ଢେଙ୍କାନାଳ ଅଫିସ, ୨।୧୧: ଆରମ୍ଭ ହୋଇଛି ଧର୍ମମାସ କାର୍ତ୍ତିକ। କାର୍ତ୍ତିକ ସୋମବାରରେ ଶିବଦର୍ଶନ କଲେ ମହାଦେବଙ୍କ ଅପାର କରୁଣା ମିଳେ ବୋଲି କାହିଁ କେଉଁ କାଳରୁ ବିଶ୍ୱାସ ରହିଛି। ହେଲେ ଚଳିତବର୍ଷ କରୋନା ଭକ୍ତ-ଭଗବାନଙ୍କ ମଧ୍ୟରେ ଦୂରତା ସୃଷ୍ଟି କରିଛି। ସଂକ୍ରମଣ ଭୟରେ ମଠ, ମନ୍ଦିରରେ ସାଧାରଣଙ୍କ ଦର୍ଶନ ଉପରେ କଟକଣା ଲାଗିଥିବାବେଳେ ପୀଠରେ କାର୍ତ୍ତିକ ବ୍ରତ ପାଳନ କରିବାରୁ ବଞ୍ଚତ୍ତ ହୋଇଛନ୍ତି ଶ୍ରଦ୍ଧାଳୁ। କାର୍ତ୍ତିକ ମାସରେ ଶିବ ଦର୍ଶନ କରି ନ ପାରିବା ମାନସିକଧାରୀଙ୍କ ଭାବାବେଗକୁ ଆଘାତ ପହଞ୍ଚାଇଥିବାବେଳେ ଭାଙ୍ଗିଯାଇଛି ବ୍ରତଧାରୀଙ୍କ ମନ।
ଢେଙ୍କାନାଳର ମନ୍ଦିର ପର୍ଯ୍ୟଟନରେ କପିଳାସ ଶୈବପୀଠର ସ୍ଥାନ ସ୍ବତନ୍ତ୍ର। ବର୍ଷତମାମ ଏଠାକୁ ଭକ୍ତଙ୍କ ସମାଗମ ହେଉଥିଲେ ମଧ୍ୟ ଶ୍ରାବଣ କାଉଡ଼ିଯାତ୍ରା ଏବଂ କାର୍ତ୍ତିକରେ ଅସମ୍ଭାଳ ଭିଡ଼ ହୋଇଥାଏ। ବିଶେଷ କରି କାର୍ତ୍ତିକ ସୋମବାରରେ ଜିଲା ସମେତ ରାଜ୍ୟର ବିଭିନ୍ନ ସ୍ଥାନରୁ ମାନସିକଧାରୀମାନେ ଏଠାକୁ ଆସି ଶ୍ରୀଚନ୍ଦ୍ରଶେଖରଜୀଉଙ୍କ ଦର୍ଶନ କରିଥାନ୍ତି। ପୁରୀ ଯିବାକୁ ସାମର୍ଥ୍ୟ ନ ଥିବା ହବିଷିଆଳିମାନେ ଶୈବପୀଠ ସମେତ ଆଖପାଖ ମନ୍ଦିରରେ ବ୍ରତ ପାଳନ କରିଥାନ୍ତି। ହେଲେ ଚଳିତବର୍ଷ କରୋନା ସଂକ୍ରମଣ ଭୟରୁ ୭ମାସ ହେଲା ସରକାରୀ ନିର୍ଦ୍ଦେଶ ଅନୁଯାୟୀ ସର୍ବସାଧାରଣଙ୍କ ଲାଗି ମନ୍ଦିର ଦର୍ଶନ ବନ୍ଦ ରହିଛି। ଏପରି କି ପ୍ରସାଦ ମଧ୍ୟ ବାହାରି ପାରୁନାହିଁ। ତେଣୁ ବ୍ରତଧାରୀମାନେ କିଭଳି ଠାକୁର ଦର୍ଶନ କରିବେ ଏବଂ ପ୍ରସାଦ ପାଇବେ ତାହାକୁ ନେଇ ଦ୍ୱନ୍ଦ୍ୱରେ ପଡ଼ିଛନ୍ତି। କେବଳ କପିଳାସ ନୁହେଁ, ଜିଲାର ସମସ୍ତ ଶୈବପୀଠ ସମେତ ପ୍ରସିଦ୍ଧ ବଳରାମ ମନ୍ଦିର, ଜଗନ୍ନାଥ ମନ୍ଦିରରେ ସମାନ ପରିସ୍ଥିତି ସୃଷ୍ଟି ହୋଇଛି। ନଭେମ୍ବରରୁ ମନ୍ଦିର ଖୋଲିବା ନେଇ ସରକାର ସ୍ଥାନୀୟ ପ୍ରଶାସନ ଉପରେ ନିଷ୍ପତ୍ତି ଛାଡ଼ିଛନ୍ତି। ହେଲେ ଏବେ ସୁଦ୍ଧା କୌଣସି ପଦକ୍ଷେପ ନିଆଯାଇ ନାହିଁ। ତେଣୁ ସରକାରୀ କଟକଣା ବଳବତ୍ତର ରହିବ ବୋଲି ମନ୍ଦିର ପରିଚାଳନା କମିଟିଗୁଡ଼ିକ ପକ୍ଷରୁ ସ୍ପଷ୍ଟ କରାଯାଇଛି। ଅନ୍ୟପଟେ କଟକଣା ଜଗିବାକୁ ପୀଠରେ ପୋଲିସ ମୁତୟନ କରାଯାଇଛି।
ଭକ୍ତଙ୍କ ଭାବାବେଗକୁ ଆଘାତ ଲାଗିଛି
କାର୍ତ୍ତିକ ମାସରେ ଶ୍ରଦ୍ଧାଳୁଙ୍କ ମଧ୍ୟରେ ଥିବା ଆଧ୍ୟାତ୍ମିକ ଭାବାବେଗକୁ କରୋନା ପାଇଁ ଆଘାତ ଲାଗିଛି। ଦେବଦେବୀ ପୀଠ ବନ୍ଦ ଥିବାରୁ ପ୍ରଥମ ସୋମବାର ଶ୍ରଦ୍ଧାଳୁମାନେ ଦିଅଁ ଦର୍ଶନରୁ ବଞ୍ଚତ୍ତ ହେବେ। ସୁସ୍ଥ ଜୀବନ ପାଇଁ ସମସ୍ତେ କଟକଣାକୁ ପାଳନ କରିବା ଜରୁରୀ।
-ଅବନୀ ମିଶ୍ର, ପ୍ରବାଚକ
ହବିଷିଆଳି, ବ୍ରତଧାରୀଙ୍କ
ସମସ୍ୟା ବଢ଼ିଛି
କାର୍ତ୍ତିକରେ ଶିବାଳୟ ବନ୍ଦ ରହିବା ଭକ୍ତଙ୍କୁ ନିରାଶ କରିଛି। ଧର୍ମମାସରେ ମନ୍ଦିରକୁ ଯାଇ ଶିବ ଉପାସନା କରିବା ପରମ୍ପରା ରହିଛି। କିନ୍ତୁ କରୋନା କଟକଣା ଯୋଗୁ ମନ୍ଦିର ବନ୍ଦ ରହିଛି। ଏହାକୁ ନେଇ ହବିଷିଆଳି, ବ୍ରତଧାରୀ
ସମସ୍ୟାରେ ପଡ଼ିଛନ୍ତି।
-ଦୀପାଞ୍ଜଳି ବେହେରା, ଗୃହିଣୀ
