ବରଗଡ଼,୨।୭(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ପ୍ରମାଣପତ୍ର ପାଇଁ ଦିବ୍ୟାଙ୍ଗମାନେ ହଟହଟା ହେବା ସାଧାରଣରେ ପରିଣତ ହୋଇଛି। କେତେବେଳେ ପ୍ରମାଣପତ୍ର ଇସ୍ୟୁ କରିବାକୁ ଡାକ୍ତର ନାହାନ୍ତି ତ ଆଉକେବେ ନିର୍ଦ୍ଧାରିତ ସମୟ ସରି ଯାଇଥିବା କୁହାଯାଉଛି। ଫଳରେ ଜିଲାର ଦୂରଦୂରାନ୍ତରରୁ ଆସିଥିବା ଦିବ୍ୟାଙ୍ଗଙ୍କୁ ନିରାଶରେ ଘରକୁ ଫେରିବାକୁ ପଡୁଛି। ବୁଧବାର ବରଗଡ଼ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ର ପରିସରରେ ରହିଥିବା ଜିଲା ମୁଖ୍ୟ ସ୍ବାସ୍ଥ୍ୟ ଅଧିକାରୀ(ସିଡ଼ିଏମଓ)ଙ୍କ କାର୍ଯ୍ୟାଳୟ ପରିସରରେ ଏଭଳି ସ୍ଥିତି ପରିଲକ୍ଷିତ ହୋଇଥିଲା। ଜିଲାର ବିଭିନ୍ନ ବ୍ଲକରୁ ଦିବ୍ୟାଙ୍ଗମାନେ ପ୍ରମାଣପତ୍ର ପାଇଁ ଉକ୍ତ କାର୍ଯ୍ୟାଳୟକୁ ପହଞ୍ଚି ଥିଲେ। କିଏ ନିଜେ ଆସିଥିଲେ ତ ଆଉ କେହି ସେମାନଙ୍କ ଅଭିଭାବକଙ୍କ ସହିତ ଆସିଥିଲେ। ସେମାନଙ୍କ ମଧ୍ୟରେ ଶିଶୁଠାରୁ ବୃଦ୍ଧ ପର୍ଯ୍ୟନ୍ତ ରହିଥିଲେ। ଅନେକ ଗାଡ଼ି ଭଡ଼ା କରି ମଧ୍ୟ ଏହି କାର୍ଯ୍ୟାଳୟକୁ ପହଞ୍ଚି ଥିଲେ ଏବଂ ଦିବ୍ୟାଙ୍ଗ ପ୍ରମାଣପତ୍ର ଧରି ଘରକୁ ଫେରିବେ ବୋଲି ମନରେ ଆଶା ବାନ୍ଧିଥିଲେ। ମାତ୍ର ସେମାନଙ୍କ ପ୍ରମାଣପତ୍ର ହୋଇପାରି ନଥିଲା। ଡାକ୍ତରଙ୍କ କାର୍ଯ୍ୟବନ୍ଦ ଆନ୍ଦୋଳନ ଯୋଗୁ ଦିବ୍ୟାଙ୍ଗ ପ୍ରମାଣପତ୍ର ହୋଇ ପାରିବ ନାହିଁ ବୋଲି ଉପସ୍ଥିତ କର୍ମଚାରୀମାନେ କହିଥିଲେ। ଶେଷରେ ନିରାଶ ହୋଇ ଦିବ୍ୟାଙ୍ଗମାନେ ପୁଣି ଘରକୁ ଫେରିଥିଲେ।
Dharitri – Odisha’s No.1 Odia Daily
