ ସମ୍ପର୍କରେ ଆଲୋଚନା କରାଯାଇଥିଲା। ବିଶେଷକରି ଯୁବପିଢ଼ି ଆଉ ଜନଜାତିଙ୍କ କୁଇ ଭାଷାରେ ବାର୍ତ୍ତାଳାପ କରୁ ନ ଥିବା ବେଳେ ଅନେକ ପରିବର୍ତ୍ତନ ଦ୍ୱାରା ଧିରେ ଧିରେ ଜନଜାତି ଏକ ପ୍ରକାର ହଜିଯାଉଥିବା କୁହାଯାଉଥିଲା। ସେହିପରି ଜନଜାତିଙ୍କ ପୋଷାକ ପରିଧାନରେ ପରିବର୍ତ୍ତନ ହେବାରେ ଲାଗିଛି। ପାରମ୍ପରିକ ଖାଦ୍ୟ ଖାଇବା ଛାଡ଼ି ଏବେ ବଜାରରେ ମିଳିଥିବା ଫାଷ୍ଟଫୁଡ୍ ଆଦି ଖାଇବା ଦେଖିବାକୁ ମିଳୁଛି। କ୍ଷୁଦ୍ରଦାନା ଶସ୍ୟ ତଥା ମାଣ୍ଡିଆ କୁଏରୀ, ଜହ୍ନା ଆଦି ଖାଇବାକୁ ଯୁବପିଢ଼ି ପସନ୍ଦ କରୁ ନ ଥିବା ଆଦି ଆଲୋଚନା ସହ ପାରମ୍ପରିକ ଚାଷ ଓ ଅମଳ ହେଉଥିବା ଖାଦ୍ୟକୁ ଖାଇବାକୁ ସଚେତନ କରାଯାଇଥିଲା। ସେହିପରି ପେସା ଆଇନ ସମ୍ପର୍କରେ ଆଲୋଚନା ହେବା ସହ ଏହା ସରକାର ଲାଗୁ କରନ୍ତୁ ବୋଲି କୁହାଯାଇଥିଲା। କାର୍ଯ୍ୟକ୍ରମରେ ପାରମ୍ପରିକ ଖାଦ୍ୟ ପରିବେଷଣ କରାଯାଇଥିଲା ଓ ମଞ୍ଚରେ ଜନଜାତି ମହିଳାମାନେ ପାରମ୍ପରିକ ଖଞ୍ଜଣୀ ନୃତ୍ୟ ଆଦି ପରିବେଷଣ କରିଥିଲେ। ଢୋଲ ମହୁରୀ, ଡେକା, ଚାଙ୍ଗୁ, ଢୋଲ ରେ ମଞ୍ଚ ଦୁଲୁକିଥିଲା।
