ବରଗଡ଼,୧।୭(ପ୍ରେମାନନ୍ଦ ଖମାରୀ):ବରଗଡ଼ ଥାନାଛକ ଆଗରେ ରହିଥିବା ଧନୁଯାତ୍ରା ତୋରଣ ଭାଙ୍ଗିବା ଘଟଣାକୁ ମାସେ ବିତିଯାଇଛି। ହେଲେ ଏପର୍ଯ୍ୟନ୍ତ ଏହି ଘଟଣା ପାଇଁ ଦାୟୀ କୌଣସି ଅଧିକାରୀଙ୍କ ବିରୋଧରେ କିଛି କାର୍ଯ୍ୟାନୁଷ୍ଠାନ ନିଆଯାଇ ନାହିଁ। ବରଗଡ଼ ପୌରାଧ୍ୟକ୍ଷା କଳ୍ପନା ମାଝୀଙ୍କ ଏତଲାକ୍ରମେ କେବଳ ସ୍ଥାନୀୟ ଟାଉନ ଥାନାରେ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ଅରୁଣ ପାଣ୍ଡେ ଓ ଅନ୍ୟମାନଙ୍କ ବିରୋଧରେ ଏକ ମାମଲା ରୁଜୁ ହୋଇଛି। ଘଟଣାଟି ସେହି ମାମଲାରେ ହିଁ ସୀମିତ ରହିଛି। ଅନ୍ୟପଟେ ଏହି ମାମଲାରେ ଅଭିଯୁକ୍ତ ଭାବେ ରହିଥିବା ଅଧିକାରୀ ଚିରାଚରିତ ଭାବେ କାର୍ଯ୍ୟରତ ଅଛନ୍ତି। ସେହିପରି ରାଜ୍ୟ ସରକାରଙ୍କ ପୂର୍ତ୍ତ ବିଭାଗର ଏକ ଟିମ୍ ଘଟଣାସ୍ଥଳ ପରିଦର୍ଶନ ସହିତ ଲୋକଦେଖାଣିଆ ତଦନ୍ତ ସାରି ଫେରି ଯାଇଛନ୍ତି ଏବଂ ତାହା ମଧ୍ୟ ତଦନ୍ତରେ ସୀମିତ ରହିଛି। ସ୍ଥାନୀୟ ଏମ୍ପି ପ୍ରଦୀପ ପୁରୋହିତ ଓ ବିଧାୟକ ଅଶ୍ୱିନୀ କୁମାର ଷଡ଼ଙ୍ଗୀ ଏହାର ତଦନ୍ତ ସହିତ କାର୍ଯ୍ୟାନୁଷ୍ଠାନ ନେବାକୁ ଯଥାକ୍ରମେ ମୁଖ୍ୟମନ୍ତ୍ରୀ ଓ ଜିଲାପାଳଙ୍କୁ ଲେଖି ଜଣାଇଥିଲେ। ଇତିମଧ୍ୟରେ ମାସେରୁ ଅଧିକ ସମୟ ଅତିବାହିତ ହୋଇଯାଇଛି, କିନ୍ତୁ ଏଯାଏ କାର୍ଯ୍ୟାନୁଷ୍ଠାନ ଶୂନ। ଅପରପକ୍ଷେ ଜଳସମ୍ପଦ ବିଭାଗ ଅଧୀନରେ ବକ୍ସ କଣ୍ଡୁଇଟ୍ (କେନାଲ ସୌନ୍ଦର୍ଯ୍ୟକରଣ ପାଇଁ କରାଯାଇଥିବା କାର୍ଯ୍ୟ) ନିର୍ମାଣରେ ହୋଇଥିବା ଅନିୟମିତତା, ଅବହେଳାକୁ ନେଇ ବିରୋଧୀ ଦଳ ବିଜେଡି ଅଭିଯୋଗ କରିବା ଘଟଣାରେ ବିଭାଗୀୟ ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀ ଏବଂ ସହକାରୀ ନିର୍ବାହୀ ଯନ୍ତ୍ରୀଙ୍କୁ କାର୍ଯ୍ୟରୁ ନିଲମ୍ବନ କରିବା ସହିତ ପରବର୍ତ୍ତୀ ସମୟରେ ନିଲମ୍ବିତ ସହକାରୀ ନିର୍ବାହୀ ଯନ୍ତ୍ରୀଙ୍କ ଏତଲାକ୍ରମେ ସମ୍ପୃକ୍ତ ଠିକାଦାରଙ୍କ ବିରୋଧରେ ସ୍ଥାନୀୟ ଟାଉନ ଥାନାରେ ମାମଲା ରୁଜୁ ହୋଇଥିଲା। ତେବେ ଉପରୋକ୍ତ ୨ ଘଟଣାକୁ ଅନୁଧ୍ୟାନ କଲେ ବିରୋଧୀ ଦଳର ଅଭିଯୋଗ ଉପରେ ରାଜ୍ୟ ସରକାର କାର୍ଯ୍ୟାନୁଷ୍ଠାନ ନେବାକୁ ତପତ୍ରତା ଦେଖାଇ ଥିବାବେଳେ ଖୋଦ୍ ଶାସକ ଦଳର ବିଧାୟକ, ଏମ୍ପିଙ୍କ ଚିଠି ଉପରେ ନୀରବତା ଅବଳମ୍ବନ କରିବା ଜିଲାରେ ଚର୍ଚ୍ଚାର ବିଷୟ ହୋଇଛି।
