ବରଗଡ଼,୨୫।୮(ପ୍ରେମାନନ୍ଦ ଖମାରୀ):ବରଗଡ଼ ସହରରେ ବର୍ଷାଜଳ ନିଷ୍କାସନ ବ୍ୟବସ୍ଥା ଫେଲ୍ ମାରିଛି। ସହରର ବିଭିନ୍ନ ସ୍ଥାନରେ ଏପର୍ଯ୍ୟନ୍ତ ଡ୍ରେନ୍(ନାଳ) ନିର୍ମାଣ ହୋଇପାରି ନାହିଁ। ସେହିପରି ଯେଉଁଠି ନାଳ ରହିଛି, ସେଇଠି ବର୍ଷାଜଳ ନିଷ୍କାସନ ପାଇଁ ନାଳରେ ବାଟ ନାହିଁ। ମଇଳା, ଆବର୍ଜନା ତାହା ପୂରି ରହିଛି। ଅନ୍ୟପଟେ ସହରର ବିଭିନ୍ନ ସ୍ଥାନରେ ଡ୍ରେନ୍ ନିର୍ମାଣ କାମ ଚାଲୁଛି। ବର୍ଷାଧିକ ସମୟରୁ ଆରମ୍ଭ ହୋଇଥିଲେ ମଧ୍ୟ ତାହା ଏପର୍ଯ୍ୟନ୍ତ ସରିନାହିଁ। ଫଳରେ ବର୍ଷା ହେଲେ ସହର ଅବସ୍ଥା ବେହାଲ୍ ହୋଇ ପଡୁଛି। ସହରସ୍ଥିତ ଗଳିକନ୍ଦି ରାସ୍ତାରେ ବନ୍ୟାଭଳି ବର୍ଷାଜଳ ପ୍ରବାହିତ ହେଉଛି। ବିଭିନ୍ନ ୱାର୍ଡର ଘର ଭିତରକୁ ମଧ୍ୟ ମଇଳା, ଆବର୍ଜନା ସହିତ ବର୍ଷାଜଳ ପଶୁଛି। କେବଳ ସେତିକି ନୁହେଁ, ବର୍ଷା ହେଲେ ସରକାରୀ ବସଷ୍ଟାଣ୍ଡ, ସମଗ୍ର ଶିକ୍ଷା କାର୍ଯ୍ୟାଳୟଠାରୁ ଆରମ୍ଭ କରି ଜିଲାପାଳଙ୍କ କାର୍ଯ୍ୟାଳୟ ପାର୍ଶ୍ୱସ୍ଥ ରାସ୍ତାରେ ମଧ୍ୟ ବର୍ଷାଜଳ ଲହଡ଼ି ମାରୁଛି। ତେବେ ସେଠାରେ ବର୍ଷାଜଳ ଦିନେ କି ଦୁଇଦିନ ନୁହେଁ, ଦୀର୍ଘଦିନ ଧରି ଜମି ରହୁଥିବାରୁ ଲୋକଙ୍କୁ ନାହିଁ ନ ଥିବା ହଟହଟାର ସମ୍ମୁଖୀନ ହେବାକୁ ପଡୁଛି।
ସେହିପରି ସହରର ରାସ୍ତାପାର୍ଶ୍ୱ, ପରିବା ବଜାର ଆଦି ସ୍ଥାନରେ ମଧ୍ୟ ବର୍ଷାଜଳ ନିଷ୍କାସନ ବ୍ୟବସ୍ଥା ଭୁଶୁଡ଼ି ପଡ଼ିଛି। ଫଳରେ ଉଠାଦୋକାନୀ, ପରିବା ବିକାଳିଙ୍କୁ ନାହିଁ ନ ଥିବା ହଟହଟାର ସମ୍ମୁଖୀନ ହେବାକୁ ପଡୁଛି। ତେବେ ସହରରେ ଏହା ନୂଆଁ ସମସ୍ୟା ନୁହେଁ, ପ୍ରତିବର୍ଷ ବର୍ଷାଦିନେ ଏଭଳି ସମସ୍ୟା ଲାଗି ରହୁଥିଲେ ସୁଦ୍ଧା ଏପର୍ଯ୍ୟନ୍ତ ଏହାର ସ୍ଥାୟୀ ପ୍ରତିକାର ହୋଇ ପାରି ନାହିଁ। ଏହାକୁ ନେଇ ସହରବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ସୋମବାର ଅପରାହ୍ନରେ ହୋଇଥିବା ବର୍ଷାରେ ସହରର ବିଭିନ୍ନ ଅଞ୍ଚଳ ଜଳମଗ୍ନ ହୋଇ ପଡ଼ିଥିଲା। ଏପରି କି ବରଗଡ଼-ଭେଡ଼େନ ରାସ୍ତାର ଆନନ୍ଦ ମଣ୍ଡପ ପାଖରେ ରହିଥିବା ଏକ ବ୍ରିଜ ଉପରେ ବନ୍ୟା ଭଳି ବର୍ଷାଜଳ ପ୍ରବାହିତ ହୋଇ ନିକଟସ୍ଥ କେନାଲକୁ ଯାଇଥିଲା।
ସେହିପରି ତୋରା ରେଲୱେ ଅଣ୍ଡରପାସ୍ରେ ନଦୀଭଳି ପାଣି ଜମି ରହିବାରୁ ଦୀର୍ଘ ସମୟ ଧରି ସେହି ରାସ୍ତାରେ ଯାତାୟାତ ପ୍ରଭାବିତ ହୋଇଥିଲା। ଅନ୍ୟପଟେ ବକ୍ସ କଣ୍ଡୁଇଟ୍(କେନାଲ ସୌନ୍ଦର୍ଯ୍ୟକରଣ) କାମ ଅଧାପନ୍ତରିଆ ଭାବେ ପଡ଼ି ରହିଥିବା ଯୋଗୁ ବରଗଡ଼-କେନାଲର ଉଭୟ ପାର୍ଶ୍ୱ ମଧ୍ୟ ସ୍ଥାନୀୟ ଘରୋଇ ବସଷ୍ଟାଣ୍ଡ ନିକଟରେ ବିପଦସଙ୍କୁଳ ଅବସ୍ଥାରେ ରହିଛି। ବାଲିବସ୍ତା ପ୍ୟାଚଅପ୍ ମରାଯାଇଛି, ମାତ୍ର ଯେଭଳି ବର୍ଷା ବଢ଼ି ଚାଲିଛି, କେନାଲର ସୁରକ୍ଷା ନେଇ ବିପଦ ଆଶଙ୍କା ମଧ୍ୟ ବଢ଼ିବାରେ ଲାଗିଛି।
Dharitri – Odisha’s No.1 Odia Daily
