ସମ୍ବଲପୁର,୮।୭(ପ୍ରମୋଦ ବହିଦାର): ସମ୍ପ୍ରତ୍ତି କେବଳ ମହିଳାଙ୍କ ବିକାଶ ନୁହେଁ, ବରଂ ମହିଳାମାନଙ୍କ ନେତୃତ୍ୱରେ ସମାଜର ସର୍ବାଙ୍ଗୀନ ବିକାଶ ହେଉଛି। ମହିଳାଙ୍କ ବିକାଶରେ ମିଶନ ଶକ୍ତି ଓ ସୁଭଦ୍ରା ଯୋଜନା ଆଣିବ ବଡ଼ ପରିବର୍ତ୍ତନ ବୋଲି କହିଛନ୍ତି ଓଡ଼ିଶାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା। ସମ୍ବଲପୁରକୁ ଦୁଇ ଦିନିଆ ଗସ୍ତରେ ଆସି ବୁଧବାର ପ୍ରଥମ ଦିବସରେ ବସନ୍ତପୁର ସ୍ଥିତ ଆଇଆଇଏମ୍ ସମ୍ମିଳନୀ କକ୍ଷରେ ଆୟୋଜିତ ‘ଆଞ୍ଚଳିକ ଶୁଭଦ୍ରା ଶକ୍ତି ଭିଜନ ସମ୍ମିଳନୀ’ରେ ଯୋଗଦେଇ ଉପମୁଖ୍ୟମନ୍ତ୍ରୀ ପରିଡ଼ା ଏହା କହିଛନ୍ତି।
ଏହି ଅବସରରେ ସେ ମହିଳା ସଶକ୍ତୀକରଣ ଉପରେ ଗୁରୁତ୍ୱାରୋପ କରି କହିଛନ୍ତି, ସମାଜରେ ବର୍ତ୍ତମାନ ମହିଳାମାନଙ୍କ ବିକାଶର ଆବଶ୍ୟକତା ନାହିଁ, ବରଂ ମହିଳାମାନେ ନିଜେ ହିଁ ବିକାଶର ନେତୃତ୍ୱ ନେଉଛନ୍ତି। ମିଶନ ଶକ୍ତି ଓ ସୁଭଦ୍ରା ଯୋଜନା ମାଧ୍ୟମରେ ମହିଳାମାନଙ୍କ ଦକ୍ଷତା, ସଂଚୟ ପ୍ରବୃତ୍ତି ଓ ଅନୁଭବ ବୃଦ୍ଧି ପାଉଛି ଏବଂ ସେମାନେ ଆତ୍ମନିର୍ଭରଶୀଳ ହେଉଛନ୍ତି। ଏଥିରେ ଯୋଡ଼ି ହୋଇଥିବା ୭୦ ଲକ୍ଷ ମା’ମାନେ ହିଁ ମିଶନ ଶକ୍ତି ବିଭାଗକୁ ବଡ଼ କରିଛନ୍ତି। ରାଜ୍ୟରେ ମହିଳାମାନଙ୍କ ଅର୍ଥନୈତିକ ପ୍ରଗତି ସମ୍ପର୍କରେ ସୂଚନା ଦେଇ ସେ କହିଥିଲେ ଯେ ଓଡ଼ିଶାର ପ୍ରାୟ ୨୬ ଲକ୍ଷ ୪୦ ହଜାର ମହିଳା ଆଜି ଲକ୍ଷପତି ଦିଦି ଭାବେ ନିଜକୁ ପ୍ରତିଷ୍ଠିତ କରି ସାରିଛନ୍ତି ଏବଂ ଏହି ମାମଲାରେ ଓଡ଼ିଶା ଦେଶରେ ଏକ ନମ୍ବର ସ୍ଥାନରେ ରହିଛି।
ରାଜ୍ୟରେ ବର୍ତ୍ତମାନ ସୁଦ୍ଧା ୨୬ ଲକ୍ଷ ୪୦ ହଜାରରୁ ଅଧିକ ମହିଳା ‘ଲକ୍ଷପତି ଦିଦି’ ଶ୍ରେଣୀରେ ପହଞ୍ଚି ସାରିଥିବା ବେଳେ କେବଳ ବିଗତ ବର୍ଷକ ମଧ୍ୟରେ ୧୧ ଲକ୍ଷ ମହିଳା ଏହି ସଫଳତା ହାସଲ କରିଛନ୍ତି। ଯାହା ସାରା ଦେଶରେ ଓଡ଼ିଶାକୁ ପ୍ରଥମ ସ୍ଥାନରେ ପହଞ୍ଚାଇଛି। ସରକାର ୨୦୩୦ ସୁଦ୍ଧା ୨୭ ଲକ୍ଷ ମହିଳାଙ୍କୁ ଲକ୍ଷପତି କରିବାକୁ ଲକ୍ଷ୍ୟ ରଖିଥିବା ବେଳେ ମା’ମାନଙ୍କର ଦକ୍ଷତା ଯୋଗୁଁ ଏହି ଲକ୍ଷ୍ୟ ୨୦୨୬ ସୁଦ୍ଧା ପୂରଣ ହୋଇଯିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ। ଏହି କାର୍ଯ୍ୟକ୍ରମରେ ସମ୍ବଲପୁର, ବରଗଡ଼, ଝାରସୁଗୁଡ଼ା, ସୋନପୁର ଏବଂ ବଲାଙ୍ଗୀର ଜିଲାର ବ୍ଲକ ସ୍ତରୀୟ ମହାସଂଘ (ବିଏଲଏଫ)ର ପ୍ରତିନିଧି ଓ ସଦସ୍ୟମାନେ ଉପସ୍ଥିତ ଥିଲେ। ସେ ବିଏଲଏଫ ନେତ୍ରୀମାନଙ୍କର କହିବାର ଭାଷା, ଚାତୁରୀ ଏବଂ ଉପସ୍ଥାପନା ଶୈଳୀକୁ ଉଚ୍ଚ ପ୍ରଶଂସା କରିବା ସହ ଏହା ଆଇଆଇଏମ ସାର୍ଟିଫିକେଟ ସହ ସମାନ ବୋଲି ମତ ଦେଇଥିଲେ। ମହିଳାମାନଙ୍କୁ ନିରାପଦରେ ଏବଂ ସ୍ୱାଭିମାନର ସହ କାମ କରିବାକୁ ପରାମର୍ଶ ଦେଇଥିଲେ। କୌଣସି ପରିସ୍ଥିତିରେ ମଧ୍ଯ କାହାକୁ ଡରିବାର ଆବଶ୍ୟକତା ନାହିଁ । ଯଦ୍ବାରା ମହିଳାମାନେ ନିଜର ପରିଚୟ ସେମାନେ ନିଜେ ସୃଷ୍ଟି କରି ପାରିବେ। ଉପମୁଖ୍ୟମନ୍ତ୍ରୀ ମା’ମାନଙ୍କୁ ସେମାନଙ୍କ ସଫଳତାର କାହାଣୀ ଇନଷ୍ଟାଗ୍ରାମ ଭଳି ସୋସିଆଲ ମିଡିଆରେ ଶେୟାର କରିବାକୁ ଅନୁରୋଧ କରିଥିଲେ। ଏହାଦ୍ବାରା ଆତ୍ମନିର୍ଭରଶୀଳତା ପ୍ରତି ଦେଶର ଲକ୍ଷ ଲକ୍ଷ ମହିଳା ଅନୁପ୍ରାଣିତ ହୋଇପାରିବେ। ବ୍ଲକ ସ୍ତରୀୟ ବ୍ୟାଙ୍କିଙ୍ଗ କମିଟି(ବିଏଲବିସି) ବୈଠକରେ ବିଏଲଏଫ ସଦସ୍ୟମାନଙ୍କୁ ସାମିଲ କରିବା ପାଇଁ ସେ ପ୍ରତିଶ୍ରୁତି ଦେଇଥିଲେ। ଏହାସହ ଏଥିପାଇଁ ଜିଲାପାଳମାନଙ୍କୁ ନିର୍ଦ୍ଦେଶ ଦିଆଯିବ ବୋଲି କହିଥିଲେ। ସମ୍ମିଳନୀରେ ସମ୍ବଲପୁର ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦାର ଏବଂ ଜିଲାପରିଷଦ ମୁଖ୍ଯ ଉନ୍ନୟନ ଓ କାର୍ଯ୍ଯନିର୍ବାହୀ ଅଧିକାରୀ(ସିଡିଓ) ପ୍ରସନ୍ନ କୁମାର ପାତ୍ର ମୁଖ୍ୟ ଭୂମିକା ଗ୍ରହଣ କରିଥିଲେ । ଏଥିରେ ସମ୍ବଲପୁର ଏମପିଙ୍କ ପ୍ରତିନିଧି ପୂର୍ବତନ ବିଧାୟକ ନାଉରୀ ନାୟକ, ଆଇଆଇଏମ ନିର୍ଦ୍ଦେଶକ ମହାଦେବ ଜୈସୱାଲ ପ୍ରମୁଖ ଉପସ୍ଥିତ ଥିଲେ।
