ନୂଆଦିଲ୍ଲୀ,୧୨।୧: ଦିଲ୍ଲୀ ସରକାରଙ୍କ ଦ୍ୱାରା ସମ୍ପ୍ରତି ରଦ୍ଦ ହୋଇଥିବା ଅବକାରୀ ନୀତି କାର୍ଯ୍ୟକାରିତାରେ ଅନିୟମିତତା ଯୋଗୁ ରାଜ୍ୟ ରାଜକୋଷକୁ ୨,୦୨୬ କୋଟି ଟଙ୍କା କ୍ଷତି ସହିବାକୁ ପଡ଼ିଛି। ପ୍ରଘଟ ହୋଇଥିବା ନିୟନ୍ତ୍ରକ ଓ ମହାଲେଖା ପରୀକ୍ଷକ (ସିଏଜି) ରିପୋର୍ଟରୁ ଏହା ଜଣାପଡ଼ିଛି। ଅବକାରୀ ନୀତି କାର୍ଯ୍ୟକାରିତାରେ ଗୁରୁତର ତ୍ରୁଟି ସାଙ୍ଗକୁ ଲାଇସେନ୍ସ ପ୍ରଦାନରେ ନୀତି ପରିବର୍ତ୍ତନ ଓ ଉଲ୍ଲଂଘନ ହୋଇଥିବା ରିପୋର୍ଟରେ ଉଲ୍ଲେଖ ରହିଛି। ଆକାଂକ୍ଷିତ ଲକ୍ଷ୍ୟ ହାସଲ କରିବାରେ ଏହି ନୀତି ବିଫଳ ହୋଇଥିବାବେଳେ ଉତ୍କୋଚ କାରବାରରୁ ଆପ୍ ନେତାମାନେ ଲାଭବାନଥ ହୋଇଛନ୍ତି। ରିପୋର୍ଟରେ ଆହୁରି କୁହାଯାଇଛି ଯେ, ବିଶେଷଜ୍ଞ କମିଟିର ସୁପାରିସକୁ ତତ୍କାଳୀନ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ନେତୃତ୍ୱାଧୀନ ମନ୍ତ୍ରୀ ଗୋଷ୍ଠୀ ଉପେକ୍ଷା କରିଥିଲା।
୨୦୨୧ ନଭେମ୍ବରରେ ଦିଲ୍ଲୀ ସରକାର ନୂଆ ଅବକାରୀ ନୀତି କାର୍ଯ୍ୟକାରୀ କରିଥିଲେ। ଜାତୀୟ ରାଜଧାନୀରେ ମଦ ଖୁଚୁରା ବ୍ୟବସାୟ ବଢ଼ାଇ ଅଧିକ ରାଜସ୍ବ ସଂଗ୍ରହ କରିବା ଏହାର ଲକ୍ଷ୍ୟ ଥିଲା। ତେବେ ଉକ୍ତ ନୀତି କାର୍ଯ୍ୟକାରିତାରେ ଦୁର୍ନୀତି ଏବଂ ମନିଲଣ୍ଡରିଂ ହୋଇଥିବା ପ୍ରବର୍ତ୍ତନ ନିର୍ଦ୍ଦେଶାଳୟ ଏବଂ ସିବିଆଇ ତଦନ୍ତରୁ ଜଣାପଡ଼ିଥିଲା। ତତ୍କାଳୀନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ସମେତ ସିସୋଡିଆ, ସଞ୍ଜୟ ସିଂ ପ୍ରମୁଖ ଆପ୍ର ଶୀର୍ଷ ନେତାମାନେ ଗିରଫ ହୋଇଥିଲେ। ଦିଲ୍ଲୀ ବିଧାନସଭାରେ ଏହି ରିପୋର୍ଟ ଉପସ୍ଥାପନ କରାଯାଇ ନାହିଁ। ରିପୋର୍ଟ ଅନୁଯାୟୀ, ଅଭିଯୋଗ ସତ୍ତ୍ୱେ ବିଡରମାନଙ୍କ ଆର୍ଥତ୍କ ସ୍ଥିତିର ଯାଞ୍ଚ କରା ନ ଯାଇ ସମସ୍ତ ସଂସ୍ଥାଙ୍କୁ ବିଡ୍ ଦାଖଲ ପାଇଁ ଅନୁମତି ଦିଆଯାଇଥିଲା। ଅବକାରୀ ନୀତିର ଉଲ୍ଲଂଘନକାରୀଙ୍କୁ ଜାଣିଶୁଣି ଦଣ୍ଡିତ କରାଯାଇ ନ ଥିଲା। କ୍ୟାବିନେଟ କିମ୍ବା ଉପରାଜ୍ୟପାଳଙ୍କ ଅନୁମୋଦନ ବିନା ପ୍ରମୁଖ ନିଷ୍ପତ୍ତି ନିଆଯାଇଥିଲା। ନୂଆ ନିୟମାବଳୀର ସଂଶୋଧନ ପାଇଁ ଏହାକୁ ବିଧାନସଭାରେ ଉପସ୍ଥାପନ କରାଯାଇ ନ ଥିଲା। ନୀତି ଅବଧି ଶେଷ ହେବା ପରେ ମଧ୍ୟ କେତେକ ଖୁଚୁରା ମଦ ବ୍ୟବସାୟୀ ସେମାନଙ୍କ ଲାଇସେନ୍ସ ବଜାୟ ରଖିଥିଲେ। ସମୟସୀମା ଶେଷ ହେବା ପୂର୍ବରୁ କେତେଜଣ ଲାଇସେନ୍ସ ସମର୍ପଣ କରିଥିଲେ ମଧ୍ୟ ପୁନର୍ବାର ଟେଣ୍ଡର ହୋଇ ନ ଥିଲା। ଫଳରେ ସରକାରଙ୍କୁ ୮୯୦ କୋଟି ଟଙ୍କା କ୍ଷତି ସହିବାକୁ ପଡ଼ିଲା ବୋଲି ରିପୋର୍ଟରେ କୁହାଯାଇଛି। ଏହା ବ୍ୟତୀତ ଜୋନାଲ ଲାଇସେନ୍ସଧାରୀଙ୍କୁ କେତେକ ଛାଡ଼ ପ୍ରଦାନ କରାଯିବାରୁ ଅଧିକ ୯୪୧ କୋଟି ଟଙ୍କା କ୍ଷତି ହୋଇଥିଲା। କୋଭିଡ୍ କଟକଣା ପରିପ୍ରେକ୍ଷୀରେ ଜୋନାଲ ଲାଇସେନ୍ସଧାରୀଙ୍କ ଲାଇସେନ୍ସ ଫି ଛାଡ଼ କରାଯିବାରୁ ଅତିରିକ୍ତ ୧୪୪ କୋଟି ଟଙ୍କା କ୍ଷତି ହେଇଥିଲା।
ଅବକାରୀ ନୀତି କାର୍ଯ୍ୟକାରିତାରେ ଦିଲ୍ଲୀ ସରକାର ୨,୦୨୬ କୋଟି ଟଙ୍କା ରାଜସ୍ବ କ୍ଷତି ସହିଥିବା ସିଏଜି ରିପୋର୍ଟରୁ ଜଣାପଡ଼ିଥିଲାବେଳେ ଆମ୍ ଆଦ୍ମୀ ପାର୍ଟି (ଆପ୍) ସରକାର ଏହାକୁ ବିଧାନସଭାରେ ଉପସ୍ଥାପନ କରୁ ନ ଥିବା ଭାଜପା ଅଭିଯୋଗ କରିଛି। ରିପୋର୍ଟରେ ଉଠାଯାଇଥିବା ପ୍ରଶ୍ନର ଜବାବ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଦେବାକୁ ହେବ ବୋଲି ଭାଜପା ନେତା ଅନୁରାଗ ଠାକୁର ଏକ ଖବରଦାତା ସମ୍ମିଳନୀରେ କହିଛନ୍ତି। ଏହି ଟଙ୍କା କାହା ପକେଟକୁ ଯାଇଥିଲା ଦୁର୍ନୀତିର କିଙ୍ଗ୍ପିନ୍ କେଜ୍ରିଓ୍ବାଲ ପ୍ରକାଶ କରିବା ଆବଶ୍ୟକ। ସିଏଜି ରିପୋର୍ଟରୁ ଆଭ୍ୟନ୍ତରୀଣ ତ୍ରୁଟି ପଦାରେ ପଡ଼ିଥିବା ଭାଜପା ଅଧ୍ୟକ୍ଷ ଜେ.ପି. ନଡ୍ଡା କହିଛନ୍ତି। ମଦ ଭଳି ବିଭିନ୍ନ ବିଭାଗରେ ଲୁଟ୍ର ‘ଆପ୍’ଦା ମଡେଲ୍ ପୂର୍ଣ୍ଣ ପ୍ରଦର୍ଶିତ ହୋଇଥିବା ଭାଜପା ମୁଖ୍ୟ କହିଛନ୍ତି।
