କେସିଙ୍ଗା,୨୫ା୬(ତୁମେଶ୍ୱର ସାହୁ): କଳାହାଣ୍ଡି ଜିଲାର ପ୍ରମୁଖ ନିର୍ବାଚନ ମଣ୍ଡଳୀ ଭାବରେ ପରିଚିତ କେସିଙ୍ଗା ନିର୍ବାଚନ ମଣ୍ଡଳୀ ଜିଲାର ଏକ ମାତ୍ର ମୁଖ୍ୟ ନିର୍ବାଚନ ମଣ୍ଡଳୀ ଥିଲା। ଗତ ୨୦୦୮ରୁ ଦୀର୍ଘ ୧୮ ବର୍ଷ ହେଲାଣି ଅସ୍ତିତ୍ୱ ହରାଇଛି। ୧୯୬୬ରେ ଅସ୍ତିତ୍ୱରେ ଆସିଥିବା କେସିଙ୍ଗା ନିର୍ବାଚନ ମଣ୍ଡଳୀ ୨୦୦୯ରେ ରାଜନୈତିକ ଅଭିସନ୍ଧି ଖଣ୍ଡଯୁଦ୍ଧ ପାଇଁ ଅଧା ଭବାନୀପାଟଣା ସଦର ନିର୍ବାଚନ ମଣ୍ଡଳୀରେ ଓ ଅଧା ନର୍ଲା ନିର୍ବାଚନ ମଣ୍ଡଳୀରେ ମିଶି ନିଜର ଅସ୍ତିତ୍ୱ ହରାଇଥିଲା। ଯାହା ଫଳରେ ମୁରବୀବିହୀନ ସହର ଭାବରେ କେସିଙ୍ଗା ସହର ରହିଛି। ଅନେକ ସମସ୍ୟା ରହିଥିଲେ ସୁଦ୍ଧା କାହାରି ନଜର ପଡୁ ନାହିଁ। ପ୍ରଥମେ ସ୍ବାସ୍ଥ୍ୟ, ଶିକ୍ଷା, ରାଜନୈତିକ କ୍ଷେତ୍ରରେ ମଧ୍ୟ ଦକ୍ଷତା ଥିବା ଭଳି ପ୍ରାର୍ଥୀ ନ ଥିବାରୁ କେସିଙ୍ଗା ନିର୍ବାଚନ ମଣ୍ଡଳୀକୁ ଭବାନୀପାଟଣା ନିର୍ବାଚନ ଭାବେ ନିଆଗଲା। ଯାହାଫଳରେ ଭବାନୀପାଟଣାରୁ ଅନେକ ରାଜନୈତିକ ଦଳ ମଧ୍ୟ ବିଧାୟକ ଠାରୁ ଆରମ୍ଭ କରି ଏମ୍ପି ପ୍ରାର୍ଥୀ ହୋଇ ଆସୁଛନ୍ତି।
କେସିଙ୍ଗା ନିର୍ବାଚନ ମଣ୍ଡଳୀ ହେବାକୁ ଆଉ କେହି ବି ଚାହୁନାହାନ୍ତି। ଯାହାଫଳରେ କେସିଙ୍ଗା ଅଞ୍ଚଳରେ ଦିନକୁ ଦିନ ଅନେକ ସମସ୍ୟା ଦେଖା ଯିବା ସହ ସ୍ବାସ୍ଥ୍ୟ, ଶିକ୍ଷା, ପାନୀୟଜଳ, ଗମନାଗମନ ଆଦି କ୍ଷେତ୍ରରେ ସମସ୍ୟା ଘେରି ରହିଛି। କେସିଙ୍ଗାର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଆବଶ୍ୟକତା ଅନୁସାରେ ଡାକ୍ତର ଓ ବିଶେଷଜ୍ଞ ଅଭାବ, ଜିଲାର ସବୁଠୁ ଓସାରିଆ ଜାତୀୟ ରାଜପଥ ଅଛି ହେଲେ ଟ୍ରାଫିକ ସମସ୍ୟା, ପାଖାପାଖି ୪ ଶହ କୋଟି ଟଙ୍କା ବ୍ୟୟରେ ରେଳ ଓଭର ବ୍ରିଜ ହେଉଛି ହେଲେ ତାହାର ଅବସ୍ଥିତିକୁ ନେଇ ବଢୁଛି ଅସନ୍ତୋଷ । ଭିତ୍ତିଭୂମି, ବଜାର ଓ ପରିବହନର ସମସ୍ତ ସୁବିଧା ଥାଇ କେସିଙ୍ଗା ସୂତାକଳ ଦୀର୍ଘ ଦିନ ଧରି ବନ୍ଦ ପଡ଼ିଛି,ଗତ ୧୯୮୩-୮୪ରେ ଶୁଭାରମ୍ଭ ହୋଇ ଥିବା ପେପର ମିଲ୍ ଆଜି ଯାଏ କିଛି କାମ ହେଲା ନାହିଁ। ୧୫୦ଜଣ ଚାଷୀଙ୍କ ୧୮୦ଏକର ଜମି ହରାଇ ନିରାଶରେ ବସିଛନ୍ତି। ଏହି ଜମିରେ ବିଜେଡି ଶାସନ ଅମଳରେ ୧୨କୋଟି ବ୍ୟୟରେ ଏମ୍ଏସଏମଇ ପାର୍କ ନିର୍ମାଣ ପାଇଁ ବାଡ଼ା, ଡ୍ରେନ,ରୋଡ଼ ନିର୍ମାଣ କରଗଲା କିନ୍ତୁ ତାହା ଅର୍ଦ୍ଧ ନିର୍ମିତ ଅବସ୍ଥାରେ ପଡ଼ିରରହିଛି। ଏହିପରି ଅନେକ ସମସ୍ୟା ଦେଖିବାକୁ ମିଳୁଥିଲେ ମଧ୍ୟ ରାଜନୈତିକ ଦଳର ହସ୍ତକ୍ଷେପର ଅଭାବରୁ ସମସ୍ୟା କମିବା ପରିବର୍ତ୍ତେ ବଢ଼ିବାରେ ଲାଗିଛି। ଚଳିତ ବର୍ଷ ନିର୍ବାଚନମଣ୍ଡଳୀର ପୁନଃ ସୀମା ନିର୍ଦ୍ଧାରଣ ହେବ ବୋଲି ଜଣାପଡ଼ିବା ପରେ କେସିଙ୍ଗାରେ ଏହାର ପ୍ରତିକ୍ରିୟା ଆରମ୍ଭ ହୋଇଥିବା ଦେଖିବାକୁ ମିଳୁଛି। ଏହି ନିର୍ବାଚନ ମଣ୍ଡଳୀକୁ ଫେରାଇ ଆଣିବାକୁ ସାମାଜିକ ଗଣମାଧ୍ୟମରେ ଲୋକଙ୍କୁ ସଚେତନ ସହିତ ବୁଦ୍ଧିଜୀବୀ ଓ ଜନସାଧାରଣରେ ଦାବିହେଉଛି । ବହୁତ ଶୀଘ୍ର ଉକ୍ତ ବିଷୟକୁ ନେଇ ସହରରେ ଏକ ସର୍ବଦଳୀୟ ବୈଠକ ଅନୁଷ୍ଠିତ ହୋଇ ଆଗାମୀ ରଣନୀତି ପ୍ରସ୍ତୁତ କରାଯିବ ବୋଲି ଜଣାପଡ଼ିଛି। ଏନେଇ କେସିଙ୍ଗା ସହରରେ କେସିଙ୍ଗା ନିର୍ବାଚନ ମଣ୍ଡଳୀ ଫେରାଇ ଆଣିବାକୁ ପୋଷ୍ଟର ଲଗାଇ ଅଞ୍ଚଳବାସୀଙ୍କୁ ଏକଜୁଟ୍ ହୋଇ ସରକାରଙ୍କ ପାଖରେ ଦାବି ଉପସ୍ଥାନ ସହ ଦରକାର ପଡ଼ିଲେ ଅହିଂସା ଆନ୍ଦୋଳନ ପାଇଁ ପ୍ରସ୍ତୁତ ରହିବାକୁ ଲୋକଙ୍କୁ ଜନ ସଚେତନ କରାଉଥିବାର ଜଣାପଡ଼ିଛି।
