ଭୁବନେଶ୍ୱର, ୮।୮(ବ୍ୟୁରୋ): କଟକ ଏସ୍ସିବି ମେଡିକାଲରେ ଆସନ୍ତା ସପ୍ତାହରୁ ଆରମ୍ଭ ହେବ ବହୁ ପ୍ରତୀକ୍ଷିତ ଏକ୍ମୋ ଚିକିତ୍ସା ସେବା। ଏଥିପାଇଁ ସମସ୍ତ ପ୍ରସ୍ତୁତି ସରି ଆସିଲାଣି ବୋଲି ଶନିବାର ଡିଏମ୍ଇଟି ଡା. ସିବିକେ ମହାନ୍ତି ସୂଚନା ଦେଇଛନ୍ତି। ସେ କହିଛନ୍ତି, ଏସ୍ସିବିରେ ୯ଟି ଏକ୍ମୋ ମେଶିନ ସ୍ଥାପନ ହୋଇଛି। ଆବଶ୍ୟକ ମାନବ ସମ୍ବଳ ମଧ୍ୟ ନିଯୁକ୍ତ ହୋଇସାରିଛନ୍ତି। ଗୋଟିଏ ବ୍ୟାଚ୍ କୋଲକାତାରୁ ପ୍ରଶିକ୍ଷଣ ନେଇ ଫେରିଛନ୍ତି। ଏକ୍ମୋ ପାଇଁ ଏସ୍ସିବିରେ ୨ଟି ୟୁନିଟ୍ କରାଯାଇଛି। ପ୍ରଥମ ୟୁନିଟ୍ରେ ୬ଟି ଓ ଦ୍ୱିତୀୟ ୟୁନିଟ୍ରେ ୩ଟି ମେଶିନ ରହିବ। ଦ୍ୱିତୀୟ ୟୁନିଟ୍ର ୩ଟି ମେଶିନ କୋଭିଡ୍ ରୋଗୀଙ୍କୁ ସେବା ଯୋଗାଇବ। ତେବେ କୋଭିଡ୍ ପରବର୍ତ୍ତୀ ଜଟିଳତା ପାଇଁ ଅନ୍ୟ ୬ଟି ମେଶିନ ରହିବ ବୋଲି ଡିଏମ୍ଇଟି ସୂଚନା ଦେଇଛନ୍ତି। ସୂଚନାଯୋଗ୍ୟ, କୋଭିଡ୍ ସମୟରେ ରାଜ୍ୟରେ ଏକ୍ମୋ ମେଶିନ ଅଭାବରୁ ବହୁ ରୋଗୀ ରାଜ୍ୟ ବାହାରକୁ ଚିକିତ୍ସା ଲାଗି ଯାଉଥିଲେ। ଏପରିକି ଏକ୍ମୋ ଅଭାବରୁ ବହୁ ରୋଗୀଙ୍କ ଜୀବନ ରକ୍ଷା ସମ୍ଭବ ହୋଇପାରୁ ନ ଥିଲା ବୋଲି ଅଭିଯୋଗ ହେଉଥିଲା। ଏହାପରେ ରାଜ୍ୟ ସରକାର ଏସ୍ସିବିକୁ ଏକ୍ମୋ ମେଶିନ ଆଣିବାକୁ ନିଷ୍ପତ୍ତି ନେଇଥିଲେ। ପୂର୍ବରୁ ଭୁବନେଶ୍ୱରରେ କେବଳ ଦୁଇଟି ଘରୋଇ ହସ୍ପିଟାଲରେ ଏହି ମେଶିନ ଥିବାବେଳେ କୌଣସି ସରକାରୀ ହସ୍ପିଟାଲରେ ଏହି ଚିକିତ୍ସା ସେବା ଦିଆଯାଉ ନ ଥିଲା। କିଛିଦିନ ତଳେ ଭୁବନେଶ୍ୱର ଏମ୍ସରେ ଏକ୍ମୋ ଚିକିତ୍ସା ଆରମ୍ଭ ହୋଇଥିବାବେଳେ ଏବେ ଏସ୍ସିବିରେ ମିଳିବ।
