ନୂଆଦିଲ୍ଲୀ, ୧ା୮: ପୃଥିବୀ ନିଜ କକ୍ଷପଥରେ ଘୂରିବା ସମୟର ପୂର୍ବ ରେକର୍ଡକୁ ଭାଙ୍ଗିଛି। ୨୦୨୦ ଜୁଲାଇ ୧୯ରେ ୨୪ ଘଣ୍ଟାରୁ ୧.୪୭ ମିଲିସେକେଣ୍ଡ କମ୍ ଅବଧିରେ ପୃଥିବୀ ନିଜ ଚାରିପଟେ ଘୂରିଥିବାବେଳେ ଗତ ଶୁକ୍ରବାର ୧.୫୯ କମ୍ ମିଲିସେକେଣ୍ଡ ମଧ୍ୟରେ ଘୂର୍ଣ୍ଣନ କରିଛି। ନିୟମିତ ଦିନିକିଆ ଘୂର୍ଣ୍ଣନ ସମୟରେ ହ୍ରାସ ଫଳରେ ସ୍ମାର୍ଟଫୋନ୍, କମ୍ପ୍ୟୁଟର ଏବଂ ଦୂର ସଞ୍ଚାର କ୍ଷେତ୍ର ଉପରେ ନକାରାମତ୍କ ପ୍ରଭାବ ପଡ଼ିବ ବୋଲି ବୈଜ୍ଞାନିକମାନେ ଚିନ୍ତାବ୍ୟକ୍ତ କରିଛନ୍ତି।
ପୃଥିବୀ ନିଜ କକ୍ଷ ଚାରିପାଖେ ବୁଲିବା ସହ ସୂର୍ଯ୍ୟଙ୍କ ଚତୁଃପାର୍ଶ୍ୱରେ ମଧ୍ୟ ଘୂରିଥାଏ। ନିଜ କକ୍ଷ ଚାରିପାଖେ ଘୂରିବା କାରଣରୁ ପୃଥିବୀ ପୃଷ୍ଠରେ ଦିନରାତି ସମ୍ଭବ ହୋଇଥାଏ, ଯେଉଁଥିଲାଗି ପୃଥିବୀକୁ ୨୪ ଘଣ୍ଟା ସମୟ ଲାଗେ। ସୂର୍ଯ୍ୟ ଚତୁଃପାର୍ଶ୍ୱ ଅତିକ୍ରମ କରିବା ପାଇଁ ପୃଥିବୀକୁ ୩୬୫ ଦିନ ବା ୧ ବର୍ଷ ଲାଗିଥାଏ। ପୃଥିବୀ ନିଜକକ୍ଷ ପଥରେ ଘୂର୍ଣ୍ଣାୟମାନ ବେଗରେ ବୃଦ୍ଧି ପରିଲକ୍ଷିତ ହୋଇଛି। ଗତ ୨୯ ତାରିଖରେ ପୃଥିବୀ ୧.୫୯ ମିଲିସେକେଣ୍ଡରୁ କମ୍ ସମୟ ମଧ୍ୟରେ ନିଜ କକ୍ଷ ଚାରିପାଖେ ଭ୍ରମଣ କରିଛି। ଏଥିଲାଗି ପୃଥିବୀକୁ ୨୪ ଘଣ୍ଟାରୁ କମ୍ ସମୟ ଲାଗିଛି। ‘ଇଣ୍ଡିପେଣ୍ଡେଣ୍ଟ’ ପତ୍ରିକାରେ ପ୍ରକାଶିତ ଖବର ଅନୁସାରେ ପୃଥିବୀର ଘୂର୍ଣ୍ଣାୟମାନ ବେଗରେ ବୃଦ୍ଧି ଘଟିଛି। ଏ କାରଣରୁ ୨୦୨୦ରେ ପୃଥିବୀରେ ସବୁଠାରୁ ଛୋଟ ମାସ ଦେଖିବାକୁ ମିଳିଥିଲା। ଏହାପୂର୍ବରୁ ୧୯୬୦ ଦଶକରେ ମଧ୍ୟ ସମାନ ସ୍ଥିତି ଉପୁଜିଥିଲା। ୨୦୨୦ ଜୁଲାଇ ୧୯ରେ ସବୁଠାରୁ କମ୍ ସମୟ ୧.