ଗଞ୍ଜାମ,୧।୭(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁର ଅଞ୍ଚଳକୁ ଶଟ୍ଡାଉନ୍ ପରେ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ନଜର ଏବେ ଗଞ୍ଜାମ ସହର ଉପରେ। ବୁଧବାର ଜିଲାପାଳ କୁଲାଙ୍ଗେ ଗଞ୍ଜାମ ବ୍ଲକ ଗ୍ରସ୍ତ କରି ବିଭିନ୍ନ ପଞ୍ଚାୟତର ସରପଞ୍ଚ ଓ ସମିତିସଭ୍ୟଙ୍କ ସହ କରୋନା ମୁକାବିଲା ନେଇ ଆଲୋଚନା କରିଛନ୍ତି। ବିଭିନ୍ନ ପଞ୍ଚାୟତର ଗ୍ରାମଗୁଡ଼ିକରେ ଲୋକଙ୍କୁ ମାସ୍କ ପରିଧାନ ଓ ସାମାଜିକ ଦୂରତା ବଜାୟ ରଖିବା ସହିତ ଅତି ଜରୁରୀ କାମ ଥିଲେ ଘରୁ ବାହାରକୁ ବାହାରିବା ନିମନ୍ତେ ପରାମର୍ଶ ଦେଇଛନ୍ତି l ଗଞ୍ଜାମ ବ୍ଲକ ଅଞ୍ଚଳରେ ଗୋଷ୍ଠୀ ସଂକ୍ରମଣକୁ ରୋକିବାକୁ ହେଲେ ଉପରୋକ୍ତ ନିୟମ ପ୍ରତି ଦୃଷ୍ଟି ରଖିବା ପାଇଁ ସେ ଜନ ପ୍ରତିନିଧିଙ୍କୁ କହିଛନ୍ତି l ପରେ ମାସ୍କ ପିନ୍ଧି ନ ଥିବା ଯୋଗୁ ଅଶୋକ ମେଡିଶିନ ଷ୍ଟୋର ଓ ସନ୍ତୋଷ ହୋଟେଲକୁ ୭ ଦିନ ପର୍ଯ୍ୟନ୍ତ ସିଲ୍ କରିଛନ୍ତି। ଏହି ଗ୍ରସ୍ତ ସମୟରେ ଅତିରିକ୍ତ ଜିଲା ପ୍ରକଳ୍ପ ଅଧିକାରୀ ( ଏ ପି ଡି ), ତହସିଲଦାର ଅବନୀ କୁମାର ସାହୁ, ଏନ୍ଏସିଇ ଓ ପ୍ରଭୁ କଲ୍ୟାଣ ଦାସ ପ୍ରମୁଖ ଉପସ୍ଥିତ ଥିଲେl
