ନୂଆଦିଲ୍ଲୀ, ୧୧ା୭ : ଜଳବାୟୁ ପରିବର୍ତ୍ତନଜନିତ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଯୋଗୁ ବିଶ୍ୱବ୍ୟାପୀ ଶ୍ରମଜୀବୀଙ୍କ ଜୀବନ ଜୀବିକା ବିପନ୍ନ ହେବାରେ ଲାଗିଛି। ଏହାଫଳରେ ବିଶେଷକରି ପରିବାର ଚଳାଇବା ପାଇଁ ସଂଘର୍ଷ କରୁଥିବା ଲୋକଙ୍କର ଆୟ ହ୍ରାସ ପାଉଛି। ‘ଆଡେଲଫି ଗ୍ଲୋବାଲ’ ସଂସ୍ଥା ଦ୍ୱାରା ପ୍ରକାଶିତ ଗବେଷଣା ରିପୋର୍ଟ ଅନୁସାରେ ଭାରତ, ବାଂଲାଦେଶ, ଇଣ୍ଡୋନେସିଆ ଏବଂ ନାଇଜେରିଆ ଭଳି ଦେଶରେ କୃଷି ଓ ନିର୍ମାଣ କ୍ଷେତ୍ରରେ କାର୍ଯ୍ୟ କରୁଥିବା ଶ୍ରମିକମାନେ ଅତ୍ୟଧିକ ଗରମ ଯୋଗୁ ବର୍ଷକୁ ପ୍ରାୟ ୨୦ ଦିନ କିମ୍ବା ତା’ଠାରୁ ଅଧିକ କାର୍ଯ୍ୟଦିବସ ହରାଉଛନ୍ତି। ଏହି ପରିସ୍ଥିତି ସେମାନଙ୍କର ପରିବାରର ଦୈନନ୍ଦିନ ଗୁଜୁରାଣ ମେଣ୍ଟାଇବା କ୍ଷେତ୍ରରେ ବଡ଼ ପ୍ରତିବନ୍ଧକ ସାଜିଛି। ରିପୋର୍ଟରେ ଦର୍ଶାଯାଇଛି, ଜଳବାୟୁ ପରିବର୍ତ୍ତନ ଗରିବ ଶ୍ରମିକମାନଙ୍କ ଉପରେ ଦ୍ୱିମୁଖୀ ପ୍ରଭାବ ପକାଉଛି। ପ୍ରଥମତଃ, ପ୍ରଚଣ୍ଡ ଗରମ ଯୋଗୁ ଶ୍ରମିକମାନେ କାର୍ଯ୍ୟ କରିବାର ଗତି ଧୀର କରିବାକୁ ବାଧ୍ୟ ହେଉଛନ୍ତି କିମ୍ବା କାମ ବନ୍ଦ ରଖୁଛନ୍ତି। ଅଂଶୁଘାତ କିମ୍ବା ଗରମଜନିତ ଅସୁସ୍ଥତାରୁ ସୁସ୍ଥହେବା ପାଇଁ ସେମାନଙ୍କୁ ସପ୍ତାହ ସପ୍ତାହ ସମୟ ଲାଗୁଛି। ବିଶେଷକରି ଅସଂଗଠିତ କ୍ଷେତ୍ରର ଦିନମଜୁରିଆ, ଯେଉଁମାନଙ୍କର କୌଣସି ଦରମା ସହ ଛୁଟି କିମ୍ବା ସ୍ବାସ୍ଥ୍ୟ ବୀମା ସୁବିଧା ନାହିଁ, ସେମାନଙ୍କ ଆୟ ସମ୍ପୂର୍ଣ୍ଣ ବନ୍ଦ ହୋଇଯାଉଛି। ଦ୍ୱିତୀୟତଃ, ଏହି ଅସୁସ୍ଥତା କାରଣରୁ ଶ୍ରମିକମାନଙ୍କୁ ନିଜ ପକେଟରୁ ମେଡିକାଲ ଖର୍ଚ୍ଚ ବହନ କରିବାକୁ ପଡ଼ୁଛି, ଯାହା ସେମାନଙ୍କୁ ଦାରିଦ୍ର୍ୟ ସୀମାରେଖା ତଳକୁ ଠେଲିଦେଉଛି।
ଭାରତ, ବାଂଲାଦେଶ, ବ୍ରାଜିଲ, ଫ୍ରାନ୍ସ, ଇଟାଲୀ, ଇଣ୍ଡୋନେସିଆ, ନାଇଜେରିଆ ଏବଂ ଦକ୍ଷିଣ ଆଫ୍ରିକା ଭଳି ୮ଟି ଭିନ୍ନ ଅର୍ଥନୀତି ଆଧାରିତ ଦେଶକୁ ନେଇ ଏହି ଅନୁଧ୍ୟାନ କରାଯାଇଥିଲା। ବ୍ରାଜିଲ, ଫ୍ରାନ୍ସ ଏବଂ ଇଟାଲୀ ଭଳି ଧନୀ ଦେଶଗୁଡ଼ିକରେ କାର୍ଯ୍ୟଦିବସ ନଷ୍ଟର ହାର ସାମାନ୍ୟ କମ୍ ଥିଲେ ମଧ୍ୟ ଗ୍ରୀଷ୍ମ ପ୍ରବାହଜନିତ ମୃତ୍ୟୁ ହେତୁ ବାର୍ଷିକ ଜିଡିପି ପ୍ରାୟ ୨୫ ବିଲିୟନ ଆମେରିକୀୟ ଡଲାର ପର୍ଯ୍ୟନ୍ତ ହ୍ରାସ ପାଉଛି। ରିପୋର୍ଟ ଅନୁଯାୟୀ ଭାରତ, ବାଂଲାଦେଶ ଏବଂ ନାଇଜେରିଆ ଭଳି ବିକାଶଶୀଳ ଦେଶରେ ଦୁର୍ବଳ ସାମାଜିକ ସୁରକ୍ଷା ବ୍ୟବସ୍ଥା ଯୋଗୁ ଏହି ସଙ୍କଟ ଭୟଙ୍କର ରୂପ ଧାରଣ କରିଛି। କୋଇଲା, ତେଲ ଏବଂ ଗ୍ୟାସ୍ ଭଳି ଜୀବାଶ୍ମ ଇନ୍ଧନର ବ୍ୟବହାର ଯୋଗୁ ବିଶ୍ୱର ତାପମାତ୍ରା କ୍ରମାଗତ ଭାବେ ବଢୁଥିବାରୁ ଆଗାମୀ ଦିନରେ ଏହି ଆର୍ଥିକ ତଥା ସ୍ବାସ୍ଥ୍ୟ ସଙ୍କଟ ଆହୁରି ଗମ୍ଭୀର ହେବ ବୋଲି ବୈଜ୍ଞାନିକ ଓ ଅର୍ଥନୀତିଜ୍ଞମାନେ ଚେତାବନୀ ଦେଇଛନ୍ତି।
