ପରଜଙ୍ଗ, ୬।୮(ଡି.ଏନ.ଏ.) ଜଙ୍ଗଲରେ କଟାଯାଇ ପଡ଼ିଛି ଲକ୍ଷାଧିକ ଟଙ୍କାର ମୂଲ୍ୟବାନ କାଠ। ସୂଚନା ପାଇ ଘଟଣାସ୍ଥଳରେ ତଦନ୍ତ କରିଛନ୍ତି ବନ ଅଧିକାରୀ। ହେଲେ କାଠ ଜବତ କରାଯାଉନାହିଁ। କେବଳ କାଠ ଜବତ କଲେ ସମସ୍ୟାର ସମାଧାନ ହେବନି, ବରଂ ଅଭିଯୁକ୍ତଙ୍କୁ ଗିରଫ କରିବାକୁ ଜିଲାସ୍ତରରୁ ନିର୍ଦ୍ଦେଶ ଆସିଥିବା କହି ଘଟଣାକୁ ଅତି କୋହଳ ଭାବେ ନିଆଯାଉଛି। ଏହାର ସୁଯୋଗରେ କାଠଚୋରମାନେ ସଂରକ୍ଷିତ ଜଙ୍ଗଲକୁ ପଦା କରି ଚାଲିଛନ୍ତି। ଢେଙ୍କାନାଳ ବନଖଣ୍ଡ ମହାବିରୋଡ ରେଞ୍ଜ ଡିହଡୋଳ ଫରେଷ୍ଟ ସେକ୍ସନ ଅଧୀନ ସୁରତନାଳୀ ଗ୍ରାମ ନିକଟ ଜଙ୍ଗଲରେ ଏପରି ଘଟଣା ବନ ବିଭାଗର କାର୍ଯ୍ୟ ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ଚାନ୍ଦପୁର ପଞ୍ଚାୟତ ସୁରୁତନାଳୀ ଗ୍ରାମ ନିକଟ ଜଙ୍ଗଲରେ ବଡ଼ ବଡ଼ ଶାଳ, ଶାଗୁଆନ, ରହଣି ଭଳି ମୂଲ୍ୟବାନ ଗଛ ଗଣ୍ଡି କଟାହୋଇ ପଡ଼ିଛି। ଏଠାରୁ କାଠ କଟାଯାଇ ପାଣିଗେଙ୍ଗୁଟିଆ, ବତାସିଂହ, ରୋଡ, ପାଳସାହି, ବ୍ରାହ୍ମଣୀ ନଦୀ ଅପରପାର୍ଶ୍ୱରେ ଥିବା ବିଡୋ, ଖଡ଼ଗପ୍ରସାଦ, ନାଧରା, ଧଳପୁର ସମେତ ଜିଲାର ବିଭିନ୍ନ ସ୍ଥାନକୁ ସିଧାସଳଖ ଚାଲାଣ ହେଉଛି। ଏ ସମ୍ପର୍କରେ ଗ୍ରାମବାସୀ ସାଆନ୍ଦା ଅଞ୍ଚଳର ଫରେଷ୍ଟ ଗାର୍ଡ ନିରଞ୍ଜନ ନାୟକଙ୍କୁ ଅବଗତ କରାଇଥିଲେ। ଗତ ଗୁରୁବାର ରେଞ୍ଜର ସୁବ୍ରତ ବେହେରାଙ୍କ ନେତୃତ୍ୱରେ ବନ ବିଭାଗ କର୍ମଚାରୀମାନେ ଘଟଣାସ୍ଥଳକୁ ଯାଇ ପରିସ୍ଥିତି ଅନୁଧ୍ୟାନ କରିଥିଲେ। କିନ୍ତୁ କାଠ ଜବତ କରାଯାଇ ନ ଥିଲା। ଏହାପରେ ଚୋରା କାଠ ବ୍ୟବସାୟୀମାନେ ଗ୍ରାମବାସୀଙ୍କୁ ଖୋଲା ଚ୍ୟାଲେଞ୍ଜ ଦେଉଛନ୍ତି। ଚୋରା କାଠ ବ୍ୟବସାୟୀଙ୍କୁ ଧରିବାକୁ ବନ ବିଭାଗ ଗ୍ରାମବାସୀଙ୍କୁ ସୂଚନାଦାତା ଭାବେ ନିଯୁକ୍ତି ଦେଉଥିବାବେଳେ ମହାବିରୋଡ ରେଞ୍ଜରେ ଏହାର ବିପରୀତ ଦୃଶ୍ୟ ଦେଖିବାକୁ ମିଳିଛି। ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ବନ ବିଭାଗ ଏବଂ କାଠ ଚୋରା ବ୍ୟବସାୟୀଙ୍କ ମଧ୍ୟରେ ଭିତିରିଆ ବୁଝାମଣା ହୋଇଥିବାରୁ ସୂଚନା ଦିଆଯିବା ସତ୍ତ୍ୱେ କାଠ ଜବତ କରାଯାଉ ନ ଥିବା କେତେଜଣ ଗ୍ରାମବାସୀ ନିଜ ନାମ ଗୋପନ ରଖି କହିଛନ୍ତି।
ଜବତ କାଠ ଆଣିଲେ ଅଫିସ ଭର୍ତ୍ତି ହୋଇଯିବ
କାଠ ମାଫିଆଙ୍କ ସହ ସମ୍ପର୍କ ନାହିଁ। କାଠ ଜବତ କରି ଆଣିବାକୁ ରେଞ୍ଜର ମନା କରିଛନ୍ତି। ଏତେ ପରିମାଣର କାଠ ଜବତ କରି ରଖିଲେ ଅଫିସ ଭର୍ତ୍ତି ହୋଇଯିବ। ତେଣୁ କାଠ ଜବତ ନ କରି ଅଭିଯୁକ୍ତଙ୍କୁ କିପରି ଧରିବୁ ସେହି ଚେଷ୍ଟା କରିବୁ।
– ସୁଦର୍ଶନ ସେଠୀ, ଫରେଷ୍ଟର
କାଠ ନୁହେଁ, ଅଭିଯୁକ୍ତଙ୍କୁ ଧରିବୁ
ଜଙ୍ଗଲରୁ କାଠ ଜବତ କରି ଆଣିଲେ ଗାଡ଼ି ଭଡ଼ା ବି ବାହାରିବ ନାହିଁ। ଜବତ କାଠ ରଖିବାକୁ ଜାଗାନାହିଁ। ଜଙ୍ଗଲରୁ କାଠ ଜବତ କରିବା ପରିବର୍ତ୍ତେ କାଠ କାଟୁଥିବା ବ୍ୟକ୍ତିଙ୍କୁ ଧରିବାକୁ ଡିଏଫ୍ଓ କହିଛନ୍ତି। ତେଣୁ କାଠ ଜବତ କରାଯାଇନାହିଁ।
– ସୁବ୍ରତ ବେହେରା, ରେଞ୍ଜର