ଗତ ମେ’ ୨୫ ତାରିଖରେ କାଳବୈଶାଖୀ ହୋଇଥିଲା। ସେହି ସମୟରେ ସ୍ଥାନୀୟ ଟାଉନ ଥାନା ସମ୍ମୁଖରେ ରହିଥିବା ଧନୁଯାତ୍ରା ସ୍ମାରକୀ ସ୍ବାଗତ ତୋରଣ ଭାଙ୍ଗି ଯାଇଥିଲା। ହେଲେ ଏହି ଘଟଣାରେ ସମ୍ପୃକ୍ତ ଅଧିକାରୀ ଗିରଫ ହେବା ତ ଦୂରର କଥା, ଏପର୍ଯ୍ୟନ୍ତ କାହାରିକୁ ନିଲମ୍ବନ ମଧ୍ୟ କରାଯାଇ ନାହିଁ। ଅଭିଯୋଗ ପରେ କେବଳ ଜିଲାର ଅନ୍ୟ ସ୍ଥାନରେ ରହିଥିବା ତୋରଣଗୁଡ଼ିକ ଉପରେ ପ୍ରଶାସନ ନଜର ରଖିଥିଲା ଏବଂ ଆଗକୁ ଯେଭଳି ଧନୁଯାତ୍ରା ତୋରଣ ଭାଙ୍ଗିବା ଘଟଣାର ପୁନରାବୃତ୍ତି ନ ହେବ, ସେଥିପାଇଁ ସେହି ତୋରଣଗୁଡ଼ିକରେ ସପୋର୍ଟିଂ ବ୍ୟବସ୍ଥା କରାଯାଇଥିବା ସୂଚନା ମିଳିଛି।
ଅନ୍ୟପଟେ ଘଟଣା ପରଠୁ ତୋରଣ ପାଇଁ ରାସ୍ତାର ଉଭୟ ପାର୍ଶ୍ୱରେ ନିର୍ମିତ ୨ସ୍ତମ୍ଭ କେବଳ ଥିବାବେଳେ ଭଗ୍ନ ଅଂଶକୁ ସେହିଦିନ ହିଁ ରାତାରାତି ଘଟଣାସ୍ଥଳରୁ ପ୍ରଥମେ ସ୍ଥାନୀୟ ସରକାରୀ ବସ୍ଷ୍ଟାଣ୍ଡ ଏବଂ ପରେ ପୂର୍ତ୍ତ ବିଭାଗ କାର୍ଯ୍ୟାଳୟ ପରିସରକୁ ଉଠାଇ ନିଆଯାଇଥିଲା। ସେଠାରେ ତାକୁ ମରାମତି କରାଯାଇଥିବା କୁହାଯାଉଛି। ତେବେ ମରାମତି ପରେ ପୁଣି ତାକୁ ଥାନାଛକରେ ସ୍ଥାପନ ପାଇଁ ଯୋଜନା ଚାଲିଥିବା ଶୁଣିବାକୁ ମିଳୁଛି। କିନ୍ତୁ ସେଠାରେ ସେଭଳି ତୋରଣ ସ୍ଥାପନ ହେଲେ ପୁଣି ବିରୋଧର ସମ୍ମୁଖୀନ ହେବାର ସମ୍ଭାବନା ରହିଛି। ଏ ନେଇ ପୂର୍ବରୁ କେତେକ ସଂଗଠନ ଜିଲାପାଳଙ୍କୁ ଦାବିପତ୍ର ମଧ୍ୟ ପ୍ରଦାନ କରି ସାରିଛନ୍ତି। ତେବେ କେବଳ ଥାନାଛକ ତୋରଣ ନୁହେଁ, ସେହିଦିନ ହଳଦୀପାଲି ଛକ ନିକଟରେ ରହିଥିବା ତୋରଣରେ ଲାଗିଥିବା ଧନୁ କ୍ଷତିଗ୍ରସ୍ତ ହୋଇଥିବାବେଳେ ଏହା ପୂର୍ବରୁ ବରପାଲି ନିକଟରେ ରହିଥିବା ତୋରଣ ଭୁଶୁଡ଼ି ପଡ଼ିଥିଲା। ଏହା ସହିତ ଜିଲାର ବିଭିନ୍ନ ସ୍ଥାନରେ ଆହୁରି ଅନେକ ତୋରଣ ନିର୍ମାଣ ହୋଇଛି ଏବଂ ତା’ର ସ୍ଥାୟିତ୍ୱକୁ ନେଇ ଲୋକେ ମଧ୍ୟ ସନ୍ଦିହାନରେ ରହିଛନ୍ତି। ତେବେ ତୋରଣ ନିର୍ମାଣରେ ହୋଇଥିବା ଦୁର୍ନୀତିର ଉଚ୍ଚସ୍ତରୀୟ ତଦନ୍ତ ସହିତ କାର୍ଯ୍ୟାନୁଷ୍ଠାନ ପାଇଁ ବିଭିନ୍ନ ମହଲରେ ଦାବି ହୋଇ ଆସୁଛି।
Dharitri – Odisha’s No.1 Odia Daily
