ନୂଆଦିଲ୍ଲୀ,୧୩।୧୨: ନୂଆବର୍ଷରେ ରାଜ୍ୟ ସରକାର ଦିଲ୍ଲୀବାସୀଙ୍କୁ ଏକ ବଡ଼ ଭେଟି ଦେବାକୁ ଯାଉଛନ୍ତି। ଲୋକଙ୍କୁ ଭଲ ସ୍ବାସ୍ଥ୍ୟ ସେବା ଓ ମାଗଣା ଚିକିତ୍ସା ଯୋଗାଇଦେବା ପାଇଁ ସରକାର ଚିନ୍ତା କରିବା ସହ ଏକ ଭଲ ପଦକ୍ଷେପ ଗ୍ରହଣ କରିଛନ୍ତି। ନୂଆ ବର୍ଷରୁ ରାଜଧାନୀରେ ମାଗଣାରେ ଅନେକ ମେଡିକାଲ ପରୀକ୍ଷା କରାଇବାକୁ ଦିଲ୍ଲୀ ସରକାର ପ୍ରସ୍ତୁତ ହେଉଛନ୍ତି। ଆସନ୍ତା ଜାନୁଆରୀ ୧ରୁ ରାଜଧାନୀରେ ୪୫୦ଟି ମେଡିକାଲ ପରୀକ୍ଷା ମାଗଣାରେ କରାଯିବ ବୋଲି କେଜ୍ରିଓ୍ବାଲ ସରକାର ନିଷ୍ପତ୍ତି ନେଇଛନ୍ତି। ଏହାଦ୍ୱାରା ସାଧାରଣ ଲୋକଙ୍କୁ ଆଶ୍ୱସ୍ତି ମିଳିବା ସହ ସୀମିତ ଖର୍ଚ୍ଚରେ ଚିକିତ୍ସା ପାଇପାରିବେ। ମଙ୍ଗଳବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଟୁଇଟ କରି ଏହି ସୂଚନା ଦେଇଛନ୍ତି। ସେ କହିଛନ୍ତି, ଆର୍ଥିକ ସ୍ଥିତିକୁ ଖାତିର ନ କରି ସମସ୍ତଙ୍କୁ ଉତ୍ତମ ଗୁଣାତ୍ମକ ସ୍ବାସ୍ଥ୍ୟ ଏବଂ ଶିକ୍ଷା ଯୋଗାଇଦେବା ସରକାରଙ୍କ ଲକ୍ଷ୍ୟ।