୪୭ ମିଲିସେକେଣ୍ଡରେ ପୃଥିବୀ ନିଜକକ୍ଷ ଚାରିପାଖେ ଘୂରିଥିଲା। ୨୦୨୧ରେ ପୃଥିବୀର ଘୂର୍ଣ୍ଣାୟମାନ ବେଗରେ ବୃଦ୍ଧି ଘଟିଥିଲେ ହେଁ କୌଣସି ବଡ଼ ପରିବର୍ତ୍ତନ ଦେଖିବାକୁ ମିଳିନାହିଁ। ଏହା ପଛର କାରଣ ବିଷୟରେ କୌଣସି ସ୍ପଷ୍ଟ ତଥ୍ୟ ମିଳି ନ ଥିବାବେଳେ ମହାସାଗରୀୟ ପରିବେଶ, ଢ଼େଉ ଏବଂ ଜଳବାୟୁ ପରିବର୍ତ୍ତନ ଯୋଗୁ ଏ ପ୍ରକାର ପରିବର୍ତ୍ତନ ଦେଖାଦେଇଥିବା ବୈଜ୍ଞାନିକମାନେ ଦାବି କରିଛନ୍ତି। ଅନ୍ୟପଟେ ପୃଥିବୀର କକ୍ଷପଥ ଘୂର୍ଣ୍ଣାୟମାନ ବେଳେ ପୃଷ୍ଠଭାଗରୁ ଏହାର ଭୌଗୋଳିକ ରେଖା ପର୍ଯ୍ୟନ୍ତ ହେଉଥିବା ମୁଭ୍ମେଣ୍ଟରେ ହେଉଥିବା ପରିବର୍ତ୍ତନ କାରଣରୁ ପୃଥିବୀର ଘୂର୍ଣ୍ଣାୟମାନ ବେଗରେ ବୃଦ୍ଧି ଘଟୁଥାଇପାରେ ବୋଲି ବୈଜ୍ଞାନିକ ଲେଓନିଦ ଜୋଟୋଭ୍, କ୍ରିଷ୍ଟିଆନ୍ ବିଜୋଉଆର୍ଡ, ନିକୋଲେ ସିଡୋର୍ନକୋଭ କହିଛନ୍ତି।
ଯଦି ଭବିଷ୍ୟତରେ ଏ ପ୍ରକାର ସ୍ଥିତିର ଲଗାତର ପୁନରାବୃତ୍ତି ହୁଏ ତେବେ ଏହାର ନକାରାତ୍ମକ ପ୍ରଭାବ ଅଧିସେକେଣ୍ଡ (ସମୟ ଓ ଆବର୍ତ୍ତନ ସହ ସମନ୍ବୟ ରକ୍ଷା କରିବା ପାଇଁ ବ୍ୟବହୃତ ସମୟ) ଉପରେ ପଡ଼ିବ। ଫଳରେ ସ୍ମାର୍ଟଫୋନ୍, କମ୍ପ୍ୟୁଟର ଏବଂ ଦୂର ସଞ୍ଚାର କ୍ଷେତ୍ରକୁ ଏହା ପ୍ରଭାବିତ କରିବ। ଅନ୍ୟପଟେ ସମୟରେ ବ୍ୟତିକ୍ରମ ଦେଖାଯିବା ଫଳରେ ଡାଟା କରପ୍ଟ ହେବାର ଆଶଙ୍କା ରହିଛି। ଷ୍ଟାଣ୍ଡାର୍ଡ ପ୍ରାଇମେରୀ ଟାଇମ୍ ଦ୍ୱାରା ସାରା ବିଶ୍ୱ ପରିଚାଳିତ। ପୃଥିବୀ ନିଜକକ୍ଷ ଚାରିପାଖେ ଘୂରିବାରେ ପରିବର୍ତ୍ତନ ଦେଖାଯିବା କାରଣରୁ ବିଗତ ଦିନରେ ପ୍ରାୟ ୨୭ ଥର ଅଧି ସେକେଣ୍ଡରେ ପରିବର୍ତ୍ତନ କରାଯାଇଥିବା କୋଅର୍ଡିନେଟେଡ୍ ୟୁନିଭର୍ସାଲ ଟାଇମ୍ (ୟୁଟିସି) ପକ୍ଷରୁ କୁହାଯାଇଛି।
