ବରଗଡ଼,୨।୧(ପ୍ରେମାନନ୍ଦ ଖମାରୀ):ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବକୁ ଆଉମାତ୍ର ୨ଦିନ ବାକି। ଆସନ୍ତା ୩ତାରିଖ ଶୁକ୍ରବାର ଦିନରୁ ଏହି ମହୋତ୍ସବ ଆରମ୍ଭ ହୋଇ ୧୩ତାରିଖ ପର୍ଯ୍ୟନ୍ତ ଚାଲିବ। ଶୁକ୍ରବାର ଦିନ ୨ଟାରେ ଧନୁଯାତ୍ରାକୁ ସ୍ବାଗତ କରିବା ପାଇଁ ସାଂସ୍କୃତିକ ଶୋଭାଯାତ୍ରା ଅନୁଷ୍ଠିତ ହେବ। ସେହିପରି ସେହିଦିନ ସନ୍ଧ୍ୟା ୭ଟାରେ ହାଟପଦା ରାଜ ଦରବାରରେ ଧନୁଯାତ୍ରା ମହୋତ୍ସବର ଉଦ୍ଘାଟନୀ କାର୍ଯ୍ୟକ୍ରମ ରହିଛି। ଦୀର୍ଘ ୧୧ଦିନର ଏହି ଅବଧିରେ ବରଗଡ଼ ସହର ମଥୁରାନଗରୀ ଏବଂ ଅମ୍ବାପାଲି ଗୋପପୁର ପାଲଟିବ। ବରଗଡ଼ ସହର ଏବଂ ଅମ୍ବାପାଲି ମଧ୍ୟରେ ପ୍ରବାହିତ ଜୀରାନଦୀ ହେବ ଯମୁନା। ଫଳରେ ଏହି ମହୋତ୍ସବ ଯେତେ ପାଖେଇ ଆସୁଛି, ଉଭୟ ବରଗଡ଼ ସହର ଏବଂ ଅମ୍ବାପାଲି ସେଭଳି ଚଳଚଞ୍ଚଳ ହୋଇ ପଡ଼ୁଛି।
ଧନୁଯାତ୍ରା ମହୋତ୍ସବରେ ଉତ୍କୃଷ୍ଟ ଅଭିନୟ ପାଇଁ କଳାକାରଙ୍କ ପୂର୍ବାଭ୍ୟାସ ସରି ଯାଇଛି। ସେହିପରି ଉଭୟ ବରଗଡ଼ ଏବଂ ଅମ୍ବାପାଲିରେ ମଞ୍ଚ ସାଜସଜ୍ଜା, ତୋରଣ, ଘର ଲିପାପୋଛା ଆଦି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି। ବରଗଡ଼ ହାଟପଦା ଏବଂ ଲୋକ ମଣ୍ଡପ ପଡ଼ିଆରେ ସୁଉଚ୍ଚ କଂସ ଦରବାର ନିର୍ମାଣାଧିନ ରହିଛି। ଅନ୍ୟ ମଞ୍ଚଗୁଡ଼ିକର ନିର୍ମାଣ ମଧ୍ୟ ଜୋରସୋର୍ରେ ଚାଲିଛି। ସହରକୁ ରଙ୍ଗବେରଙ୍ଗର ଆଲୋକୀକରଣ ବ୍ୟବସ୍ଥା ଚାଲିଥିବାବେଳେ ବିଭିନ୍ନ ସ୍ଥାନରେ ତୋରଣ ନିର୍ମାଣ ଚାଲିଛି। ବୁଧବାର ବରଗଡ଼ ସହରର ପ୍ରବେଶ ଦ୍ୱାରରେ ଏକ ସୁନ୍ଦର, ଆକର୍ଷଣୀୟ ସ୍ବାଗତ ତୋରଣ ଉଦ୍ଘାଟିତ ହୋଇଛି।
ଅମ୍ବାପାଲିରେ ମଧ୍ୟ ଅନୁରୂପ ପ୍ରସ୍ତୁତି ଚାଲିଛି। ପ୍ରତି ଘର ଲିପାପୋଛା ହୋଇଥିବାବେଳେ ଘରକାନ୍ଥରେ ଶ୍ରୀକୃଷ୍ଣଙ୍କ ବାଲ୍ୟଲୀଳା ଆଧାରିତ ଚିତ୍ର ଅଙ୍କନ ହୋଇଛି। ବୁଧବାର ଧନୁଯାତ୍ରା ପ୍ରଚାର ପ୍ରସାର କମିଟି ପକ୍ଷରୁ ବରଗଡ଼ ପାର୍ବତୀ ଗିରି ମହିଳା କଲେଜ ସମ୍ମୁଖରେ ରଙ୍ଗୋଲୀ ପ୍ରତିଯୋଗିତା ହୋଇଛି। ଏଥିରେ ଅନେକ ଶିଳ୍ପୀ ସାମିଲ ଥିବାବେଳେ ସୁନ୍ଦର ରଙ୍ଗୋଲୀ ଅଙ୍କନ କରିଥିଲେ। ସେହିପରି ଜର୍ଜ ହାଇସ୍କୁଲରେ ମୀନାବଜାର, ଲେଙ୍ଗୁ ମିଶ୍ର ଷ୍ଟାଡ଼ିୟମରେ ଜାତୀୟ ହସ୍ତତନ୍ତ ମେଳା, ପୁରୁଣା ଜୀରାବ୍ରିଜ ନିକଟରେ ପଲ୍ଲିଶ୍ରୀ ମେଳା ଉଦ୍ଘାଟନ ଅପେକ୍ଷାରେ ଥିବାବେଳେ ବିଭିନ୍ନ ଘରକରଣା, ଖେଳଣା ସାମଗ୍ରୀ ଧରି ରାଜ୍ୟ ବାହାର ଅନେକ ଦୋକାନୀ ବରଗଡ଼ ପହଞ୍ଚତ୍ ଫୁଟପାଥ୍ରେ ନିଜର ବ୍ୟବସାୟ ଆରମ୍ଭ କରି ଦେଇଛନ୍ତି। ଏଭଳି ଦୃଷ୍ଟିକୋଣରୁ ବରଗଡ଼ ସହର ରାସ୍ତାଘାଟରେ ଧନୁଯାତ୍ରା ନ ଆସୁଣୁ ଧିରେଧିରେ ପୂର୍ବାପେକ୍ଷା ଜନଗହଳି ମଧ୍ୟ ବଢ଼ିବାରେ ଲାଗିଛି।
